តុលាការកំពូល តម្កល់សេចក្តីសម្រេចផ្តន្ទាទោសលោក សម រង្ស៊ី
នៅព្រឹកថ្ងៃអង្គារនេះ លោកចៅក្រម ឃឹម ប៉ុណ្ណ ប្រធានក្រុមប្រឹក្សាជំនុំជម្រះតុលាការកំពូល ដែលមានចៅក្រម ៥ រូប បានប្រកាសសេចក្តីសម្រេច តម្កល់សាលដីកា របស់សាលាឧទ្ធរណ៍ ទុកជាបានការ ក្នុងសំណុំរឿងដកតម្រុយបង្គោលព្រំដែនកម្ពុជា-វៀតណាម លេខ ១៨៥ នៅខេត្តស្វាយរៀង។ ជាសេចក្តីសម្រេច បិទផ្លូវតវ៉ា ដែលជាការផ្តន្ទាទោសកំបាំងមុខ ដាក់ពន្ធនាគាររយៈពេលពីរឆ្នាំ លើមេបក្សប្រឆាំង លោក សមរង្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
ក្នុងពេលប្រកាសសាលដីកានៅព្រឹកមិញ លោកចៅក្រម ឃឹម ប៉ុណ្ណ ប្រធានក្រុមប្រឹក្សាជំនុំជម្រះតុលាការកំពូល បានលើកឡើងថា លោក សមរង្ស៊ី ពិតជាបានប្រព្រឹត្តបទល្មើសដោយចេតនា និងដកបំផ្លាញបង្គោលតម្រុយព្រំដែន លេខ ១៨៥ ក្នុងស្រុកចន្ទ្រា ខេត្តស្វាយរៀង កាលពីថ្ងៃទី២៥តុលា ឆ្នាំ២០០៩។ លោក សម រង្ស៊ី ក៏បានប្រើពាក្យញុះញង់ និងអុជអាល ជំរុញឲ្យមហាជនកម្ពុជា មានការរើសអើងចំពោះជាតិសាសន៍វៀតណាម លើសំណុំរឿងបោះបង្គោលព្រំដែន។
ទីបំផុតទៅ លោកចៅក្រម ឃឹម ប៉ុណ្ណ បានសម្រេចតម្កល់សាលដីកា របស់តុលាការសាលាឧទ្ធរណ៍ ទុកជាបានការ។ នោះគឺសាលាឧទ្ធរណ៍ កាលពីខែតុលា បានសម្រេច ផ្តន្ទាទោសដាក់ពន្ធនាគាររយៈពេលពីរឆ្នាំលើលោក សម រង្ស៊ី។ ចំណែកកសិករ អ្នកស្រី មាស ស្រី និងលោក ព្រំ ជា ដែលជាប់ចោទក្នុងរឿងនេះ ត្រូវរួមគ្នាជាមួយលោក សម រង្ស៊ី ដើម្បីបង់ប្រាក់សំណងសរុប ៦៣ លានរៀល។
ចំពោះសេចក្តីសម្រេចនេះ ត្រូវបានលោកមេធាវី ច័ន្ទ សុខយាង ការពារដើមបណ្តឹង ជាអភិបាលស្រុកចន្ទ្រា បានចាត់ទុកជាការត្រឹមត្រូវ និងបានផ្តល់យុត្តិធម៌ដល់អាជ្ញាធររដ្ឋាភិបាល។
ចំណែកលោកមេធាវី ជួង ជូងី ការពារក្តីឲ្យលោក សម រង្ស៊ី និងកសិករ អ្នកស្រី មាស ស្រី និងលោកព្រំជា បានចាត់ទុកថា ការសម្រេចរបស់តុលាការកំពូល ធ្វើឡើងដោយមិនត្រឹមត្រូវ ហើយជារឿងអយុត្តិធម៌ សម្រាប់មេបក្សប្រឆាំង និងកសិករទាំងពីររូប។
ជាមួយគ្នានោះ លោក ហូរ វ៉ាន់ អ្នកតំណាងរាស្ត្រគណបក្សសមរង្ស៊ី ដែលបានចូលរួមស្តាប់ការប្រកាសសាលដីកាតុលាការកំពូលនៅព្រឹកមិញ បានថ្លែងប្រាប់ក្រុមអ្នកកាសែតថា រឿងដកបង្គោលព្រំដែន ជាបញ្ហានយោបាយ គួរដោះស្រាយបញ្ហា តាមផ្លូវនយោបាយ តាមរយៈការចរចា និងលើកលែងទោស ដើម្បីផលប្រយោជន៍ប្រជាពលរដ្ឋ និងផលប្រយោជន៍ប្រទេសជាតិ ក៏ដូចជាផលប្រយោជន៍នៃការការពារបូរណភាពទឹកដី ទាំងខាងកើត និងទាំងខាងលិច។
ជាការកត់សម្គាល់ លោក សម រង្ស៊ី កាលពីថ្ងៃទី២៣ ខែកញ្ញា ឆ្នាំ២០១០ ត្រូវបានចៅក្រមតុលាការសាលាដំបូងរាជធានីភ្នំពេញ សម្រេចផ្តន្ទាទោស ដាក់ពន្ធនាគាររយៈពេល ១០ ឆ្នាំ និងពិន័យជាប្រាក់ ៦៥ លានរៀល ក្នុងសំណុំរឿងផែនទីក្លែងក្លាយ។ សំណុំរឿងថ្មីនោះ កំពុងស្ថិតនៅតុលាការសាលាឧទ្ធរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ