ស.រ.អា.ទាមទារឲ្យប៉េកាំងកាត់បន្ថយភាពតានតឹងនៅតំបន់សមុទ្រចិន
ចុះផ្សាយនៅថ្ងៃ៖
ស្តាប់ - ០២:៤៨
រដ្ឋមន្ត្រីក្រសួងការបរទេសអាមេរិក លោកស្រី ហ៊ីលឡារី គ្លីនតុន បានទាមទារឲ្យប្រទេសចិនចរចាជាមួយប្រទេសនៅតំបន់អាស៊ី-អាគ្នេយ៍ ក្នុងគោលបំណងបង្កើតឲ្យមាន “ក្របខណ្ឌការទូត” មួយសម្រាប់ជួយដោះស្រាយវិបត្តិនៅសមុទ្រចិន ដែលជាផ្លូវសមុទ្រយុទ្ធសាស្ត្រមួយដ៏សំខាន់។
ភាពតានតឹងថ្មីៗនៅសមុទ្រចិនខាងត្បូងឋិតនៅជាចំណាប់អារម្មណ៍មួយដ៏សំខាន់នៅក្នុងដំណើរទស្សនកិច្ចដែលមានរយៈកាល១០ថ្ងៃ របស់លោកស្រី ហ៊ីលឡារី គ្លីនតុន នៅតំបន់អាស៊ី-ប៉ាស៊ីហ្វិក។
ដំណើរទស្សនកិច្ចរបស់រដ្ឋមន្ត្រីក្រសួងការបរទេសអាមេរិកដែលគេចាត់ទុកថា ជាការឆ្លើយតបទៅនឹងមហិច្ឆតាដ៏ខ្លាំងក្លារបស់ទីក្រុងប៉េកាំង។
“យើងយល់ថា ការកាត់បន្ថយភាពតានតឹងនៅតំបន់សមុទ្រចិនខាងត្បូង ពិតជាផលប្រយោជន៍រួមរបស់ប្រទេសចិននិងប្រទេសនៃសមាគមប្រជាជាតិអាស៊ី-អាគ្នេយ៍ Asean ក្នុងការបង្កើតឲ្យមាន “អភិក្រមការទូត” ដើម្បីឈានទៅរក “ក្រមប្រតិបត្តិ” code de bonne conduite ។ នេះជាសេចក្តីប្រកាសរបស់លោកស្រីប្រមុខការទូតអាមេរិក។
គួរកត់សម្គាល់ថា ក្នុងរយៈកាលដែលលោកស្រីគ្លីនតុនបានត្រូវទទួលដោយលោកប្រធានាធិបតីចិន ហ៊ូ ជិនតាវ សារព័ត៌មានផ្លូវការចិនឯណោះបែរជាសរសេរថា “ទស្សនកិច្ចរបស់លោកស្រីប្រមុខការទូតអាមេរិក ឋិតនៅក្នុងបរិបទនៃការប្រឈមមុខដាក់គ្នារវាងទីក្រុងប៉េកាំងនិងទីក្រុងវ៉ាស៊ីនតោន”។
ហើយជំនួបសន្ទនារវាងលោកស្រីរដ្ឋមន្ត្រីក្រសួងការបរទេសអាមេរិកជាមួយលោកអនុប្រធានាធិបតី Xi Jinping ដែលត្រូវឡើងមកតស្នងតំណែងពីលោកប្រធានាធិបតី ហ៊ូ ជិនតាវ ក៏បានត្រូវភាគីចិនលុបចោល។ អ្នកទទួលខុសត្រូវអាមេរិកពុំបានថ្លែងបញ្ជាក់ប្រាប់ពី “មូលហេតុ” នៃការលុបចោលនូវជំនួបសន្ទនារវាងលោកអនុប្រធានាធិបតី Xi Jinping និងលោកស្រីប្រមុខការទូតអាមេរិក ហ៊ីលឡារី គ្លីនតុនឡើយ។ ក៏ប៉ុន្តែ ជាញឹកញយនៅពេលដែលទំនាក់ទំនងរវាងគូភាគីទាំងពីរ មានកង្វះទំនុកចិត្តកក់ក្តៅម្តងៗ ទីក្រុងប៉េកាំងតែងតែមានឥរិយាបថបែបនេះ។
ទោះជាយ៉ាងណាក៏ដោយ ក៏លោកប្រធានាធិបតី ហ៊ូ ជិនតាវ បានថ្លែងសរសើរពីការខិតខំរបស់លោកស្រីគ្លីនតុនក្នុងការជួយជំរុញឲ្យទំនាក់ទំនងចិន-អាមេរិកមានការជឿនលឿនទៅមុខ។
រីឯលោកស្រីប្រមុខការទូតអាមេរិកវិញបានថ្លែងរំលឹកថា ជំនួបសន្ទនារវាងលោកប្រធានាធិបតីចិននិងលោកប្រមុខរដ្ឋអាមេរិកដែលមានដល់ទៅ១២លើកតែងឈរនៅលើ “មូលដ្ឋានមួយដ៏រឹងមាំ”។
ដូច្នេះឃើញថា សេចក្តីថ្លែងការណ៍របស់លោកស្រីគ្លីនតុនមានលក្ខណៈខុសផ្ទុយពី “ទិនានុប្បវត្តិប្រជាជន” ដែលជាសារព័ត៌មានផ្លូវការរបស់បក្សកុម្មុនិស្តចិនដែលបានធ្វើការព្រមានទីក្រុងវ៉ាស៊ីនតោនថា កុំឲ្យមានសកម្មភាពធ្វើឲ្យប៉ះពាល់ដល់ “ផលប្រយោជន៍មូលដ្ឋាន” របស់ប្រទេសចិន ហើយនិងកុំឲ្យសហរដ្ឋអាមេរិកមានគំនិតផ្តួចផ្តើមធ្វើការបំបែកបំបាក់ប្រទេសមួយចំនួនក្នុងតំបន់។
គួរបញ្ជាក់ថា ទីក្រុងប៉េកាំងប្រកាសទាមទារដែនសមុទ្រទាំងមូលនៅតំបន់សមុទ្រចិនខាងត្បូងថា ឋិតនៅក្រោមអធិបតេយ្យរបស់ខ្លួន។ ក៏ដូចគ្នាអ៊ីចឹងដែរសម្រាប់តំបន់ឋិតនៅជិតឆ្នេរសមុទ្រនៃប្រទេសដូចជាប្រទេសវៀតណាម ហ្វីលីពីន ម៉ាឡេស៊ី ឬព្រុយណេ។ អធិករណ៍នៅក្នុងតំបន់សមុទ្រចិនខាងត្បូងនេះអាចបង្កឲ្យមានផលវិបាកយ៉ាងសែនធ្ងន់ធ្ងរដល់ពាណិជ្ជកម្មពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ