តំបន់ស្វយ័តទីបេរញ្ជួយជាថ្មីដោយការដុតសម្លាប់ខ្លួន និងបង្ក្រាបចាប់ឃុំ
មានករណីដុតសម្លាប់ខ្លួនទៀតហើយ នៅទីបេ ! ថ្ងៃពុធម្សិលមិញ ស្ត្រីទីបេម្នាក់ ដែលរស់ ក្នុងខេត្តអាបា នៃតំបន់ស្វយ័តទីបេ បានសម្រេចធ្វើអត្តឃាតដោយការដុតសម្លាប់ខ្លួន នៅមុខវត្ត។ សេចក្តីអស់សង្ឃឹម គ្មានសេរីភាព ទាំងផ្នែកសាសនា ទាំងវប្បធម៌ និងរស់ក្រោមគំនាបគ្មានត្រាប្រណី ពីសំណាក់អាជ្ញាធរក្រុងប៉េកាំង បានរុញច្រានសង្ឃ និងប្រថុជ្ជនទីបេ ឱ្យបះបោរប្រឆាំងតាមរយៈការដុតសម្លាប់ខ្លួន។ ដោយហេតុតែការផ្ទុះឡើងវិញនៃចលនាដុតសម្លាប់ខ្លួននេះ អាជ្ញាធរចិនបានបើកយុទ្ធនាការបង្ក្រាបចាប់ បណ្តាជនទីបេប្រមាណ៦រយនាក់ នៅទីក្រុងឡាសា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
អត្តឃាតដុតសម្លាប់ខ្លួនរបស់ស្ត្រីទីបេ ជាម្តាយកូនបីនាក់ អាយុខ្ទង់៣៥ឆ្នាំ ដែលផ្សព្វផ្សាយដំបូងឡើងដោយវិទ្យុអាស៊ីសេរី ទើបត្រូវបានបញ្ជាក់ដោយអង្គការការពារសិទ្ធិមនុស្សទីបេ Free Tibet ក៏ប៉ុន្តែអាជ្ញាធរតំបន់ ដែលភ្នាក់ងារសារព័ត៌មានបារាំងបានទាក់ទងនៅថ្ងៃព្រហស្បតិ៍នេះ បដិសេធមិនព្រមធ្វើអត្ថាធិប្បាយអ្វីទាំងអស់។
ករណីដុតសម្លាប់ខ្លួនរបស់ស្ត្រីទីបេម្សិលមិញនេះ កើតឡើងបីថ្ងៃប៉ុណ្ណោះ ក្រោយការដុតសម្លាប់ខ្លួនរបស់សង្ឃទីបេពីរអង្គ ដែលមួយអង្គបានបាត់បង់ជីវិតភ្លាម និងមួយអង្គទៀតរងរបួសជាទម្ងន់។ ប៉ុន្តែអ្វីជាការកត់សម្គាល់ ការប៉ុនប៉ងដុតសម្លាប់ខ្លួនរបស់សង្ឃទីបេ ពីរអង្គ ដើម្បីបរិហារអំណាចត្រួតត្រាផ្តាច់ការរបស់អាជ្ញាធរក្រុងប៉េកាំងនេះ ជាហេតុការណ៍បះបោរដុតសម្លាប់ខ្លួនប្រឆាំងរបបកុម្មុយនិស្តចិន លើកដំបូងបង្អស់ នៅកណ្តាលរដ្ឋធានីឡាសា របស់ទីបេ។ ហេតុដូច្នេះហើយ បានជាភ្លាមមួយរំពេច អាជ្ញាធរចិន បានពង្រឹងការគាបសង្កត់ បង្ក្រាបទ្រង់ទ្រាយធំ តាំងពីថ្ងៃអាទិត្យមក ចាប់ខ្លួនប្រជាជន និងសាសនិកជនទីបេ ឃុំឃាំងប្រមាណ៦រយនាក់។ ជនណាដែលមានដើមកំណើតមកខេត្តផ្សេង ត្រូវបណ្តេញចេញពីទីបេ។
ជាសរុប គិតចាប់ពីខែមីនា ឆ្នាំ២០១១មក មានសង្ឃនិងជនទីបេ ៣៥នាក់ហើយ ដែលបានប៉ុនប៉ងដុតសម្លាប់ខ្លួន ក្នុងនោះ២៧នាក់បានស្លាប់។ នេះបើតាមតួលេខរបស់អង្គការចលនាទីបេនិរទេសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ