បេសកជនពិសេសអាមេរិកាំងDerek Mitchell ជួបសន្ទនាជាមួយរដ្ឋមន្រ្តីភូមា
លោក Derek Mitchell បេសកជនពិសេសអាមេរិកាំងទីមួយ ទទួលបន្ទុកកិច្ចចរចាជាមួយភូមា បានផ្តើមទស្សនកិច្ចនៅ Naypydaw រដ្ឋធានីនយោបាយរបស់ភូមានៅថ្ងៃសុក្រ៩កញ្ញាម្សិលមិញ។ ទស្សនកិច្ចនេះ ក៏ជាសក្ខីភាពបញ្ជាក់ពីអំពីចេតនាជាថ្មីម្តងទៀតរបស់ទីក្រុងវ៉ាស៊ីនតោន ក្នុងការជំរុញឲ្យរដ្ឋាភិបាលថ្មីភូមា ធ្វើកំណែទម្រង់ពិតប្រាកដនៅក្នុងប្រទេស។ លោក Derek Mitchell ដែលត្រូវបានលោកប្រធានាធិបតី បារ៉ាកអូបាម៉ា តែងតាំង នាពេលថ្មីៗនេះ បានជួបប្រាស្រ័យ ជាមួយរដ្ឋមន្រ្តីក្រសួងការបរទេស លោក Wunna Maung Lwin និងក៏ត្រូវជួបសន្ទនាជាមួយបណ្តាឥស្សរជននានានៃសភាភូមាផងដែរដែល បច្ចុប្បន្នកំពុងរួមប្រជុំការងារធម្មតា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
លោក Derek Mitchell ដែល ជាឥស្សរជននយោបាយមួយរូប ស្គាល់ច្បាស់អំពីស្ថានភាពតំបន់ អាស៊ី ត្រូវ អញ្ជើញមកកាន់ទីក្រុងរ៉ង់ហ្គូនវិញនៅថ្ងៃសៅរ៍១០កញ្ញានេះវិញ ហើយបន្ទាប់មកទៀត លោកនឹងត្រូវជួបសន្ទនាជាមួយអ្នកទទួលខុសត្រូវសំខាន់ៗនៃគណបក្សប្រឆាំងភូមានិងជាមួយលោកស្រី អ៊ុងសានស៊ូជី ជ័យលាភីរង្វាន់ណូបែលសន្តិភាព នៅថ្ងៃចន្ទទី១២កញ្ញាខាងមុខ។
គួររំលឹកថា នៅខែមិថុនាកន្លងផុតទៅនេះ លោក Derek Mitchell ធ្លាប់បានគូសបញ្ជាក់ប្រាប់ដែរថា « លោកមានចេតនា លើកស្ទួយដល់ការចរចាគ្នាមួយដែលមានលក្ខណៈស្មោះសរនិងដោយផ្ទាល់ »ជាមួយរដ្ឋាភិបាលថ្មីភូមាដែលទើបបានគ្រប់គ្រងប្រទេសបន្តពីរបបសឹក ចាប់តាំងពី រដូវផ្ការីកមក។ រដ្ឋាភិបាលថ្មី ដែលមានសមាសភាព សុទ្ធតែជាអតីតនាយទាហាន នៅតែស្ថិតនៅក្រោមការត្រួតត្រារបស់កងទ័ពដដែល។
មួយវិញទៀត ដំណើរទស្សនកិច្ចរបស់បេសកជនពិសេសអាមេរិកាំងនៅភូមានាពេលនេះ គឺស្ថិតនៅក្នុងក្របខ័ណ្ឌនយោបាយនៃរដ្ឋាភិបាលលោកអូបាម៉ា ដែលមានគោលដៅ ជួយជំរុញឲ្យភូមាធ្វើកំណែទម្រង់ឲ្យបានពិតប្រាកដ រកការផ្សះផ្សាជាតិនិងអភិវឌ្ឍន៍ប្រទេស។
លោក Derek Mitchell នឹងត្រូវ ជួបសន្ទនាផងដែរ ជាមួយអ្នកទទួលខុសត្រូវនៃគណបក្សប្រឆាំងនានា ដែលក្នុងចំណោមនោះ ក៏មានសមាជិកនៃ គណបក្ស « កម្លាំងប្រជាធិបតេយ្យជាតិ(NDF) »ដែរ ដែលបានបំបែកខ្លួនចេញពីគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រីអ៊ុងសានស៊ូជីនៅឆ្នាំ២០១០ ក្នុងគោលដៅដើម្បីចូលរួមបោះឆ្នោត។
ម្យ៉ាងទៀត« ទស្សនកិច្ច របស់លោក Derek Mitchell នាពេលនេះ គឺគ្រាន់តែជា បេសកកម្មសាមញ្ញមួយ ដើម្បីជាព័ត៌មានប៉ុណ្ណោះ»នេះជាការអះអាងរបស់ លោក Khin Maung Swe ប្រធាននៃគណបក្ស កម្លាំងប្រជាធិបតេយ្យជាតិNDF ដែល រំពឹងទុកថា នឹងបានជួបសន្ទនាជាមួយបេសកជនពិសេសអាមេរិកាំងនេះ ស្តីអំពីជំហររបស់ទីក្រុងវ៉ាស៊ីនតោន ចំពោះការដាក់ទណ្ឌកម្មសេដ្ឋកិច្ចទៅលើរបបភូមា ។
យ៉ាងណាក៏ដោយ សហរដ្ឋអាមេរិក នៅតែមិនទាន់ប្តូរជំហរនយោបាយរបស់ខ្លួននៅឡើយទេ នៅចំពោះមុខ របបថ្មីភូមា បើទោះបីជារដ្ឋាភិបាលស៊ីវិលនេះ ខិតខំ លុបលាងជម្រះចេញឲ្យអស់ ពីមុខមាត់និងកេរ្តិ៍ឈ្មោះអសោចិ៍ទាំងប៉ុន្មានរបស់ខ្លួននៅលើឆាកអន្តរជាតិក្តីពីព្រោះ សហរដ្ឋអាមេរិកនៅតែបន្តដាក់ទណ្ឌកម្មសេដ្ឋកិច្ចថែមទៀតទៅលើភូមា។ ជាជម្រើសមួយ ដែលយល់ព្រមព្រៀងពីសំណាក់លោកស្រីស៊ូជីដែរ ក៏ប៉ុន្តែ ការដាក់ទណ្ឌកម្មរបស់អាមេរិកាំងនេះ បង្កបំផុសឲ្យមានការពិភាក្សាគ្នាយ៉ាងច្រើន នៅក្នុងរង្វង់នៃ គណបក្សប្រឆាំងភូមាផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ