លោក សម រង្ស៊ី៖ បណ្តឹងប្រឆាំងលោកនាយករដ្ឋមន្ត្រី ហ៊ុន សែន កំពុងដំណើរការទៅមុខ
លោក សមរង្ស៊ី បានអះអាងនៅព្រឹកថ្ងៃច័ន្ទនេះថា ពាក្យបណ្តឹងប្រឆាំងលោកនាយករដ្ឋមន្ត្រី ហ៊ុនសែន នៅតុលាការអន្តរជាតិ កំពុងដំណើរទៅមុខ។ ក្នុងសន្និសីទកាសែត តាមប្រព័ន្ធអ៊ីនថឺណេត ពីប្រទេសបារាំង លោក សម រង្ស៊ី ក៏បានថ្លែង ចោទប្រកាន់លោកស្រី ប៊ុនរ៉ានី ភរិយារបស់លោកនាយករដ្ឋមន្ត្រី ហ៊ុនសែន ថានៅពីក្រោយអំពើឃាតកម្ម បាញ់សម្លាប់អ្នកសម្តែងភាពយន្ត អ្នកនាង ពិសិដ្ឋ ពិលីកា កាលពីឆ្នាំ១៩៩៩។ ក៏ប៉ុន្តែមន្ត្រីជាន់ខ្ពស់រដ្ឋាភិបាល បានច្រានចោល ហើយថា ការលើកឡើងរបស់លោក សម រង្ស៊ី គ្រាន់តែជានយោបាយបោកបញ្ឆោតសាធារណមតិ ដែលមិនបានឆ្លុះបញ្ចាំងពីការពិតទាល់តែសោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ក្នុងសន្និសីទកាសែត តាមប្រព័ន្ធអ៊ិនថឺណេត លោក សម រង្ស៊ី បានលើកឡើងថា ភរិយាលោកនាយករដ្ឋមន្ត្រី ហ៊ុន សែន គឺលោកស្រី ប៊ុនរ៉ានី ជាអ្នកនៅពីក្រោយការសម្លាប់អ្នកសម្តែងភាពយន្ត អ្នកនាង ពិសិដ្ឋ ពិលីកា។ ពិសិដ្ឋ ពិលីកា ដែលលោក សម រង្ស៊ី អះអាងថា មានទំនាក់ទំនងស្នេហាលួចលាក់ជាមួយលោកនាយករដ្ឋមន្ត្រី ហ៊ុន សែន។
លោកសមរង្ស៊ី អះអាងថា លោកមានទាំងឯកសារ និងសាក្សី ដែលជាក្រុមគ្រួសាររបស់ ពិសិដ្ឋ ពិលីកា។ បើសិនជាភរិយាលោកនាយករដ្ឋមន្ត្រី ប្តឹងរូបលោកក៏មិនឈ្នះលោកឡើយនៅតុលាការអន្តរជាតិ។
មេបក្សប្រឆាំង លោក សម រង្ស៊ី ក៏ប្រកាសថា នឹងធ្វើសេចក្តីថ្លែងការណ៍ជាសាធារណៈពីរឿងឃាតកម្មលើអ្នកសម្តែងភាពយន្ត អ្នកនាង ពិសិដ្ឋ ពិលីកា នៅថ្ងៃទី២៣តុលាខាងមុខ ក្នុងខួបគម្រប់ ២០ ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស។
ក្នុងសន្និសីទកាសែត នៅព្រឹកមិញ លោក សម រង្ស៊ី ក៏បានលើកឡើងពីដំណើរការវិវឌ្ឍន៍ទៅមុខលើពាក្យបណ្តឹងរបស់លោក នៅតុលាការអន្តរជាតិ ពិសេសនៅតុលាការអាមេរិក និងនៅប្រទេសសហភាពអឺរ៉ុប ប្រឆាំងនឹងលោកនាយករដ្ឋមន្ត្រី ហ៊ុន សែន។ លោកនាយករដ្ឋមន្ត្រី ត្រូវលោក សម រង្ស៊ី ប្តឹងពីបទឧក្រិដ្ឋកម្មសម្លាប់មនុស្ស តាមរយៈផែនការ ក៥ និងបទឧក្រិដ្ឋជាច្រើនទៀត។ លោក សម រង្ស៊ី បានអំពាវនាវឲ្យជនរងគ្រោះ ក្នុងផែនការ ក៥ ផ្តល់ភស្តុតាងបន្ថែមដល់រូបលោក។
ក៏ប៉ុន្តែលោក ទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី ចាត់ទុកការលើកឡើងរបស់លោក សម រង្ស៊ី ថាជាការទ័លច្រកផ្នែកនយោបាយ របស់មេបក្សម្នាក់ ដែលបានរត់គេចពីសំណាញ់ច្បាប់របស់ប្រទេសកម្ពុជា។
តាមមន្ត្រីជាន់ខ្ពស់រដ្ឋាភិបាល លោក សម រង្ស៊ី បានសារភាពហើយ តាមរយៈលិខិតមួយច្បាប់ផ្ញើជូនលោកនាយករដ្ឋមន្ត្រី ហ៊ុន សែន នាពេលកន្លងមកថា ការចោទប្រកាន់ពាក់ព័ន្ធនឹងឃាតកម្មទាំងអស់ ដែលលោកបានលើកឡើង មិនមែនជាការពិតទេ។ លោក សម រង្ស៊ី ក៏បានលើកឡើងក្នុងលិខិត កាលពីឆ្នាំ២០០៥ ដោយសម្តែងការសោកស្តាយផងដែរ។ ដូច្នេះលោក ទិតសុធា បានចាត់ទុកថា ការបង្កើតនូវបញ្ហាថ្មីរបស់លោក សម រង្ស៊ី គឺគ្រាន់តែជាលេសនយោបាយ ដើម្បីបន្ទរសំឡេងឲ្យគេនឹកឃើញរូបលោកប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ