សម្តេចឪ និងព្រះមហាក្សត្រខ្មែរបញ្ចប់ព្រះទស្សនកិច្ចនៅវៀតណាម
អតីតព្រះមហាក្សត្រ និងព្រះមហាក្សត្រខ្មែរ បានយាងនិវត្តន៍មកដល់ប្រទេសកម្ពុជាវិញហើយនៅព្រឹកថ្ងៃសុក្រនេះ បន្ទាប់ពីបានបញ្ចប់ព្រះទស្សនកិច្ចរយៈពេល ៤ ថ្ងៃនៅប្រទេសវៀតណាម។ ព្រះទស្សនកិច្ចជាលក្ខណៈឯកជននេះ ត្រូវបានធ្វើឡើង ដើម្បីរឹតចំណងមិត្តភាពនៃប្រទេសទាំងពីរ។ បញ្ហានយោបាយ និងបូរណភាពដែនដី មិនត្រូវបានភាគីទាំងពីរលើកឡើងឡើយ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ នេត្រ ភក្ត្រា
ដំណើរទស្សនកិច្ចសម្តេចឪ នរោត្តម សីហនុសម្តេចម៉ែ និងព្រះមហាក្សត្រខ្មែរ រយៈពេលបួនថ្ងៃនៅ វៀតណាមបានបញ្ចប់ហើយនៅថ្ងៃនេះ។ ក្រុមមន្ត្រីកម្ពុជា និងវៀតណាមអះអាងថា ដំណើរទស្សនកិច្ចបានជួយរឹតចំណងមិត្តភាពរវាងប្រទេសជិតខាងទាំងពីរឲ្យកាន់តែរឹងមាំថែមទៀត។ មន្ត្រីរដ្ឋាភិបាលកម្ពុជា បានបង្ហាញពីភាពវិជ្ជមាននៃព្រះដំណើរទស្សនកិច្ចនេះ និងចាត់ទុកថាជាកត្តាមួយពង្រឹងទំនាក់ទំនងល្អដែលកម្ពុជា និងវៀតណាមមានស្រាប់ឲ្យកាន់តែមានភាពរឹងមាំបន្ថែមទៀត។
នៅក្នុងព្រះដំណើរទស្សនកិច្ចរបស់ព្រះអង្គ សម្តេចឪបានជួបសវនាការ ជាមួយនឹងឥស្សរជនជាន់ខ្ពស់វៀតណាមជាច្រើនរូប រួមមានលោកប្រធានាធិបតីវៀតណាម ង្វៀន មិញទ្រៀត និងអគ្គលេខាធិការបក្សកុម្មុយនិស្តវៀតណាម ណង ឌឹកម៉ាញ់។ មេដឹកនាំវៀតណាមបានអបអរសាទរចំពោះសមិទ្ធផលនានាដែលកម្ពុជាសម្រេចបានក្នុងការអភិវឌ្ឍន៍ជាតិកន្លង។ វៀតណាមបានសម្តែងនូវការដឹងគុណយ៉ាងជ្រៀលជ្រៅចំពោះព្រះមហាក្សត្រ ប្រជាជន និងរដ្ឋាភិបាលកម្ពុជា កាលពីអតីតកាលដែលបានជួយរំដោះ និងបង្រួបបង្រួមជាតិវៀតណាម។ ចំណែកឯសម្តេចឪ នរោត្តម សីហនុ និងព្រះមហាក្សត្រខ្មែរ ត្រូវបានទីភ្នាក់ងារព័ត៌មានវៀតណាមដកស្រង់ព្រះរាជបន្ទូលថា កម្ពុជា និងវៀតណាមនៅតែបន្តទំនាក់ទំនងមិត្តភាពជាយូរអង្វែង រវាងប្រទេសជិតខាងទាំងពីរ។
លោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័សរបស់ទីស្តីការគណៈរដ្ឋមន្ត្រីបានថ្លែងថា ចំណងមិត្តភាព និងកិច្ចសហប្រតិបត្តិរវាងកម្ពុជា និង វៀតណាមនឹងមានភាពស្អិតរមួត ស្ថិតស្ថេរគង់វង្សជារៀងរហូត ខណៈប្រទេសទាំងពីរជាមិត្ត និងបានតស៊ូរួមគ្នាកាលពីអតីតកាល។ លោក ទិត សុធា បានលើកឡើងទៀតថា កម្ពុជាដឹងគុណជានិច្ចចំពោះវៀតណាមដែលបានជួយរំដោះ ប្រជាជនកម្ពុជាចេញពីរបបប្រល័យពូជសាសន៍ខ្មែរក្រហមនៅថ្ងៃទី ៧ មករា ឆ្នាំ ១៩៧៩។ លោកបន្តថា ចំណងមិត្តភាព ដែលរឹតបន្តឹងថ្មីៗនេះ នឹងនាំមកនូវការវិនិយោគថ្មីៗទៀតពីសំណាក់ប្រទេសវៀតណាម។
គ្មានសេចក្តីរាយការណ៍ អះអាងថា សម្តេចឪ នរោត្តម សីហនុ ឬព្រះមហាក្សត្រខ្មែរ លើកឡើងពីភាពមិនប្រក្រតីនានាលើការបោះបង្គោលព្រំដែន ឬការបែងចែកនូវការគ្រប់គ្រងរួមគ្នាលើដែនដីកម្ពុជា និងកោះត្រល់រវាងកម្ពុជា និងវៀតណាមទេ។ បញ្ហាបូរណភាពដែនដីដែលបក្សប្រឆាំង និងក្រុមសង្គមស៊ីវិលខ្លះ បានស្នើសូមអង្គព្រះមហាក្សត្រមានព្រះរាជតម្រិះក្នុងពេលព្រះអង្គធ្វើដំណើរទស្សនកិច្ចនៅវៀតណាម។
ទោះយ៉ាងណាលោក យឹម សុវណ្ណ តំណាងរាស្ត្រ និងជាអ្នកនាំពាក្យគណបក្សសម រង្ស៊ី មានជំនឿថា សម្តេចឪប្រាកដជាបានលើកបញ្ហានេះ នៅក្នុងសវនាការជាមួយនឹងមេដឹកនាំជាន់ខ្ពស់វៀតណាម។ មានជំនឿដោយលោកបញ្ជាក់ថា សម្តេចឪ ជាអង្គព្រះមហាក្សត្រដែលមានបទពិសោធន៍ខ្ពស់ក្នុងការដឹកនាំជាតិ ដូច្នេះព្រះអង្គប្រាកដជាបានលើកឡើងពីបញ្ហាបូរណភាព និងព្រំដែនរវាងកម្ពុជា និងវៀតណាម។ បញ្ហាព្រំដែន ដែលលោក យឹម សុវណ្ណ លើកឡើងថាគឺជាចំណុចរសើប។ ដូច្នេះការពិភាក្សាមិនអាចបើកចំហសម្រាប់សាធារណជននោះឡើយ។ លោកបានបន្តថា គណបក្សប្រឆាំងនឹងបន្តធ្វើកិច្ចការត្រួតពិនិត្យលើការបោះបង្គោលព្រំដែនបន្តទៀត។ មិនត្រឹមតែជាមួយនឹងប្រទេសវៀតណាមទេ ប៉ុន្តែនឹងបន្តទៅភាគខាងលិចជាមួយនឹងប្រទេសថៃ។ ថៃ និងវៀតណាមដែលតាមការ អះអាងរបស់តំណាងរាស្ត្រគណបក្សប្រឆាំង គឺនៅតែបន្តចិញ្ចឹមចិត្តក្នុងការឈ្លានពានកាន់កាប់ទឹកដីខ្មែរដោយខុសច្បាប់ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ