មហាបាតុកម្មទាមទារប្រែក្លាយវិបត្តិស៊ីរី ជាវិបត្តិអន្តរជាតិ
មេទ័ពនៃចលនាបះបោរស៊ីរី នៅថ្ងៃព្រហស្បតិ៍៥មករាម្សិលមិញ បានចាត់ទុកថា"បេសកកម្មរបស់ក្រុមអ្នកសង្កេតការណ៍អារ៉ាប់នៅស៊ីរី បានទទួលបរាជ័យ » ដោយហេតុតែការវាយបង្ក្រាបហិង្សា ការបំភ័យបន្លាចនិងការគំរាមសម្លុតទៅលើចលនាបដិវត្តន៍ស៊ីរីនៅតែបន្តមានឥតឈប់ឈរ និងបានអំពាវនាវរកជំនួយអន្តរាគមន៍ពីសំណាក់អសបដើម្បីខ័ណ្ឌបញ្ចប់ការបង្ហូរឈាមដាបនៅក្នុងប្រទេសនេះអស់រយៈពេលជិត១០ខែកន្លងមកហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ក្រុមសកម្មជនដើម្បីលទ្ធិប្រជាធិបតេយ្យស៊ីរី នៅថ្ងៃសុក្រ៦មករានេះ បានអំពាវនាវ ឲ្យមានមហាបាតុកម្មជាថ្មីនៅទូទាំងប្រទេស ដើម្បី ទាមទារឲ្យព្រឹត្តិការណ៍នៅស៊ីរីនេះ កា្លយទៅជា វិបត្តិមួយរបស់សហគមន៍អន្តរជាតិ នៅខណៈដែល ការវាយបង្ក្រាបយ៉ាងហិង្សារបស់ពួកយោធាស៊ីរីនៅតែបន្តឥតឈប់។ ម្សិលមិញ នៅ ក្រុង Homs ភាគកណ្តាលប្រទេសនិង Deir Ezzor ,ប៉ែកខាងកើតប្រទេស មានស្លាប់ប្រជាជនស៊ីវិលចំនួន១១នាក់ បើទោះបីជាមានវត្តមានរបស់ក្រុមអ្នកសង្កេតការណ៍អារ៉ាប់នៅលើទីកន្លែងកើតហេតុក្តី-នេះបើយោងតាមអង្គការសង្កេត សិទ្ធិមនុស្សស៊ីរី « OSDH”។
មូលហេតុនេះហើយបានជា មានមតិសាធារណៈ ធ្វើការទិតៀន យ៉ាងខ្លាំងទៅលើបេសកកម្មរបស់ក្រុមអ្នកសង្កេតការណ៍នៃសម្ព័ន្ធអារ៉ាប់ ។
មេទ័ពធំនៃពួកទាហានរត់ចោលជួរម្នាក់ បាននិយាយថា "ជាបេសកកម្មបរាជ័យ"។
ចំណែក នាយករដ្ឋមន្រ្តីនៃប្រទេស កាតារ វិញ ក៏បានទទួលស្គាល់ដែរ អំពី"កំហុសក្នុងការងាររបស់ក្រុមអ្នកសង្កេតការណ៍អារ៉ាប់ ដោយមួលហេតុពួកគេ ខ្វះបទពិសោធន៍ក្នុងមុខអាជីព។ ទន្ទឹមនេះដែរ លោកនាយករដ្ឋមន្ត្រីនៃប្រទេសកាតារ បានអំពាវនាវនៅថ្ងៃសុក្រនេះដើម្បីរកជំនួយអន្តរាគមន៍មួយពីសំណាក់អ.ស.ប.។ អ.ស.ប.ដែលបានជូនដំណឹងថា ក្រុមអ្នកជំនាញការសិទ្ធិមនុស្សរបស់ខ្លួន អាចនឹងជួយផ្តល់ការបំពាក់បំប៉នដល់ក្រុមអ្នកសង្កេតការណ៍នៃសម្ព័ន្ធអារ៉ាប់ ដើម្បីឲ្យពួកគេ មានបទពិសោធន៍នៅក្នុងបេសកកម្មត្រួតពិនិត្យ ការវាយបង្ក្រាបហិង្សានៅក្នុងប្រទេសស៊ីរី។
ម្យ៉ាងទៀត សម្ព័ន្ធអារ៉ាប់នឹងត្រូវពិភាក្សាគ្នាអំពីបញ្ហារកជំនួយ អ.ស.ប.នេះ នៅឱកាសនៃសម័យប្រជុំមួយនៅទីក្រុង គែរនៅថ្ងៃអាទិត្យ៨មករានៅចុងសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ