កម្ពុជា-វៀតណាម ពង្រឹងកិច្ចសហប្រតិបត្តិការ និងអភិវឌ្ឍន៍រវាងបណ្តាខេត្តជាប់ព្រំដែន
សមត្ថកិច្ច និងអាជ្ញាធរបណ្តាខេត្ត ជាប់ព្រំដែនប្រទេសកម្ពុជា និងវៀតណាម បានជួបប្រជុំនិយាយពីកិច្ចសហប្រតិបត្តិការ និងការអភិវឌ្ឍន៍នៅតាមបណ្តោយព្រំដែនប្រទេសទាំងពីរ។ កិច្ចប្រជុំលើកទី៦ នៅភ្នំពេញ នាថ្ងៃអង្គារនេះ ធ្វើឡើងក្រោមអធិបតីភាពរបស់លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃកម្ពុជា និងលោកឧបនាយករដ្ឋមន្ត្រី ផាំ យ៉ាឃៀម ( Pham Gia Khiem ) រដ្ឋមន្ត្រីការបរទេសវៀតណាម។
ចុះផ្សាយនៅថ្ងៃ៖ កែប្រែថ្ងៃទី៖
កិច្ចសហប្រតិបត្តិការ និងការអភិវឌ្ឍន៍រវាងបណ្តាខេត្តជាប់ព្រំដែនកម្ពុជា វៀតណាម ត្រូវធ្វើឡើងរៀងរាល់ឆ្នាំ ដោយកម្ពុជា និងវៀតណាម ឆ្លាស់វេនគ្នា ធ្វើជាម្ចាស់ផ្ទះ មួយឆ្នាំម្តង។
សហប្រធានអង្គប្រជុំលើកទី៦ នៅថ្ងៃទី៣សីហានេះ គឺខាងកម្ពុជា តំណាងដោយលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ។ ចំណែកវៀតណាម តំណាងដោយលោកឧបនាយករដ្ឋមន្ត្រី ផាំ យ៉ា ឃៀម រដ្ឋមន្ត្រីការបរទេស។ សហប្រធានទាំងពីរ បានឡើងថ្លែងបើក និងបិទអង្គប្រជុំរយៈពេលមួយថ្ងៃនេះ ដោយមានអភិបាលខេត្តជាប់ព្រំដែនកម្ពុជា-វៀតណាម ឡើងធ្វើបទអន្តរាគមន៍ជាបន្តបន្ទាប់ពីកិច្ចសហប្រតិបត្តិការរវាងខេត្តប្រទេសទាំងពីរ។ ខាងភាគីកម្ពុជា មានអាជ្ញាធរ និងអភិបាលខេត្តជាប់ព្រំដែនវៀតណាម រួមមាន ៖ ខេត្តកំពត កែប តាកែវ ស្វាយរៀង ព្រៃវែង កំពង់ចាម ក្រចេះ មណ្ឌលគិរី និងខេត្តរតនៈគិរី។
ការបង្ការទប់ស្កាត់បទល្មើស សន្តិសុខតាមបណ្តោយព្រំដែន និងកិច្ចសហប្រតិបត្តិការក្នុងវិស័យកសិកម្ម ឧស្សាហកម្ម ទេសចរណ៍ អប់រំ សុខាភិបាល វប្បធម៌ និងបទអន្តរាគមន៍ពីការបោះបង្គោលព្រំដែនរវាងប្រទេសកម្ពុជា និងវៀតណាម ត្រូវបានលើកឡើងក្នុងកិច្ចប្រជុំនោះ ជាពិសេសមន្ត្រីជាន់ខ្ពស់ប្រទេសទាំងពីរ បានលើកឡើងពីពាណិជ្ជកម្ម និងការផ្លាស់ប្តូរទំនិញឆ្លងកាត់ព្រំដែន។
ក្នុងពិធីបើកកិច្ចប្រជុំលើកទី៦ នៅព្រឹកមិញ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងលោកឧបនាយករដ្ឋមន្ត្រីវៀតណាម ផាំ យ៉ា ឃៀម ដែលជាសហប្រធាននៃកិច្ចប្រជុំ បានវាយតម្លៃខ្ពស់ ចំពោះសមិទ្ធផលប្រកបដោយផ្លែផ្កា នៃកិច្ចសហប្រតិបត្តិការ និងការអភិវឌ្ឍន៍លើគ្រប់វិស័យ រវាងបណ្តាខេត្តជាប់ព្រំដែននៃប្រទេសកម្ពុជា និងវៀតណាម ចាប់តាំងពីកិច្ចប្រជុំលើកទី១ រហូតមកដល់កិច្ចប្រជុំលើកទី៦នេះ។
លោកឧបនាយករដ្ឋមន្ត្រី ស ខេង បានលើកឡើងថា បណ្តាក្រសួង ស្ថាប័ន កងកម្លាំងមានសមត្ថកិច្ច និងអាជ្ញាធរមូលដ្ឋាននៃប្រទេសទាំងពីរ បានបង្កើនទំនាក់ទំនង និងកិច្ចសហប្រតិបត្តិការគ្នា ប្រកបដោយលទ្ធផលផ្លែផ្កាលើគ្រប់វិស័យ។ ប្រទេសទាំងពីរ បានសហការជួយគាំទ្រគ្នាទៅវិញទៅមក ក្នុងការពុះពារឆ្លងកាត់វិបត្តិកលយុគសេដ្ឋកិច្ច ហិរញ្ញវត្ថុសកល សំដៅកាត់បន្ថយនូវហានិភ័យពីឥទ្ធិពលនៃវិបត្តិនេះ។ ដោយឡែកក្នុងក្របខណ្ឌពហុភាគី និងក្របខណ្ឌតំបន់វិញ កម្ពុជា និងវៀតណាម តែងតែបានសហការគ្នាយ៉ាងជិតស្និទ ក្នុងសកម្មភាពរួមចំណែកដល់ការពង្រឹងសន្តិភាព សន្តិសុខ និងគម្រោងការនានា ដើម្បីធានាឲ្យមានកំណើនសេដ្ឋកិច្ច និងការអភិវឌ្ឍន៍សង្គម ប្រកបដោយចីរភាពក្នុងតំបន់ ក៏ដូចប្រទេសទាំងពីរ។
អំពីពាណិជ្ជកម្ម និងការផ្លាស់ប្តូរទំនិញឆ្លងកាត់ព្រំដែន ត្រូវបានលោកឧបនាយករដ្ឋមន្ត្រី ស ខេង លើកឡើងថា ទោះបីមានការធ្លាក់ចុះបន្តិច ក្នុងអំឡុងឆ្នាំ២០០៩ ដែលបណ្តាលមកពីវិបត្តិសេដ្ឋកិច្ច និងហិរញ្ញវត្ថុសកល ក៏ប៉ុន្តែក្នុងឆមាសទី១ ឆ្នាំ២០១០នេះ ទំហំនៃការផ្លាស់ប្តូរទំនិញ និងពាណិជ្ជកម្មឆ្លងកាត់ព្រំដែន មានការស្ទុះងើបឡើងវិញ គួរឲ្យមោទនភាព។
នៅឆ្នាំ២០០៩ ជញ្ជីងពាណិជ្ជកម្មរវាងកម្ពុជា និងវៀតណាម បានថយចុះ ១៨,៧៨ % បើប្រៀបធៀបនឹងឆ្នាំ២០០៨។ ក៏ប៉ុន្តែនៅឆមាសទី១ ដើមឆ្នាំ២០១០ ពាណិជ្ជកម្មរវាងកម្ពុជា និងវៀតណាម បានកើនឡើង ១២៧ % និងបានជម្រុញឲ្យទឹកប្រាក់ពាណិជ្ជកម្មរវាងប្រទេសទាំងពីរ កើនឡើងដល់ ២.០០០ លានដុល្លារ ដូចការរំពឹងទុករបស់ប្រមុខរដ្ឋាភិបាលប្រទេសទាំងពីរ។
អ្នកវិនិយោគវៀតណាម ក៏បានចុះកិច្ចព្រមព្រៀង និងកិច្ចសន្យាពាណិជ្ជកម្ម ដែលមានទឹកប្រាក់ប្រមាណ ៦.០០០ លានដុល្លារអាមេរិក ដើម្បីវិនិយោគនៅកម្ពុជា លើវិស័យកសិកម្មវិស័យអគ្គិសនី ការផលិតចំណីអាហារ ការផលិតជីរកសិកម្ម ដំណាំកៅស៊ូ និងផ្នែកសុខភាព។ រហូតមកដល់ពេលនេះ វិនិយោគវៀតណាម បានបោះទុនប្រមាណ ៩០០ លានដុល្លារ លើមុខជំនួញប្រមាណ ៦៣ គម្រោង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ