បក្សប្រឆាំងនឹងសង្គមស៊ីវិលគ្រោងចុះទៅពិនិត្យមើលបង្គោលព្រំដែន
មន្ត្រីគណបក្សសម រង្ស៊ី និងសង្គមស៊ីវិល បានឲ្យដឹងនៅថ្ងៃនេះថា ក្រុមខ្លួននឹងធ្វើដំណើរទៅពិនិត្យមើលការដាំបង្គោលព្រំដែននៅតាម បណ្តោយព្រំដែនកម្ពុជា-វៀតណាមក្នុងសបា្តហ៍ក្រោយនេះ។ ការចុះទៅពិនិត្យដើម្បីផ្ទៀងផ្ទាត់ថាការបោះបង្គោលព្រំដែនមិនរំលោភ ចូលទឹកដីកម្ពុជាដូចដែលប្រជាពលរដ្ឋមួយបានលើកឡើងទេ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ នេត្រ ភក្ត្រា ពីទីក្រុងភ្នំពេញ
មន្ត្រីគណបក្ស សម រង្ស៊ី និងលោក រ៉ុង ឈុន ប្រធានសហព័ន្ធសហជីពកម្ពុជា បានប្រកាសឲ្យដឹងនៅថ្ងៃនេះថា ក្រុមរបស់ខ្លួននឹងចុះទៅត្រួតពិនិត្យការបោះតម្រុយ និងបង្គោលព្រំដែនតាមបណ្តោយព្រំដែនកម្ពុជា-វៀតណាមនៅសបា្តហ៍ក្រោយនេះ។ គម្រោងនៃការចុះទៅត្រួតពិនិត្យនេះត្រូវបានធ្វើឡើង បន្ទាប់ពីមានការចោទប្រកាន់ ពីសំណាក់ប្រជាពលរដ្ឋនៅក្នុងទឹកដីស្រុកមេមត់ ខេត្តកំពង់ចាមថា ប្រទេសវៀតណាមបានបង្ខិតបង្គោលព្រំដែនចូលដីចម្ការរបស់ពួកគាត់។
លោក យឹម សុវណ្ណ តំណាងរាស្រ្តគណបក្ស សម រង្ស៊ី បានឲ្យដឹងថា ក្រុមមន្ត្រីគណបក្សលោកនឹងធ្វើដំណើរទៅតំបន់ព្រំដែនកម្ពុជា-វៀតណាមក្រោយថ្ងៃបុណ្យឯករាជ្យជាតិ។ លោកថ្លែងថា របាយការណ៍ដែលបានមកពីការចុះត្រួតពិនិត្យនេះនឹងត្រូវផ្ញើជូនទៅរដ្ឋាភិបាលតាមរយៈរដ្ឋសភាជាតិដើម្បីឲ្យមានការដោះស្រាយជូនប្រជាពលរដ្ឋ ប្រសិនបើមានការរំលោភបំពានមែន។ ចំណែកលោក រ៉ុង ឈុន ប្រធានសហព័ន្ធសហជីពកម្ពុជាក៏បានថ្លែងឲ្យដឹងថាក្រុមលោកនឹងចុះទៅត្រួតពិនិត្យលើការបោះតម្រុយបង្គោលព្រំដែនកម្ពុជា-វៀតណាមដែរ។
ប៉ុន្តែមន្ត្រីរដ្ឋាភិបាលកម្ពុជាបានថ្លែងថា ការបោះតម្រុយបង្គោលព្រំដែនជាដែនសមត្ថកិច្ចរបស់រដ្ឋាភិបាល ការចុះទៅត្រួតពិនិត្យដំណើរការបោះបង្គោលព្រំដែនណាមួយត្រូវមានច្បាប់ទម្លាប់ត្រឹមត្រូវ។ លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រី បានថ្លែងថា អ្នកដែលចង់ទៅពិនិត្យការបោះបង្គោលព្រំដែនត្រូវកំណត់ខ្លួនឲ្យច្បាស់ថាធ្វើដំណើរទៅមើលបង្គោលព្រំដែនក្នុងនាមជាអ្នកនយោបាយ ជាអ្នកបច្ចេកទេស ឬក៏ជាអ្នកទេសចរ។ ការកំណត់នេះដើម្បីងាយស្រួលដល់អាជ្ញាធរក្នុងការរក្សាសន្តិសុខ សណ្តាប់ធ្នាប់ និងការពារសម្បត្តិសាធារណៈ។ លោក ផៃ ស៊ីផាន បានព្រមានថា ករណីមានការបង្កការខូចខាតណាមួយ ដល់តម្រុយ និងបង្គោលព្រំដែន ដែលជាទ្រព្យសម្បត្តិសាធារណៈ រដ្ឋាភិបាលនឹងចាត់វិធានការតាមផ្លូវច្បាប់។
ទោះបីយ៉ាងណាទាំងលោក យឹម សុវណ្ណ និងលោក រ៉ុង ឈុន បានអះអាងថា ដំណើរទៅពិនិត្យរបស់លោកនឹងមិនរំខានដល់ការបោះបង្គោលព្រំដែនទេ ព្រោះវាគ្រាន់តែជាការចុះពិនិត្យដោយសន្តិវិធីប៉ុណ្ណោះ។ លោក រ៉ុង ឈុន ថ្លែងថា ក្រុមលោកមិនខ្លាចប្រឈមមុខនឹងផ្លូវច្បាប់ទេ ព្រោះមិនបានបម្រើផលប្រយោជន៍នរណាម្នាក់ឡើយ ប៉ុន្តែដើម្បីផលប្រយោជន៍ជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ