និន្នាការផ្តល់តម្លៃលើសំបកខាងក្រៅនាំសង្គមខ្មែរទៅរកគ្រោះថ្នាក់
ចុះផ្សាយនៅថ្ងៃ៖
ស្តាប់ - ០៤:០៨
នៅក្នុងសង្គមកម្ពុជាបច្ចុប្បន្ន មនុស្សហាក់នាំគ្នាឲ្យតម្លៃទៅលើរូបភាពច្រើនជាងខ្លឹមសារ។ និន្នាការនេះកើតមានគ្រប់ទីកន្លែង និងគ្រប់វិស័យ។ មិនថាក្នុងវិស័យនយោបាយ សេដ្ឋកិច្ច សង្គមកិច្ច ឬជីវិតរស់នៅប្រចាំថ្ងៃឡើយ។ ក្រុមអ្នកវិភាគសង្គមខ្មែរបានមើលឃើញថា នៅពេលដែលមនុស្សទូទៅហាក់ដូចជានាំគ្នាផ្តល់តម្លៃទៅលើតែរូបភាព តែភ្លេចគិតពីខ្លឹមសារ សង្គមអាចនឹងបាត់បង់និរន្តរភាព និងភាពរឹងមាំទៅថ្ងៃអនាគត។ នេះជាបញ្ហាសំខាន់ដែលមិនអាចមើលរំលងបាន។
សង្គមកម្ពុជាបច្ចុប្បន្នកំពុងស្គាល់ការផ្លាស់ប្តូរគួរឲ្យកត់សម្គាល់បន្ទាប់ពីបានឆ្លងផុតពីសម័យ កាលសង្គ្រាមមកកាន់សម័យសន្តិភាពវិញ។ ការលូតលាស់ និងប្រែប្រួលរបស់សង្គមកម្ពុជាបាននាំមកទាំងចំណុចវិជ្ជមាន និងអវិជ្ជមាន។ ពីសង្គមមួយដែលរស់ក្នុងរបាំងប្រពៃណីតឹងរ៉ឹងមកជាសង្គមដែលបើកទូលាយ។ ពីសង្គមមួយដែលអ្នកនយោបាយផ្តួលរំលំគ្នា ដោយប្រើអាវុធ មកជាសង្គមដែលប្រើការបោះឆ្នោត និងពីសង្គមមួយហែកហួរដោយសង្គ្រាមស៊ីវិល មកជាសង្គមសន្តិភាព។ ទាំងនេះ គឺជាការវិវឌ្ឍន៍ដែលមានលក្ខណៈជ្រាលជ្រៅ និងហាក់ដូចជាគួរឲ្យមានមោទនៈ។ ក៏ប៉ុន្តែ ការវិវឌ្ឍន៍មួយចំនួនបានឈានទៅរកទិសអវិជ្ជមានដ៏គ្រោះថ្នាក់។ ចំណុចលេចធ្លោមួយក្នុងចំណោមនោះគឺ និន្នាការនៃការផ្តល់តម្លៃលើរូបភាពខាងក្រៅច្រើនជាងខ្លឹមសារ។
ជាការពិត បម្រែបម្រួលសង្គមពីសម័យកាលមួយទៅមួយ គឺជាចលនាដែលមិនអាចទប់បាន ប៉ុន្តែ គេពិតជាអាចតម្រង់ទិសវាបានប្រសិនណាបើគេបានគិតគូរជាមុន។ នៅកម្ពុជា និន្នាការនៃការផ្តល់តម្លៃមនុស្សដោយផ្អែកលើសម្បកក្រៅ ហាក់កំពុងតែដណ្តើមទីតាំងឈរជើងកាន់តែរឹងមាំឡើងជាលំដាប់ពីមួយឆ្នាំទៅមួយឆ្នាំ។ បច្ចុប្បន្ន គេហាក់ដូចជាគោរពកោតខ្លាចមនុស្សដែលមានទ្រព្យសម្បត្តិ បុណ្យស័ក្តិដែលគេមើលឃើញភ្លាមៗជាងគុណធម៌របស់មនុស្សដែលកប់នៅក្នុងខ្លួនមិនអាចមើលឃើញភ្លាមៗ។ ទស្សនៈបែបនេះហាក់បាននិងកំពុងអូសទាញមនុស្សឲ្យរត់តាមកាន់តែច្រើនឡើង។ ជាក់ស្តែង អ្នករៀនសូត្រមួយចំនួនចង់បានសញ្ញាបត្រមកបង្អួតគេ ជាជាងការចង់បានចំណេះដឹងពិតប្រាកដ។ អ្នកមានលុយទទួលបានការគោរពទោះបីជាលុយនោះបានមកពីប្រភពណាក៏ដោយ។ ប្រហែលជារត់តាមនិន្នាការនេះ មន្ត្រីរាជការមួយចំនួនមានរថយន្តទំនើប និងផ្ទះសម្បែងតម្លៃខ្ពស់ហួសពីប្រាក់ខែរបស់ខ្លួន។
នៅក្នុងទិដ្ឋភាពនយោបាយវិញក៏ដូចគ្នា ៖ ទ្រឹស្តីប្រជាធិបតេយ្យបានរីកដុះដាលដល់គ្រប់មជ្ឈដ្ឋាន ពោលគឺមនុស្សគ្រប់គ្នាហាក់បានស្គាល់ពាក្យថាប្រជាធិបតេយ្យ ប៉ុន្តែ ថាតើគេត្រូវអនុវត្តបែបណាដើម្បីឲ្យប្រជាធិបតេយ្យប្រព្រឹត្តទៅដោយត្រឹមត្រូវតាមន័យពិតប្រាកដរបស់វា? សំណួរនេះអាចឆ្លុះបញ្ចាំងបានអំពីភាពប្រទាំងប្រទើសនៃការអនុវត្តន៍ប្រជាធិបតេយ្យនៅកម្ពុជាបច្ចុប្បន្ន។ ដោយសារតែមនុស្សហាក់ឲ្យតម្លៃទៅលើរូបភាពសំខាន់ជាងខ្លឹមសារនេះហើយ បានជា ជាញឹកញយ អ្នកនយោបាយតែងបំភ្លេចខ្លឹមសារប្រជាធិបតេយ្យដោយផ្តោតតែលើរូបភាពសំបកក្រៅ។ ទីបំផុតប្រជាពលរដ្ឋជាអ្នកវង្វេង ហើយជាញឹកញយពួកគេបានក្លាយជាអ្នកទទួលរងគ្រោះ ព្រោះភាពមិនច្បាស់លាស់របស់អ្នកនយោបាយ។
នៅក្នុងបរិបទសង្គមទូទៅវិញ ការផ្តល់តម្លៃទៅលើរូបភាពសំបកក្រៅបាននិងកំពុងធ្វើឲ្យមនុស្សកាន់តែភ្លេចសីលធម៌ និងគុណធម៌របស់មនុស្សដែលជាទូទៅគេមិនអាចមើលឃើញភ្លាមៗនោះឡើយ។ មនុស្សខ្លះមានគុណធម៌ និងចំណេះដឹងខ្ពង់ខ្ពស់ ប៉ុន្តែ គ្មានទ្រព្យសម្បត្តិហ៊ឺហាដូចគេ ក៏ត្រូវគេបំភ្លេចចោលមិនឲ្យតម្លៃ។ អ្នកអង្គុយស្រាវជ្រាវ សរសេរសៀវភៅ ច្រើនជាអ្នកដែលគ្មានទ្រព្យ ពីព្រោះតែសង្គមមិនឲ្យតម្លៃដល់ការងាររបស់ពួកគេ។
នេះជាការស្រុតចុះនៃតម្លៃសង្គមគួរឲ្យព្រួយបារម្ភ ហើយផ្នត់គំនិតនេះ ប្រសិនបើនៅតែបន្ត វានឹងធ្វើឲ្យសង្គមជួបគ្រោះថ្នាក់ទៅថ្ងៃអនាគត។ គ្រោះថ្នាក់នៅត្រង់ថា សំបកក្រៅមិនបញ្ជាក់អំពីតម្លៃពិតប្រាកដរបស់មនុស្ស ឬវត្ថុអ្វីមួយនោះឡើយ។ ការផ្តល់តម្លៃទៅលើទិដ្ឋភាពខាងក្រៅ ងាយនឹងធ្វើឲ្យមនុស្សយល់ច្រឡំនៅក្នុងការធ្វើសេចក្តីសម្រេចចិត្ត។ ម្យ៉ាងទៀត ការឲ្យតម្លៃតែទៅលើសម្ភារនិយមដែលជាគ្រឿងបន្លំភ្នែកបានធ្វើឲ្យរេចរឹលដល់ការងារជាច្រើនដែលមានប្រយោជន៍សម្រាប់សង្គម ហើយវាក៏បានធ្វើឲ្យមនុស្សជាច្រើនបាក់ទឹកចិត្ត។ក្នុងបរិបទនេះ ការផ្លាស់ប្តូរផ្នត់គំនិតនេះចេញ គឺជារឿងចាំបាច់មិនអាចមើលរំលងបានឡើយដើម្បីសង្គ្រោះសង្គមខ្មែរចេញពីគ្រោះថ្នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ