តំណាងរាស្ត្របក្សសម រង្ស៊ីទៅមើលព្រំដែន
ទីបំផុតទៅតំណាងរាស្ត្រគណបក្សសម រង្ស៊ី៣រូបបានទៅដល់ព្រំដែនកម្ពុជាវៀតណាមក្នុងស្រុកពញាក្រែក ខេត្តកំពង់ចាមហើយ កាលពីព្រឹកថ្ងៃពុធទី២៣មិថុនានេះ។ អ្នកតំណាងរាស្ត្រមណ្ឌលកំពង់ចាមទាំង៣រូបដែលរួមដំណើរដោយក្រុម អ្នកកាសែតផងនោះ បានទៅដល់បង្គោលព្រំដែនលេខ១២៥ និងលេខ១២៨ដែលសង់រួច។ ដោយមិននិយាយពីបង្គោលព្រំដែនដែលបោះរួចនេះទេ អ្នកតំណាងរាស្ត្រម៉ៅ មុនីវណ្ណបានថ្លែងអោយដឹងថា លោកបានទទួលបណ្តឹងពីពលរដ្ឋថា តម្រុយបង្គោលព្រំដែនលេខ១២៦ និង១២៧ដែលបានវាស់វែងរួចហើយនេះ បានធ្វើអោយបាត់បង់ចំណែកដីភូមិចំនួន៣ភូមិ។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ លាង ដឺលុច ពីទីក្រុងភ្នំពេញ
តំណាងរាស្ត្រគណបក្សសម រង្ស៊ី៣រូបមានលោកម៉ៅ មុនីវណ្ណ លោកជាម ចន្នី និងលោកស្រីថាក់ ឡានី រួមជាមួយអ្នកកាសែតមួយក្រុមផង បានទៅដល់ស្រុកពញាក្រែកខេត្តកំពង់ចាមនោះ ហើយបានទៅដល់បង្គោលព្រំដែន១២៥ និង១២៨។ ដោយឡែកបញ្ហាដែលលោកទទួលបានពីពលរដ្ឋគឺទាក់ទងនឹងតម្រុយបង្គោលលេខ១២៦ និង១២៧។ បើតាមការអះអាងរបស់លោកមុនីវណ្ណ អ្នកភូមិខ្លះបានប្រាប់លោកថា មានក្រុមអ្នកមានសមត្ថកិច្ចបានធ្វើការវាស់វែងសម្រាប់បង្គោលព្រំដែនលេខ១២៦ និង១២៧។ ហើយថា បើនៅពេលខាងមុខ អាជ្ញាធរប្រទេសទាំងពីរនឹងកំណត់បោះបង្គោលព្រំដែននៅកន្លែងវាស់វែងនោះមែន គឺនឹងធ្វើអោយបាត់បង់ចំណែកដីកម្ពុជាក្នុងភូមិចំនួន៣ គឺភូមិព្រះស្រែ ភូមិអន្លង់ជ្រៃ និងភូមិថ្លុកត្រាច ក្នុងស្រុកពញាក្រែកខេត្តកំពង់ចាម។
បើតាមការបញ្ជាក់របស់លោកម៉ៅ មុនីវណ្ណ ទីមួយក្រុមតំណាងរាស្ត្រគណបក្សសម រង្ស៊ីស្នើអោយគណៈកម្មការព្រំដែនប្រកាសជាសាធារណៈអំពីទិន្នន័យនិយាមការតម្រុយបង្គោលព្រំដែនលេខ១២៦ និង១២៧នេះ ដើម្បីយកទិន្នន័យនេះទៅដាក់លើGPS ដើម្បីដឹងថា តើវាត្រឹមត្រូវ ឬអត់យ៉ាងណានោះ។ ហើយទី២គឺក្រុមតំណាងរាស្ត្រមណ្ឌលកំពង់ចាមរបស់គណបក្សសម រង្ស៊ីនេះ នឹងធ្វើលិខិតមួយផ្ញើជូនប្រធានរដ្ឋសភាជាតិលោកហេង សំរិន អំពីការព្រួយបារម្ភរបស់ប្រជាពលរដ្ឋ ហើយដើម្បីស្នើអោយប្រធានរដ្ឋសភាអនុញ្ញាតអោយអ្នកតំណាងរាស្ត្រទាំង១៨រូបនៃមណ្ឌលកំពង់ចាមមកពីគ្រប់គណបក្សនយោបាយទាំងអស់ចុះទៅជួបពលរដ្ឋនៅមូលដ្ឋានផ្ទាល់តែម្តង។
ទាក់ទងនឹងបញ្ហាទាំងនេះលោកវ៉ា គឹមហុង ដែលជាទេសរដ្ឋមន្ត្រីទទួលបន្ទុកកិច្ចការព្រំដែនបានពន្យល់ថា ទីមួយទាក់ទងនឹងការស្នើរបស់តំណាងរាស្ត្រគណបក្សសម រង្ស៊ីដែលចង់អោយមានការប្រកាសទិន្នន័យនិយាមការបង្គោលព្រំដែននៅខាងស្រុកពញាក្រែកនោះ លោកវ៉ា គឹមហុងបានតាំងពីលោករៀនមកលោកមិនដែលឃើញមានការប្រកាសបែបនេះទេ។
រឿងទី២ទាក់ទងនឹងការវាស់វែងបង្គោលព្រំដែនលេខ១២៦ និង១២៧នោះ លោកវ៉ា គឹមហុងអ្នកជំនាញព្រំដែនរបស់រដ្ឋាភិបាលបានប្រាប់អោយដឹងថា ចំនុចទាំងពីរកន្លែងនេះនៅមិនទាន់បានឯកភាពជាមួយភាគីវៀតណាមនៅឡើយទេ។ ហើយថាអ្នកជំនាញព្រំដែននៃប្រទេសទាំងពីរកំពុងបន្តពិភាក្សាគ្នា។
យោងតាមការបញ្ជាក់របស់ក្រុមអ្នកកាសែតដែលទៅតាមយកព័ត៌មានដល់កន្លែងកើតហេតុ ក៏ដូចជាការអះអាងរបស់អ្នកតំណាងរាស្ត្រគណបក្សសម រង្ស៊ីខ្លួនឯង គឺមិនមានការរារាំងអ្វីឡើយពីសំណាក់អាជ្ញាធរ ចំពោះការចុះពិនិត្យបង្គោលព្រំដែនកម្ពុជាវៀតណាម នៅខេត្តកំពង់ចាមនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ