តំណាងជាន់ខ្ពស់អង្គការសហប្រជាជាតិអញ្ជើញទៅកាន់ភូមាជាថ្មី
តាំងពីរដ្ឋាភិបាលថ្មីស៊ីវិលភូមា បានបន្ទន់កាយវិការបើកទ្វារចំហទទួលសហគមន៍អន្តរជាតិមក ទស្សនកិច្ចការទូត ជាន់ខ្ពស់ ទៅកាន់ប្រទេសនេះ មានកាន់តែច្រើនឡើងៗ។ ជាក់ស្តែង អ្នកទទួលខុសត្រូវជាន់ខ្ពស់ម្នាក់របស់អង្គការសហប្រជាជាតិ ទើបបានអញ្ជើញទៅដល់ក្រុងរ៉ង់ហ្គូន នៅថ្ងៃចន្ទទី ៣១តុលានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៨
ក្នុងអំឡុងពេលទស្សនកិច្ច៥ថ្ងៃ លោកVijay Nambiar នាយខុទ្ទកាល័យរបស់អគ្គលេខាធិការអង្គការសហប្រជាជាតិ នឹងត្រូវជួបពិភាក្សាជាមួយនឹងអនុប្រធានាធិបតី និងជាមួយរដ្ឋមន្ត្រីភូមាជាច្រើននាក់។ បន្ទាប់មកលោកក៏នឹងត្រូវជួបសន្ទនាជាមួយតំណាងបក្សប្រឆាំងដ៏ល្បីឈ្មោះ លោកស្រី អ៊ុង សានស៊ូជី ដូចដំណើរទស្សនកិច្ចលើកមុនដែរ។
ម្យ៉ាងវិញទៀត ដំណើរទស្សនកិច្ចរបស់តំណាងអង្គការសហប្រជាជាតិលើកនេះ ប្រព្រឹត្តទៅជួនចំពេលដែលអ្នកទទួលខុសត្រូវជាន់ខ្ពស់អាមេរិកពីររូប ត្រូវមកបំពេញទស្សនកិច្ចនៅក្នុងប្រទេសនេះដែរ។ អនុរដ្ឋលេខាធិការអាមេរិកទទួលបន្ទុកសិទ្ធិមនុស្ស និងអន្តរការីអាមេរិកទទួលបន្ទុកកិច្ចការភូមា នឹងមកដល់ភូមានៅថ្ងៃស្អែក សម្រាប់ទស្សនកិច្ចរយៈពេល៤ថ្ងៃ។ ក្នុងរយៈពេលតែពីរខែប៉ុណ្ណោះ តំណាងអាមេរិកបានធ្វើដំណើរមកភូមាដល់ទៅពីរលើក។
តាំងពីភូមាមានរដ្ឋាភិបាលថ្មីស៊ីវិល នាខែមីនាឆ្នាំ ២០១១មក សហរដ្ឋអាមេរិក និងអង្គការសហប្រជាជាតិ បានសម្តែងការអបអរស្វាគមន៍ការប្រែប្រួលជាវិជ្ជមាន និងជានិមិត្តរូបមួយចំនួន ខុសប្លែកពីរបបមុន ដែលដឹកនាំដោយយោធាផ្តាច់ការ រយៈពេលជាង២០ឆ្នាំ។ ប៉ុន្តែអង្គការសហប្រជាជាតិ និងអាមេរិក នៅតែទាមទារឲ្យភូមាបន្តធ្វើកំណែទម្រង់នយោបាយឲ្យបានស៊ីជម្រៅ និងដោះលែងអ្នកទោសនយោបាយទាំងអស់ឲ្យមានសេរីភាពវិញ។
កាលពីពាក់កណ្តាលខែតុលាថ្មីៗនេះ អ្នកទោសនយោបាយប្រមាណ២០០នាក់ ក្នុងចំណោម២ពាន់នាក់ បានត្រូវដោះលែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ