អំពើហិង្សាកាន់តែឃោរឃៅឡើងនៅស៊ីរី
ជនស៊ីវិលស៊ីរីចំនួនបីរូបផ្សេងទៀត ត្រូវបានសម្លាប់កាលពីថ្ងៃចន្ទ ម្សិលមិញ ដោយកងកម្លាំងយោធារបស់រដ្ឋាភិបាលលោក Bachar el-Assad។ ហេតុការណ៍នេះបានកើតឡើងខណៈដែលមានការប្រឈមមុខដាក់គ្នារវាងកងកម្លាំងប្រដាប់អាវុធខាងលើជាមួយនឹង ក្រុមបាតុកររាប់រយនាក់ នៅទីក្រុងHama ដែលធ្វើការតវ៉ាជាច្រើនខែមកហើយ ប្រឆាំងនឹងរបបផ្តាច់ការមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ការប្រឈមមុខដាក់គ្នាសាជាថ្មីម្តងទៀតនេះគឺកើតឡើងបន្ទាប់ពីកងកម្លាំងយោធាស៊ីរីព្យាយាមបើករថក្រោះ ជាច្រើនគ្រឿងរបស់ខ្លួនរុលចូលទៅក្នុងទីក្រុងHama ក្នុងគោលបំណងគ្រប់គ្រងតំបន់នេះ។ ប្រជាជនជាច្រើនដែលមិនសប្បាយចិត្ត នឹងរបបផ្តាច់ការមួយនេះបានកែនគ្នាធ្វើជារនាំងរារាំងមិនអោយរថក្រោះ បន្តចូលទៅមុខ ជាហេតុបង្កអោយមានឈុតឆាកបង្ហូរឈាមកើតឡើង។ ក្នុងនោះក្មេងប្រុស អាយុ ១៣ឆ្នាំម្នាក់ និងបុរសវ័យជំទង់ពីររូប បានស្លាប់។
នៅយប់ថ្ងៃចន្ទ ដែលជាថ្ងៃកើតហេតុ យុវជនរាប់រយនាក់បានដុតកង់ឡានហើយបានបោះកង់ឡានទាំងនោះព្រមទាំងធុងសំរាមនិងដុំដែកទៅលើផ្លូវ។ ប្រជាជនផ្សេងទៀតបានស្រែកគាំទ្រពួកគេព្រមគា្នថា “ ព្រះអាឡាមានអំណាចធំជាងគេ”។
ស្ថិតនៅចន្លោះភាគកណ្តាលឆៀងខាងលិចប្រទេស ក្រុង Hama ដែលមានប្រជាជនប្រមាណ៦៥ម៉ឺននាក់ គឺជាទីក្រុងដែលកើតមានចលនាបះបោរប្រឆាំងនឹងរបបលោក Assad ខ្លាំងជាងគេ។ ការតវ៉ាបានចាប់ផ្តើម តាំងពីពាក់កណ្តាលខែ មីនាមក។
ប៉ុន្តែរាល់បាតុកម្មតវ៉ាទាំងឡាយ តែងតែត្រូវបានបង្រ្កាបដោយអំពើហិង្សាយ៉ាងឃោរឃៅ ដោយពេលខ្លះកងកម្លាំងប្រដាប់អាវុធចូលបាញ់រះទៅលើប្រជាជនដល់គេហដ្ឋានតែម្តង។ កន្លងមក បាតុកររាប់រយនាក់មកហើយ ត្រូវបានចាប់ឃុំខ្លួននិងរងរបួស។
លោក Assad ប្រធានាធិបតីស៊ីរីដែលមិនឈឺក្បាលអើពើ ទៅនឹងការរិៈគន់របស់សហគមន៍អន្តរជាតិបានអះអាងជាច្រើនលើកច្រើនសាថា គាត់នឹងមិនចុះចេញពីតំណែង តាមការចង់បានរបស់បាតុករជាដាច់ខាត។ ផ្ទុយទៅវិញ លោកបានបង្កើនការបង្រ្កាបទៅលើហ្វូងបាតុករដោយអត់ប្រណីដៃ។
លោក Assad ដែលកាន់សាសនាអ៊ីស្លាមនិកាយ Chiïteបានដឹកនាំប្រទេសអារ៉ាប់មួយនេះជាងដប់ឆ្នាំមកហើយ បន្ទាប់ពីឪពុករបស់លោកដែលបានកាន់តំណែងដល់ទៅជាង៧០ឆ្នាំ។ វាជារបបផ្តាច់ការមួយដែលចាក់ឬសគល់ជាយូរ ពិបាកក្នុងការគាស់រំលើង។
រីឯសហគមន៍អន្តរជាតិដែលកំពុងធ្វើប្រតិបត្តិការ ជួយប្រទេសអារ៉ាប់ផ្សេងៗដូចជា Libye, ជាដើម មិនទាន់ឃើញលូកដៃធ្វើអន្តរាគមន៍ជាក់លាក់ណាមួយក្នុងប្រទេសនេះទេ ដោយសារតែ កន្លងមកប្រទេសរុស្ស៊ី បានបោះឆ្នោតប្រឆាំងនឹងសេចក្តីសំរេចរបស់ក្រុមប្រឹក្សាសន្តិសុខ របស់អង្គការសហប្រជាជាតិក្នុងការប្រើកម្លាំងកងទ័ពក្នុងប្រទេសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ