ថ្នាក់ដឹកនាំគណបក្សសមរង្ស៊ី ៥ រូប នៅខេត្តពោធិ៍សាត់ចុះចូលគណបក្សសិទ្ធិមនុស្ស
នៅព្រឹកថ្ងៃទី២៣សីហានេះថ្នាក់ដឹកនាំគណបក្សសមរង្ស៊ី៥ រូបជាអនុប្រធានគណបក្សសមរង្ស៊ីប្រចាំខេត្តពោធិ៍សាត់ ព្រមទាំងប្រធាននិងអនុប្រធានគណបក្សសមរង្ស៊ីប្រចាំស្រុកក្នុងខេត្តពោធិ៍សាត់ បានប្រកាសចាកចេញពីគណបក្សសមរង្ស៊ី ហើយចូលរួមជាមួយគណបក្សសិទ្ធិមនុស្ស។ សម្រាប់មន្ត្រីជាន់ខ្ពស់គណបក្សសមរង្ស៊ី ការចាកចេញថ្នាក់ដឹកនាំគណបក្សខេត្តពោធិ៍សាត់ទាំង៥នាក់នោះ មិនប៉ះពាល់ដល់គណបក្សសមរង្ស៊ីទេ ព្រោះអ្នកទាំងនោះ ជាមនុស្សដែលមានទំនាក់ទំនងជាមួយមន្ត្រីជាន់ខ្ពស់គណបក្សកាន់អំណាច ហើយត្រូវគណបក្សសមរង្ស៊ី បញ្ឈប់ពីសមាជិកភាព កាលពីពេលថ្មីៗនេះ។
ចុះផ្សាយនៅថ្ងៃ៖
ស្តាប់ - ០២:៥៣
ការបង្ហាញមុខសមាជិកថ្មីទាំង ៥ រូប របស់គណបក្សសិទ្ធិមនុស្ស បានធ្វើឡើង កាលពីព្រឹកថ្ងៃទី២៣សីហា ឆ្នាំ២០១១ នៅទីស្នាក់ការកណ្តាលគណបក្សសិទ្ធិមនុស្ស នៅទីក្រុងភ្នំពេញ។
លោក ម៉ៅ មុនីវណ្ណ អនុប្រធានគណបក្សសិទ្ធិមនុស្ស ដែលទើបតែចាកចេញពីគណបក្សសមរង្ស៊ី បានចាត់ទុកថា វត្តមានរបស់ថ្នាក់ដឹកនាំគណបក្សសមរង្ស៊ី ចូលក្នុងគណបក្សសិទ្ធិមនុស្ស ជាបន្តបន្ទាប់ នឹងធ្វើឲ្យគណបក្សលោកកឹមសុខា ក្លាយជាកម្លាំងប្រជាធិបតេយ្យមួយដ៏ធំ សម្រាប់ឲ្យមានការផ្លាស់ប្តូរសង្គមខ្មែរនាពេលអនាគត។
អតីតតំណាងរាស្ត្រគណបក្សសមរង្ស៊ី ដែលបានចូលរួមជាមួយគណបក្សសិទ្ធិមនុស្ស កាលពីខែមីនា លោក ម៉ៅ មុនីវណ្ណ បញ្ជាក់ថា ការចូលរួមរបស់សកម្មជន និងអ្នកដឹកនាំថ្នាក់ខេត្ត និងថ្នាក់ស្រុករបស់គណបក្សសមរង្ស៊ី ចូលក្នុងគណបក្សសិទ្ធិមនុស្ស ជាចលនារួបរួម នៅថ្នាក់មូលដ្ឋាន ខណៈដែលថ្នាក់ដឹកនាំកំពូលរបស់គណបក្សសមរង្ស៊ី បានបដិសេធ មិនរួបរួមជាមួយគណបក្សសិទ្ធិមនុស្ស។
លោក ម៉ៅ មុនីវណ្ណ បានបន្ថែមថា នៅពេលឆាប់ខាងមុខ នឹងមានការប្រកាសពីការចាកចេញរបស់ថ្នាក់ដឹកនាំខេត្តកំពង់ចាម និងខេត្តតាកែវ ចេញពីគណបក្សសមរង្ស៊ីរាប់រយនាក់ ដើម្បីចូលរួមនយោបាយជាមួយគណបក្សសិទ្ធិមនុស្ស។
ថ្នាក់ដឹកនាំគណបក្សសមរង្ស៊ី ដែលទើបតែផ្តាច់ខ្លួនទាំង ៥ នាក់នោះ រួមមាន៖
ទី១-លោក ឯម វិរៈ អនុប្រធានគណបក្សសមរង្ស៊ី ប្រចាំខេត្តពោធិ៍សាត់។
ទី២-លោក អ៊ុង សាវ៉ាត ប្រធានគណបក្សសមរង្ស៊ី ប្រចាំស្រុកបាកាន។
ទី៣-លោក ឡាក់ ចាន់ជំនិត ប្រធានគណបក្សសមរង្ស៊ី ប្រចាំស្រុកក្រគរ។
ទី៤-លោក ដា សុផល្លី អនុប្រធានគណបក្សសមរង្ស៊ី ប្រចាំក្រុងពោធិ៍សាត់ និង
ទី៥-លោក ចាន់ សេម អនុប្រធានគណបក្សសមរង្ស៊ី ប្រចាំស្រុកបាកាន។
អ្នកទាំង៥នាក់ បានចេញសេចក្តីថ្លែងការណ៍រួម ដោយបញ្ជាក់ថា មូលហេតុនៃការចាកចេញពីគណបក្សសមរង្ស៊ី មកពីពួកគេ មិនពេញចិត្តនឹងការដឹកនាំរបស់គណបក្សសមរង្ស៊ី ដែលកំពុងបែកបាក់ផ្ទៃក្នុង ដោយបង្កើតបក្សក្នុងបក្ស ជាដើម។
ថ្នាក់ដឹកនាំគណបក្សសមរង្ស៊ី នៅខេត្តពោធិ៍សាត់ ក៏បានលើកឡើងថា នៅមានអ្នកគាំទ្រតាមមូលដ្ឋានប្រមាណ ៣ ម៉ឺននាក់ទៀត នឹងត្រូវផ្ទេរពីសកម្មជនគណបក្សសមរង្ស៊ី មកជាអ្នកគាំទ្រគណបក្សសិទ្ធិមនុស្ស ក្រោយពីការប្រកាស នៅថ្ងៃទី២៣សីហា ឆ្នាំ២០១១។
ក៏ប៉ុន្តែលោក គឹមសួរ ភិរិទ្ធ អ្នកតំណាងរាស្ត្រ និងជាអ្នកនាំពាក្យរង គណបក្សសមរង្ស៊ី បានលើកឡើងថា ការចាកចេញ និងចូលរួមនយោបាយរបស់អ្នកទាំង៥ នៅខេត្តពោធិ៍សាត់ ដើម្បីចូលរួមជាមួយគណបក្សសិទ្ធិមនុស្ស មិនបានធ្វើឲ្យរង្គោះរង្គើដល់គណបក្សសមរង្ស៊ីទេ ព្រោះអ្នកទាំងនោះ សុទ្ធតែជាមនុស្សដែលមានទំនាក់ទំនង និងទទួលប្រាក់ពីមន្ត្រីជាន់ខ្ពស់គណបក្សកាន់អំណាច។ គណបក្សសមរង្ស៊ី ក៏បានសម្រេចលុបឈ្មោះពួកគេ ចេញពីសមាជិកភាពរបស់គណបក្សសមរង្ស៊ីផងដែរ។
មន្ត្រីជាន់ខ្ពស់គណបក្សសមរង្ស៊ី បន្ថែមថា អ្នកទាំង៥ ដែលមានទំនាក់ទំនងជិតស្និទ្ធជាមួយអតីតប្រធានគណបក្សសមរង្ស៊ីខេត្តពោធិ៍សាត់ គឺលោក ហេង ចាន់ធួន ធ្លាប់បម្រើការងារឲ្យកាន់អំណាច ក្នុងការរៀបចំបណ្ថាញ ដើម្បីបំផ្លាញរចនាសម្ព័ន្ធគណបក្សសមរង្ស៊ី នៅខេត្តពោធិ៍សាត់។ ប៉ុន្តែគណបក្សប្រឆាំងនេះ បានរៀបចំអ្នកថ្មីជំនួសរួចរាល់ហើយ ដើម្បីត្រៀមខ្លួនឆ្ពោះទៅការបោះឆ្នោតឃុំសង្កាត់នាឆ្នាំក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ