សំណុំរឿងស៊ីរីត្រឡប់មកក្រុមប្រឹក្សាសន្តិសុខជាថ្មីទៀត
ក្រុមប្រឹក្សាសន្តិសុខនៃអ.ស.ប. នឹងធ្វើការជញ្ជឹងពិចារណាជាថ្មីទៀតនៅរសៀលថ្ងៃអង្គារ១៧មករា អំពីពង្រាងសេចក្តីសម្រចចិត្តថ្មីរបស់រុស្ស៊ីដែលសំដៅថ្កោលទោសការប្រើកម្លាំងវាយបង្ក្រាបជ្រុលហួសរបស់អាជ្ញាធរស៊ីរីទៅលើចលនាបដិវត្តន៍ប្រជាជន។ ពង្រាងរុស្ស៊ីដែលបានកែប្រែជាលើកទី៣ហើយនោះ ហាក់ដូចជាគ្មានការផ្លាស់ប្តូរខ្លឹមសារនិងជំហរពិតប្រាកដរបស់រុស្ស៊ីឡើយ-នេះបើយោងតាមការគូសបញ្ជាក់របស់ក្រុមអ្នកការទូតលោកខាងលិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
បន្ទាប់ពីរុស្ស៊ី ដាក់ជូន ពង្រាងសេចក្តីសម្រេចចិត្តរបស់ខ្លួនដល់ក្រុមប្រឹក្សាសន្តិសុខនៃអសប នៅថ្ងៃចន្ទម្សិលមិញ ស្តីពី ការថ្កោលទោសអាជ្ញាធរស៊ីរី ក្នុងការប្រើកម្លាំងវាយបង្ក្រាបជ្រុលហួសនៅក្នុងប្រទេស អ្នកនាំពាក្យម្នាក់នៃគណៈប្រតិភូអាល្លឺម៉ង់ បានគូសបញ្ជាក់ថា “ ឥឡូវនេះ ជាពេលវេលាដ៏សំខាន់បំផុត សំរាប់ក្រុមប្រឹក្សាសន្តិសុខនៃអសបដើម្បី ធ្វើការចរចាដោយមធ្យ័ត ស្តីពី “ការវាយបង្ក្រាបដ៏ហិង្សានៅក្នុងប្រទេសស៊ីរីនេះ”។
អ្នកការទូតលោកខាងលិចម្នាក់ទៀត បានគូសបញ្ជាក់ប្រាប់ទីភ្នាក់ងារព័ត៌មានបារាំង AFPដែរ ថា “អត្ថបទនៃពង្រាងថ្មី រុស្ស៊ីនេះ ពុំមានខ្លឹមសារប្រែប្រួលអ្វីថ្មីទេ គ្រាន់តែជាការប្រមូលផ្តុំអត្ថបទនៃវិសោធនកម្មទាំងឡាយ ដែលបានស្នើឡើងដោយសមាជិកដទៃទៀតនៃក្រុមប្រឹក្សាសន្តិសុខប៉ុណ្ណោះ"។ អ្នកការទូតដដែលនេះ បានបន្ថែមទៀតថា “នេះ គ្រាន់តែជាកលល្បិចរបស់រុស្ស៊ី ដើម្បីពន្យារពេលដោះស្រាយបញ្ហាស៊ីរីប៉ុណ្ណោះ- តែយ៉ាងហោចណាស់ ក៏យើងមានមូលដ្ឋានការងារច្បាស់លាស់មួយ សំរាប់ កិច្ចចរចានានាជាយថាហេតុ ប្រសិនបើ រុស្ស៊ី ពិតជាមានសុឆន្ទៈមែនទែននោះ"។
គួររំលឹកថា បន្ទាប់ពីរុស្ស៊ី និងចិន បានប្រើសិទ្ធិវេតូរបស់ខ្លួនប្រឆាំងពង្រាងសេចក្តីសម្រចចិត្តរបស់ អសប ថ្កោលទោសស៊ីរីមក ទីក្រុងម៉ូស្គូ បានដាក់ជូននៅពាក់កណ្តាលខែធ្នូ២០១១នូវពង្រាងសេចក្តីសម្រេចចិត្តមួយដែលថ្កោលទោសអំពើហិង្សាធ្វើឡើងដោយគ្រប់ភាគី គឺទាំងខាងរដ្ឋាភិបាលស៊ីរីផង និងទាំងចលនាប្រឆាំងផងដែរ។ ក៏ប៉ុន្តែលោកខាងលិច នាំគ្នាចាត់ទុកថា អត្ថបទនៃពង្រាងរបស់រុស្ស៊ីនោះ នៅ ញញើតញញើមខ្លាំងណាស់។
ទន្ទឹមនេះ អសបបានសុខចិត្តយល់ព្រមឲ្យមានការបំពាក់បំប៉នហ្វឹកហ្វឺនដល់ក្រុមអ្នកសង្កេតការណ៍នៃសម្ព័ន្ធអារ៉ាប់។ ការបំពាក់បំប៉ននេះ នឹង ធ្វើឡើងដោយបុគ្គលិក ផ្ទាល់ របស់ឧត្តមស្នងការទទួលបន្ទុកសិទ្ធិមនុស្សរបស់អសប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ