កញ្ចប់ផ្ញើទៅប្រធានាធិបតីបារាំងមានផ្ទុកជាតិផ្ទុះ
កញ្ចប់បញ្ញើមានជាតិផ្ទុះចំនួនបួនត្រូវបានគេរកឃើញនៅក្រុងអាថែន ៖ មួយកញ្ចប់ផ្ញើមកឲ្យប្រធានាធិបតីបារាំង លោក នីកូឡា សាកូហ្ស៊ី និងបីទៀតសម្រាប់ស្ថានទូតម៉ិចស៊ិក ស្ថានទូតហូឡង់ និងបែលហ្សិក ប្រចាំទីក្រុងអាថែន។ ប៉ូលិសក្រិករកឃើញ កញ្ចប់ទាំងបួនបានទាន់ពេលវេលា និងបានចាប់ខ្លួនជនសង្ស័យពីរនាក់។ ការប៉ុនប៉ងធ្វើភេរវកម្មនេះ ទំនងជារៀបចំឡើងដោយពួកជ្រុលនិយមអនាធិបតេយ្យមួយក្រុមក្នុងប្រទេសក្រិក។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
កញ្ចប់សង្ស័យទីមួយ ដែលជាបញ្ញើទៅឲ្យស្ថានទូតម៉ិចស៊ិក ប្រចាំទីក្រុងអាថែន បានផ្ទុះនៅក្នុងការិយាល័យចែកចាយបញ្ញើនិងសំបុត្រ។ ការផ្ទុះនេះបានធ្វើឲ្យបុគ្គលិកស្រីម្នាក់រងរបួសស្រាល នៅថ្ងៃម្សិលមិញ គឺក្នុងពេលដែលកញ្ចប់មួយទៀត ទំនងជាកំពុងតែត្រូវបានយកទៅឲ្យស្ថានទូតហូឡង់។ ចំណែកកញ្ចប់ពីរទៀត ត្រូវបានគេដោះបង្កៃទាន់។ ក្នុងចំណោមកញ្ចប់ដោះបង្កៃទាន់នោះ មានមួយជាបញ្ញើផ្ញើមកឲ្យលោកប្រធានាធិបតីបារាំង នីកូឡា សាកូហ្ស៊ី។
ក្នុងថ្ងៃម្សិលមិញដដែល ជនសង្ស័យពីរនាក់ត្រូវបានគេចាប់ខ្លួន។ ក្នុងចំណោមជនសង្ស័យទាំងពីរនោះ ម្នាក់ជាជនដែលអាជ្ញាធរក្រិកតាមស្វែងរក ព្រោះជាសកម្មជនរបស់អង្គការឆ្វេងនិយមជ្រុល ដែលមានឈ្មោះថា “ការរួមគំនិតក្រុមអគ្គី” ។ ប៉ុន្តែអ្វីដែលធ្វើឲ្យគេពិបាកនឹងកំណត់ អំពីប្រភពនៃភេរវកម្មនេះ គឺបណ្តាលមកពីកញ្ចប់បញ្ញើសម្រាប់លោកសាកូហ្ស៊ី ពុំមានសញ្ញាអ្វីបញ្ជាក់ជាពិសេសថាជារបស់ក្រុមជ្រុលនិយមក្រិកនេះទេ។
ក្រុមជ្រុលនិយមក្រិកនេះ ធ្លាប់បានបង្កអំពើភេរវកម្ម ជាច្រើនលើកច្រើនសាមកហើយ សំដៅទៅលើតែស្ថាប័នរដ្ឋក្នុងស្រុកប៉ុណ្ណោះ ហើយពុំដែលបង្កឲ្យមានការបាត់បង់ជីវិត មនុស្សទេ។ ភេរវកម្មចុងក្រោយ បានធ្វើកាលពីខែមករា ដើមឆ្នាំ២០១០នេះ ដើម្បីប្រឆាំងនឹងសភាក្រិក។ទើបតែលើកនេះទេ ដែល ឥស្សរជននយោបាយម្នាក់ គឺលោកប្រធានាធិបតីបារាំង បានក្លាយជាទីដៅនៃការវាយប្រហារ ដោយគ្មានសារនយោបាយច្បាស់លាស់។
ភេរវកម្មដោយកញ្ចប់បញ្ញើបង្កប់ជាតិផ្ទុះនេះ កើតឡើងជួនចំពេលដែលតុលាការក្រិកទើបនឹងបើកសវនាការកាត់ទោសសកម្មជនជ្រុលនិយម “ប្រយុទ្ធដើម្បីបដិវត្តន៍” បីនាក់។ អាជ្ញាធរក្រិកបានច្រានចោល នៅថ្ងៃម្សិលមិញ ថាអំពើភេរវកម្មនេះពុំមែនជាស្នាដៃរបស់ពួកអាល់កៃដាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ