បេសកជនពិសេសថ្មីអាមេរិកាំង ផ្តើមដំណើរទស្សនកិច្ចលើកទីមួយនៅភូមា
លោក Derek Mitchell បេសកជនពិសេសអាមេរិកាំងទីមួយ ទទួលបន្ទុកកិច្ចចរចាជាមួយរបបភូមា ត្រូវផ្តើមដំណើរទស្សនកិច្ចលើកដំបូងរបស់ខ្លួននៅក្នុង ប្រទេសភូមា។ ជាអ្នកជំនាញម្នាក់ផ្នែកតំបន់អាស៊ី លោក Derek Mitchell ដែល មានបំណងជួបប្រាស្រ័យជាមួយអ្នកតំណាងទាំងមូលនៃសង្គម ភូមា ជាអាទិ៍ អ្នកទទួលខុសត្រូវរបស់រដ្ឋាភិបាល សមាជិកនៃគណបក្សនយោបាយនិងអ្នកទទួលខុសត្រូវក្នុងតំបន់នៃ ក្រុមអង្គការសង្គមស៊ីវិល។ នេះជាការជូនដំណឹងរបស់ក្រសួងការបរទេសអាមេរិកនៅថ្ងៃ អង្គារ៦កញ្ញា២០១១ម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ដំណើរទស្សនកិច្ចរបស់លោក Derek Mitchell នៅភូមា ដែលត្រូវប្រព្រឹត្តនៅក្នុងក្របខ័ណ្ឌនយោបាយនៃរដ្ឋការលោក អូបាម៉ា មានគោលដៅដើម្បីរក កិច្ចចរចាជាថ្មីឡើងវិញជាមួយប្រទេសភូមា និងក៏ដើម្បីជួយជំរុញប្រទេសនេះ នៅក្នុងការធ្វើកំណែទម្រង់ពិតប្រាកដ- ការផ្សះផ្សាជាតិនិងអភិវឌ្ឍន៍ប្រទេស។
បន្ទាប់ពីបានទទួលការយល់ព្រមពីសំណាក់ព្រឹទ្ធសភាអាមេរិកនៅខែមិថុនាកន្លងមក លោក Derek Mitchell អ្នកការទូតប្រកបដោយបទពិសោធន៍នេះ បានសន្យាថា លោក នឹងខិតខំស្វែងរកកិច្ចចរចាមួយដែលប្រកបដោយលក្ខណៈ « ស្មោះសរនិងដោយផ្ទាល់ជាមួយថ្នាក់ដឹកនាំភូមា »។ បេសកជនពិសេសអាមេរិកាំង ថែមទាំងវាយតម្លៃទៀតថា « សហរដ្ឋអាមេរិកត្រូវតែបញ្ចេញប្រតិកម្ម ឲ្យសមស្របទៅតាមកាលៈទេសៈនិងចេះច្បិចយកដោយរហ័សរហួននៅពេលដែលឱកាសល្អហុចឲ្យ »។
គួររំលឹកថា សហរដ្ឋអាមេរិកធ្លាប់មានទំនាក់ទំនងតានតឹងយ៉ាងខ្លាំង ជាមួយ របបសឹកភូមា ដោយសារតែ របបសឹកនេះ បានដាក់គំនាប ជាពិសេស ទៅលើ លោកស្រី អ៊ុងសានស៊ូជីប្រធាននៃគណបក្សប្រឆាំងភូមា។ លោកស្រីស៊ូជី ដែលទើបត្រូវបានរបបសឹកដោះលែង ពីការឃុំឃាំងនៅក្នុងលំនៅដ្ឋានកាលពីខែវិច្ឆិកាឆ្នាំ២០១០ គឺនៅក្រោយ ការបោះឆ្នោតនៅក្នុងប្រទេសជាងមួយសប្តាហ៍ ប៉ុណ្ណោះ ។ ការបោះឆ្នោត ដែល សហគមន៍អន្តរជាតិ មួយភាគធំវាយតម្លៃថា « ជាការបោះឆ្នោត ដើម្បី បំភាន់ភ្នែកសាធារណជនតែប៉ុណ្ណោះ »។
ក៏ប៉ុន្តែ រដ្ឋាភិបាលស៊ីវិលភូមា ដែលទើបប្រសូតចេញពីការបោះឆ្នោតនោះ បានប្តូរជំហរនយោបាយរបស់ខ្លួន ដោយបានហុចដៃទៅរកលោកស្រីស៊ូជី និងជួបប្រាស្រ័យជាមួយគ្នាក៏ព្រមទាំង បើកសិទ្ធិសេរីភាពឲ្យប្រធាននៃបក្សប្រឆាំងភូមាដ៏ល្បីនេះ ចេញធ្វើដំណើរនយោបាយនៅក្រៅទីក្រុងរង់ហ្គូនដោយគ្មានឧបស័គ្គ។ ជំហរថ្មីនៃរបបភូមាស៊ីវិលនេះ គឺ ដើម្បីខិតខំ ជម្រះចេញឲ្យអស់ មុខមាត់និងកេរ្តិ៍ឈ្មោះមិនល្អរបស់ខ្លួននៅលើឆាកអន្តរជាតិ។
មួយវិញទៀត យោងតាម ប្រភពផ្លូវការភូមាដែលជូនដំណឹងនៅថ្ងៃអង្គារម្សិលមិញ បានឲ្យដឹងថា »ប្រទេសភូមានឹងរៀបចំចាត់តាំងគណៈកម្មការជាតិមួយ ស្តីពីបញ្ហាសិទ្ធិមនុស្សដើម្បីឆ្លើយតបទៅនឹងសំណើរបស់ លោក Tomas Quiintana អ្នករាយការណ៍ ពិសេសម្នាក់របស់ អសបជទទួលបន្ទុកសិទ្ធិមនុស្សនៅភូមាដែលទើបបញ្ចប់បេសកកម្មការងាររបស់លោកនៅភូមាជិតពីរសប្តាហ៍មកហើយ។ លោក Tomas Quintana ដែលវាយតម្លៃថា បញ្ហារំលោភសិទ្ធិមនុស្សនៅភូមា នៅតែមានលក្ខណៈធ្ងន់ធ្ងរដដែល ទោះបី ជារបបសឹកភូមា បានរំលាយខ្លួនចោលនៅរដូវផ្ការីកក្តី។ គណៈកម្មការជាតិភូមានេះ នឹងអាចមានសមាសភាពចំនួន ១៥រូប ដែលជាអតីតឯកអគ្គរដ្ឋទូត អ្នកទទួលខុសត្រូវក្នុងរដ្ឋាភិបាលនិងអ្នកវិទ្យាសាស្រ្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ