ប៉ាឡេស្ទីនពេញចិត្តដំណោះស្រាយស្នើឡើងដោយបារាំង
មហាសន្និបាតអង្គការសហប្រជាជាតិ បានចាប់ផ្តើមនៅល្ងាចថ្ងៃពុធម្សិលមិញ នាទីក្រុងញូវយ៉ក។ ប្រមុខរដ្ឋជាច្រើនបានឡើងថ្លែងសុន្ទរកថា ហើយដោយគ្មានការភ្ញាក់ផ្អើល វិបត្តិអ៊ីស្រាអ៊ែល-ប៉ាឡេស្ទីន គឺជាចំណាប់អារម្មណ៍ចម្បងតែមួយគត់ក្នុងថ្ងៃបើកមហាសន្និបាតនេះ។ ប្រទេសមួយចំនួន បានប្រកាសគាំទ្រប៉ាឡេស្ទីន ដែលនឹងដាក់ពាក្យសុំក្លាយជារដ្ឋសមាជិកអង្គការសហប្រជាជាតិ នៅថ្ងៃសុក្រស្អែក។ អាមេរិករក្សាជំហរប្រឆាំងដាច់ខាត។ ឯចំណែកបារាំងបានស្នើដំណោះស្រាយ ដោយដើរផ្លូវកណ្តាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ត្រូវទម្លាយវិបត្តិអ៊ីស្រាអ៊ែល-ប៉ាឡេស្ទីន ឲ្យចេញពីភាពទ័លច្រក ! នេះជាឃ្លា តែមួយគត់ ដែលប្រទេសជាសមាជិកទាំងអស់ បានលើកឡើងស្របគ្នា នៅអង្គការសហប្រជាជាតិ ប៉ុន្តែពួកគេខ្វែងគំនិតគ្នា អំពីវិធីដោះស្រាយ។
សម្រាប់លោកស្រីប្រធានាធិបតីប្រេស៊ីល និងបណ្តាប្រទេសមួយចំនួនធំទៀត ក៏ដូចជា ពិភពអារ៉ាប មានជាអាទិ៍ប្រទេសលីបង់ ហ្ស័កដានី គេចង់ឃើញប៉ាឡេស្ទីន ក្លាយជាសមាជិកមួយដ៏ពេញសិទ្ធិនៅអង្គការសហប្រជាជាតិ។
ប៉ុន្តែសូមប្រុងប្រយ័ត្ន គ្មានផ្លូវកាត់ណាមួយ ដែលអាចនាំដល់សន្តិភាពនៅដើមបូព៌ាទេ ! នេះជាការព្រមានរបស់លោកប្រធានាធិបតីអាមេរិក បារ៉ាក់ អូបាម៉ា ដែលប្រឆាំងដាច់ខាតនឹងគំនិតផ្តួចផ្តើមរបស់ប៉ាឡេស្ទីន។ សម្រាប់សហរដ្ឋអាមេរិក សន្តិភាពមិនអាចកើតមាន តាមរយៈសេចក្តីថ្លែងការណ៍ និងសេចក្តីសម្រេចចិត្ត នៅអង្គការសហប្រជាជាតិបានឡើយ។ ប្រើស្រួលដូច្នេះ ម្ល៉េះសមប៉ាឡេស្ទីនបានក្លាយជារដ្ឋសមាជិករួចទៅតាំងពីយូរហើយ !...
ចំណែកប្រធានាធិបតីបារាំងវិញ លោកនីកូឡា សាកូហ្ស៊ី បានសំណូមពរឲ្យដើរផ្លូវទីបី។ នោះគឺ ត្រូវតែមានការចរចាអ៊ីស្រាអ៊ែល-ប៉ាឡេស្ទីនឡើងវិញ ហើយក្នុងពេលរង់ចាំនេះប៉ាឡេស្ទីននឹងបានទទួលឋានៈជារដ្ឋសង្កេតការណ៍ នៅអង្គការសហប្រជាជាតិ តាមរយៈការបោះឆ្នោត។
តាមពិត នាពេលនេះ ទំនងជាគ្មានអ្វីអាចមកបង្ខាំងប្រធានរដ្ឋអំណាចប៉ាឡេស្ទីនកុំឲ្យដាក់ពាក្យសុំចូលជារដ្ឋសមាជិកបានឡើយ។ ដូច្នេះគេត្រូវតែរិះរកមធ្យោបាយដើម្បីបានចំណេញពេលវេលាតែប៉ុណ្ណោះ។ បើតាមសំណើរបស់ប្រធានាធិបតីបារាំងម្សិលមិញនេះ អង្គការសហប្រជាជាតិ នឹងមិនសិក្សាលើបេក្ខភាពរបស់ប៉ាឡេស្ទីន ហើយក៏នឹងគ្មានការបោះឆ្នោតអនុម័តប៉ាឡេស្ទីនជារដ្ឋសមាជិកអង្គការសហប្រជាជាតិទេ នៅក្នុងមហាសន្និបាតលើកនេះទេ។
អ៊ីស្រាអ៊ែល និងប៉ាឡេស្ទីន ត្រូវចូលតុចរចាឡើងវិញ ក្នុងរយៈពេលមួយខែទៀត។ ៦ខែក្រោយភាគីទាំងពីរត្រូវព្រមព្រៀងគ្នាលើបញ្ហាខ្សែបន្ទាត់ព្រំដែន និងសន្តិសុខ។ អ៊ីស្រាអ៊ែល និងប៉ាឡេស្ទីន មានពេលមួយឆ្នាំ សម្រាប់ឈានដល់ការបង្កើតកិច្ចព្រមព្រៀងចុងក្រោយ។ ជាការចរចាដោយគ្មានលក្ខខណ្ឌ។
ផែនការរបស់បារាំងនេះ ត្រូវបានភាគីប៉ាឡេស្ទីនបានស្វាគមន៍ ថាជាសំណើវិជ្ជមាន ចំណែកអ៊ីស្រាអ៊ែល បានត្រឹមទទួលដឹងឮព័ត៌មាននេះជាផ្លូវការ និងបដិសេធមិនធ្វើអត្ថាធិប្បាយ សម្រាប់សហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ