ឆាកប្រយុទ្ធបង្ហូរឈាមចាប់មានជាថ្មីនៅក្នុងប្រទេសស៊ីរី ជាទីដែលបាតុកម្មប្រឆាំងរដ្ឋាភិបាលកើតមានតាំងពីពាក់កណ្តាលខែមីនា ឆ្នាំ ២០១១។ តាំងពីព្រលប់ថ្ងៃសៅរ៍ ចូលដល់ថ្ងៃអាទិត្យនេះ រថក្រោះរបស់រដ្ឋាភិបាលបានបរសំដៅចូលទីក្រុងហាម៉ា ដែលជាសម្បុកជម្រករបស់ពួកប្រឆាំងសំខាន់ៗ។ កាលពីថ្ងៃសុក្រ នៅទីក្រុងហាម៉ា ប្រជាជនរាប់សែននាក់ចូលរួមធ្វើបាតុកម្ម ជួបជុំដ៏ធំមួយមិនធ្លាប់មាន។ តុល្យាការចុងក្រោយផ្តល់ដោយក្រុមសកម្មជនសិទ្ធិមនុស្សស៊ីរី បង្ហាញថា មានមនុស្សជិត ១០០នាក់ត្រូវទាហានបាញ់សម្លាប់។
ចុះផ្សាយនៅថ្ងៃ៖ កែប្រែថ្ងៃទី៖
តាមសាក្សីដែលជាគ្រូពេទ្យនៅទីក្រុងហាម៉ា រថក្រោះរបស់ទាហានរដ្ឋាភិបាលបានបរចូលគ្រប់ច្រក ទៅក្នុងទីក្រុង។ រថក្រោះបានបើកជាន់កម្ទេចរនាំងដែលប្រជាជន ដាក់បាំងឃាំង ចាប់តាំងពីប៉ុន្មានថ្ងៃមុន។ លើកនេះ រដ្ឋាភិបាលលោកBachar al Assad ហាក់ដូចជាប្តេជ្ញាចិត្តខ្លាំងក្នុងការវាយបង្រ្កាបអ្នកប្រឆាំងនឹងខ្លួន ឲ្យរាបដូចកន្ទេល ព្រោះថា បើតាមប្រជាជនដែលបាននិយាយប្រាប់កាសែតបរទេស តាមទូរស័ព្ទ រថក្រោះបញ្ជាដោយពួកទាហានបានបាញ់រះ យ៉ាងងងឹតងងល់បំផុត ដោយមិនលើកលែងជនណាម្នាក់។
មួយវិញទៀត ប្រជាជននៅបាននិយាយផងដែរពីក្រុមខ្មាន់កាំភ្លើងរដ្ឋាភិបាល ដែលចាំលួចបាញ់ឆ្មក់ អ្នកតវ៉ា តាំងពីដំបូលពន្ធនាគារ និងពីក្រុមហ៊ុនអគ្គិសនីរដ្ឋ។
វាមិនមែនជាការចៃដន្យទេដែលរដ្ឋាភិបាលស៊ីរីបើកសមរភូមិក្តៅនៅក្រុងហាម៉ា។ ទីក្រុងនេះជាសម្បុកសំខាន់របស់ក្រុមប្រឆាំង និងដែលធ្លាប់ត្រូវបង្រ្កាបខ្លាំងម្តងរួចហើយ ក្នុងសម័យប្រធានាធិបតី Hafez al Assad ដែលជាឪពុករបស់ប្រធានាធិបតីស៊ីរីបច្ចុប្បន្ន។ កាលណោះប្រធានាធិបតីបានប្រើអំណាច បញ្ជាឲ្យទាហានបាញ់សម្លាប់រាល់ជនប្រឆាំងក្នុងទីក្រុងហាម៉ា រហូតធ្វើឲ្យមានមនុស្សស្លាប់យ៉ាងហោច ៣០០០នាក់។ លើកនេះ ប្រធានាធិបតីស៊ីរី លោកBachar al Assad ទំនងជាចង់យកតាមគំរូឪពុករបស់ខ្លួន ដោយបើកការប្រយុទ្ធនៅហាម៉ាដើម្បីបិទបញ្ចប់ចលនាអ្នកប្រឆាំង។
រដ្ឋាភិបាលលោក Bachar al Assad ទំនងមិនអាចបង្រ្កាបចលនាប្រឆាំងនឹងខ្លួនឲ្យផុតសូន្យដូចដែលឪពុកខ្លួនបានធ្វើកន្លងមកទេ ព្រោះថា លើកនេះ បាតុកម្មប្រឆាំងរដ្ឋាភិបាលបានកើតមានស្ទើរគ្រប់ទីក្រុង និងត្រូវសហគមន៍អន្តរជាតិតាមដានយ៉ាងយកចិត្តទុកដាក់។ សហភាពអឺរ៉ុប និងអាមេរិកធ្លាប់វិញបានប្រកាសដាក់ទណ្ឌកម្មហិរញ្ញវត្ថុ ទៅលើថ្នាក់ដឹកនាំជាន់ខ្ពស់របស់របបលោក Bachar al Assad ។
មួយវិញទៀត ការបង្រ្កាបផុតសូន្យពិបាកនឹងធ្វើទៅបាន ដោយហេតុផលថា ប្រជាជនស៊ីរីយកគំរូតាមបដិវត្តន៍ផ្កាម្លិះ នៅទុយនីស៊ី និងបដិវត្តដ៏ជោគជ័យនៅអេហ្សីប ហើយប្រជាជនកាន់តែច្រើន នៅបន្តចេញមុខប្រឆាំងនឹងអំណាចប្រធានាធិបតីស៊ីរី បើទោះបីជាមានការបាញ់កាំភ្លើងបង្រ្កាប និងការចាប់ចងដាក់ពន្ធនាគារ។ យោងតាមក្រុមអ្នកការពារសិទ្ធិមនុស្សនៅស៊ីរី ចាប់តាំងពីបាតុកម្មកកើតជិត ៥ខែ មនុស្សជាង ១៥០០នាក់ត្រូវបាញ់សម្លាប់ ចំណែកមនុស្សជិត ៣ពាន់នាក់បាត់ខ្លួន និងជាង ២៥០០០នាក់ត្រូវចាប់ខ្លួន ពីធ្វើសកម្មភាពប្រឆាំងរដ្ឋាភិបាល៕
