អាមេរិកនិងអ.ស.ប.មានសុទិដ្ឋិនិយមចំពោះកំណែទម្រង់នយោបាយនៅភូមា
កាលពីថ្ងៃសុក្រ ៤ វិច្ឆិកា ២០១១ ម្សិលមិញនេះ ក្រោយពីបានបញ្ចប់ដំណើរទស្សនកិច្ចរយៈពេល ៥ថ្ងៃ នៅភូមា មន្រ្តីជាន់ខ្ពស់របស់សហរដ្ឋអាមេរិក និងអ.ស.ប. បានបង្ហាញនូវសុទិដ្ឋិនិយមចំពោះការធ្វើកំណែទម្រង់នយោបាយ នៅភូមា។ រដ្ឋាភិបាលអាមេរិកកំពុងធ្វើការពិចារណាអំពីវិធានការមួយចំនួន ដើម្បីឆ្លើយតបនឹងសញ្ញាវិជ្ជមាននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ដំណើរទស្សនកិច្ចនៅភូមា របស់មន្រ្តីជាន់ខ្ពស់មកពីអាមេរិក និងអ.ស.ប. បានធ្វើឡើង នៅក្នុងពេលព្រមៗគ្នា។ ទីប្រឹក្សាពិសេសរបស់អគ្គលេខាធិការអ.ស.ប. បានទៅដល់ភូមា កាលពីថ្ងៃចន្ទ។ ប្រេសិតពិសេសរបស់លោកអូបាម៉ា ទទួលបន្ទុកកិច្ចការភូមា អមដំណើរដោយអនុរដ្ឋមន្រ្តីការបរទេសអាមេរិកទទួលបន្ទុកកិច្ចការសិទ្ធិមនុស្ស បានទៅដល់ភូមានៅថ្ងៃអង្គារ។ ដំណើរទស្សនកិច្ចទាំងពីរនេះបានបញ្ចប់ទៅ ក្នុងថ្ងៃជាមួយគ្នា ជាមួយនឹងសេចក្តីសន្និដ្ឋានស្រដៀងគ្នា គឺសញ្ញាវិជ្ជមាន ក្នុងកំណែទម្រង់នយោបាយ នៅភូមា។
លោកអនុរដ្ឋមន្រ្តីការបរទេសអាមេរិកបានថ្លែងថា ថ្វីដ្បិតតែលោកមានការបារម្ភចំពោះស្ថានភាពជនជាតិភាគតិច និងអ្នកទោសនយោបាយភូមា ក៏ប៉ុន្តែ លោកទទួលស្គាល់ថា កំណែទម្រង់របស់អាជ្ញាធរស៊ីវិលភូមាពិតជាមានភាពជឿនលឿនទៅមុខ គួរឲ្យមានក្តីសង្ឃឹម។
ចំណែកទីប្រឹក្សាពិសេសរបស់លោកបាន គីមូន វិញ បានកោតសរសើរចំពោះកិច្ចខិតខំប្រឹងប្រែងរបស់រដ្ឋាភិបាលស៊ីវិលភូមា ក្នុងការផ្សះផ្សាជាតិ ហើយបានបង្ហាញនូវសុទិដ្ឋិនិយមថា ប្រសិនបើរដ្ឋាភិបាលភូមាបន្តធ្វើតទៅទៀត កំណែទម្រង់នេះនឹងជាឱកាសជាប្រវត្តិសាស្រ្តមួយ សម្រាប់ប្រជាជនភូមា។
ជាជំហានវិជ្ជមានដ៏គួរឲ្យកត់សម្គាល់បំផុត គឺ កាលពីថ្ងៃសុក្រម្សិលមិញ ប្រធានាធិបតីភូមាបានយល់ព្រមឲ្យមានការកែប្រែច្បាប់បោះឆ្នោត ដើម្បីបើកផ្លូវឲ្យលោកស្រីអ៊ុង សាន ស៊ូជី អាចចូលប្រឡូកក្នុងឆាកនយោបាយវិញ។ ការហាមឃាត់អតីតអ្នកទោសមិនឲ្យចូលរួមក្នុងគណបក្សនយោបាយ លែងមានចែងទៀតហើយ នៅក្នុងច្បាប់បោះឆ្នោតថ្មីនេះ។
ប្រសិតពិសេសរបស់លោកអូបាម៉ា ទទួលបន្ទុកកិច្ចការភូមា បានឲ្យដឹងថា រដ្ឋាភិបាលអាមេរិកនឹងធ្វើការពិចារណាអំពីការបង្កើនគម្រោងជំនួយអភិវឌ្ឍន៍នៅភូមា ដើម្បីលើកទឹកចិត្ត និងជំរុញការធ្វើកំណែទម្រង់បន្តទៅទៀត។ អាមេរិកកំពុងពិចារណាជាពិសេសទៅលើគម្រោងពង្រីកកម្មវិធីមីក្រូហិរញ្ញវត្ថុរបស់ទីភ្នាក់ងារ USAID ដើម្បីផ្តល់ដើមទុនដល់កសិករភូមា។ ចំពោះទណ្ឌកម្ម ដែលអាមេរិកកំពុងដាក់លើភូមាវិញ រដ្ឋាភិបាលរបស់លោកអូបាម៉ាមិនមានសិទ្ធិសម្រេចលុបចេញវិញបានទេ ប្រសិនបើគ្មានការអនុញ្ញាតពីសភា។
គួរបញ្ជាក់ថា ចាប់តាំងពីបានឡើងកាន់អំណាច កាលពីខែមីនាមក រដ្ឋាភិបាលស៊ីវិលភូមាបានព្យាយាមបង្ហាញនូវសកម្មភាពជាច្រើន ដើម្បីចង់បង្ហាញឲ្យសហគមន៍អន្តរជាតិឃើញថា របបដឹកនាំថ្មីនៅភូមាខុសពីរបបយោធា ដែលកាន់អំណាចរយៈពេលជាង ២០ឆ្នាំកន្លងទៅនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ