លោកសង្ឃទីបេពីរអង្គប៉ុនប៉ងដុតសម្លាប់ខ្លួនជាថ្មី
មានលោកសង្ឃទីបេពីរអង្គ បានប៉ុនប៉ងដុតសម្លាប់ខ្លួននៅរសៀលថ្ងៃអាទិត្យ២៧ឧសភាម្សិលមិញនៅកណ្តាលទីក្រុង Lhassa ជាហេតុបណ្តាលឲ្យលោកសង្ឃមួយអង្គទទួលអនិច្ចធម្មនិងមួយអង្គទៀតត្រូវរបួសធ្ងន់ដោយរលាកភ្លើងខ្លាំង-នេះបើយោងតាមទីភ្នាក់ងារព័ត៌មានចិនថ្មីចេញផ្សាយនៅថ្ងៃចន្ទ២៨ឧសភានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
វិទ្យុអាស៊ីសេរី (RFA)នៅសហរដ្ឋអាមេរិក បានជូនដំណឹងជាលើកដំបូងថា ភិក្ខុសង្ឃទីបេទាំងពីរអង្គនេះដែលបានប៉ុនប៉ងដុតសម្លាប់ខ្លួន បានត្រូវភ្លើងឆាបឆេះរោលរាលយ៉ាងខ្លាំងប្រៀបបាននឹងចន្លុះឬភ្លើងគប់និងទំនងជាបានទទួលអនិច្ចធម្មទាំងពីរអង្គ-នេះបើយោងតាមការរៀបរាប់របស់អ្នកដែលបានឃើញផ្ទាល់នឹងភ្នែក។
ចំណែកទីភ្នាក់ងារព័ត៌មានចិនថ្មីវិញ បានគូសបញ្ជាក់ថា៖ ការប៉ុនប៉ង ដុតសម្លាប់ខ្លួននេះ គឺជាលើកដំបូងហើយដែលបានកើតឡើងនៅកណ្តាលរដ្ឋធានី Lhassa ក្នុងតំបន់ស្វយ័តទីបេ។ ប៉ុន្តែ ប៉ូលិសបានធ្វើអន្តរាគមទាន់ពេល ដោយបានពន្លត់ភ្លើងដោយជោគជ័យក្នុងរយៈពេលតែប៉ុន្មាននាទីប៉ុណ្ណោះ។
ភិក្ខុ Dargye បានរួចផុតពីការបាត់បង់ជីវិត-នេះបើយោងតាមទីភ្នាក់ងារព័ត៌មានចិនថ្មីដដែលដោយបានបន្ថែមទៀតថា ៖ លោកនេន Dargye ជាអ្នកស្រុក Aba ដែលជាតំបន់ទីបេមួយនៅខេត្ត Sichuan ប៉ែកឦសានប្រទេសចិន ជាទីដែលជនជាតិទីបេជាច្រើននាក់ហើយបានដុតសម្លាប់ខ្លួនចាប់តាំងពីឆ្នាំមុនម្ល៉េះ។ រីឯ លោកនេនម្នាក់ទៀតឈ្មោះTobgye Tseten បានអនិច្ចធម្មភ្លាមដោយហេតុមុខរបួសរលាកភ្លើងធ្ងន់ធ្ងរពេកនិងនិមន្តមកពីខេត្ត Gansu ប៉ែកពាយ័ព្យប្រទេសចិន។
ការប៉ុនប៉ងដុតសម្លាប់ខ្លួនរបស់លោកនេនទីបេទាំងពីរអង្គគឺជាកាយវិការសំដែងក្តីអស់សង្ឃឹមក្នុងជីវិតដែលបានប្រព្រឹត្តទៅនៅវត្ត Jokhangជាទីកន្លែងធ្វើធម្មយាត្រាមួយដែលមានចំណាស់រាប់រយឆ្នាំ-នេះជាការបញ្ជាក់របស់វិទ្យុអាស៊ីសេរី RFA។ ក៏ប៉ុន្តែ ទីភ្នាក់ងារព័ត៌មានចិនថ្មីវិញ ពុំបានលើកឡើងអំពីវត្តមាននៃវត្តJokhangនេះ ដែលស្ថិតនៅកណ្តាលទីក្រុង Lhassa នៅក្នុងព័ត៌មានរបស់ខ្លួនឡើយ។
មន្ត្រីជាន់ខ្ពស់កុម្មុយនិស្តចិនម្នាក់នៅក្នុងតំបន់លោក Hao Peng បានថ្កោលទោសព្រឹត្តិការណ៍ប៉ុនប៉ងដុតសម្លាប់ខ្លួនឯងនេះ ដោយវាយតម្លៃថា វាអាចនឹងកើតមានជាបន្តបន្ទាប់ទៀតនៅក្នុងតំបន់ទីបេដទៃផ្សេងទៀតនិងក៏ជាសកម្មភាពមួយដែលមានគោលដៅដើម្បីផ្តាច់ទឹកដីទីបេចេញពីប្រទេសចិន។
ជនជាតិទីបេប្រមាណជា៣០នាក់ហើយ ដែលភាគច្រើនជាសង្ឃកាន់ព្រះពុទ្ធសាសនា បានដុតសម្លាប់ខ្លួនឯង ឬ ក៏ប៉ុនប៉ងដុតសម្លាប់ខ្លួន ចាប់តាំងពីដើមខែមីនាឆ្នាំ២០១១ នៅក្នុងតំបន់ទីបេដែលកាន់កាប់ដោយអាជ្ញាធរចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ