បេសកជនអសប៖ នឹងមានការសម្លាប់រង្គាល បើសិនក្រុមជីហាតវាយយកបានកូបាណេ
ចាប់តាំងពីថ្ងៃសុក្រ រហូតដល់ព្រលឹមថ្ងៃសៅរ៍ទី ១១តុលា ពួកជីហាតនៃអង្គការរដ្ឋអ៊ីស្លាមបានពង្រឹងវត្តមាន លើទីតាំងដែលពួកគេវាយដណ្តើមយកបានពីក្រុមយុទ្ធជនគួក ក្នុងក្រុងកូបាណេ។ កាលពីថ្ងៃសុក្រ ក្រុមជីហាតទើបវាយបណ្តេញក្រុមគួដ និងដណ្តើមគ្រប់គ្រងទីស្នាក់ការកណ្តាលរបស់ក្រុមគួដ ក្នុងទីក្រុងកូបាណេ។ បេសកជនពិសេសរបស់អង្គការសហប្រជាជាតិ សម្រាប់ប្រទេសស៊ីរីបានព្រមានរួចហើយពីអំពើកាប់សម្លាប់រង្គាល ក្នុងករណីពួកជីហាតនៃអង្គការរដ្ឋអ៊ីស្លាមវាយដណ្តើមយកបានទីក្រុងកូបាណេទាំងមូល។
ចុះផ្សាយនៅថ្ងៃ៖
ស្តាប់ - ០២:២៤
ទីក្រុងកូបាណេរបស់ស៊ីរីកំពុងស្ថិតនៅក្បែរជ្រោះមរណៈ។ នៅមួយថ្ងៃក្រោយក្រុមជីហាតនៃអង្គការរដ្ឋអ៊ីស្លាមវាយដណ្តើមយកបានទីស្នាក់ការកណ្តាលរបស់ខ្លួន ក្រុមគួដ ដែលជាម្ចាស់ទីក្រុងកូបាណេ នៅបន្តប្រយុទ្ធយ៉ាងស្វិតស្វាញ ដើម្បីការពារទីប្រជុំជនទីតាំងចុងក្រោយ ដែលមិនទាន់ធ្លាក់ទៅក្នុងដៃរបស់ក្រុមជីហាត។
កាលពីថ្ងៃម្សិលមិញ ប្រតិបត្តិការទ័ពអាកាសរបស់សម្ព័ន្ធអន្តរជាតិបានបន្ទុចបង្អាក់ដំណើររុលទៅមុខរបស់ក្រុមជីហាត ដែលពេលនេះ បានឡោមព័ទ្ធ ក្រុងកូបាណេ ស្ទើរទាំងស្រុង។ បន្ទាប់ពីវាយយកបានទីស្នាក់កណ្តាលរបស់កងទ័ពគួកស៊ីរី ដែលស្ថិតនៅភាគខាងជើងក្រុងកូបាណេ ក្រុមជីហាតមានបំណងឈានទៅគ្រប់គ្រងទាំងស្រុងតំបន់តាមបណ្តោយព្រំដែនតួកគី និងស៊ីរី។
ប្រេសិតរបស់អង្គការសហប្រជាជាតិ សម្រាប់ប្រទេសស៊ីរីបានព្រមានរួចពីអំពើកាប់សម្លាប់រង្គាល បើសិនក្រុមជីហាតចូលកាន់កាប់ក្រុងកូបាណេ ព្រោះថា មានមនុស្សជាង៥០០នាក់ដែលភាគច្រើនជាមនុស្សចាស់ និងកុមារ កំពុងរស់នៅនៅទីក្រុងនេះ។ បេសកជនពិសេសរបស់អង្គការសហប្រជាជាតិ លោក Staffan De Mistura បានអំពាវនាវផងដែរឲ្យរដ្ឋាភិបាលតួកគីបើកព្រំដែនទទួលជនភៀសខ្លួន ដែលគេចខ្លួនពីសង្រ្គាមនៅកូបាណេ និងសុំឲ្យតួកគីបើកផ្លូវអនុញ្ញាតឲ្យអ្នកស្ម័គ្រចិត្ត ជនជាតិគួដ ដែលរស់នៅក្នុងទឹកដីតួកគី ឲ្យចូលទៅជួយប្រយុទ្ធជាមួយក្រុមគួដ ប្រឆាំងនឹងក្រុមជីហាត។
រដ្ឋាភិបាលតួកគីដែលរហូតមកដល់ពេលនេះកំពុងរងការរិះគន់ពីជនជាតិគួក ក្នុងតួកគី ពីភាពស្ពឹកស្រពន់របស់ខ្លួន បានបដិសេធរួចហើយ មិនបើកផ្លូវអនុញ្ញាតឲ្យជនជាតិគួក ចេញពីតួកគីដើម្បីចូលទៅប្រយុទ្ធដើម្បីការពារក្រុងកូបាណេទេ។ ទីក្រុងអង់ការ៉ា ចាត់ទុកការបញ្ជូនប្រជាជនស៊ីវិលឲ្យទៅប្រយុទ្ធនៅ ស៊ីរី គឺជារឿងឧក្រិដ្ឋកម្ម។ កាលពីថ្ងៃសុក្រ សហរដ្ឋអាមេរិកបានដាក់សម្ពាធលើរដ្ឋាភិបាលតួកគី ដោយបង្ខំឲ្យតួកគី ក្នុងនាមប្រទេសដែលមានព្រំដែនជាប់នឹងស៊ីរី ឲ្យចូលរួមឲ្យបានច្រើន ដើម្បី ប្រយុទ្ធប្រឆាំងនឹងក្រុមជីហាត។ តាមទីក្រុងវ៉ាស៊ីនតោន អង់ការ៉ាបានយល់ព្រមគាំទ្រសកម្មភាព បណ្តុះបណ្តាល និងផ្តល់សព្វាវុធដល់ក្រុមប្រឆាំងដែលមិនសូវជ្រុលនិយម ដែលរហូតមកដល់ពេលនេះកំពុងប្រយុទ្ធប្រឆាំងនឹងរបបលោកបាស្ហា អាល់ អាសាដផង និងក្រុមជីហាតនៃអង្គការដ្ឋអ៊ីស្លាមផង។ ដើម្បីចូលរួមក្នុងប្រតិបត្តិការរបស់សម្ព័ន្ធអន្តរជាតិ រដ្ឋាភិបាលតួកគីវិញ បានដាក់លក្ខខណ្ឌទាមទារឲ្យគេបង្កើតតំបន់ការពារពិសេស នៅតាមព្រំដែនស៊ីរី និងតួកគីដើម្បីការពារក្រុមប្រឆាំងស៊ីរី និងក្រុមជនភៀសខ្លួនស៊ីរី។ ប៉ុន្តែ វ៉ាស៊ីនតោន និងអង្គការអូតង់ បានបញ្ជាក់ថា គេនឹងមិនពិចារណាលើសំណើរបស់តួកគីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ