លោកសម រង្ស៊ីអំពាវនាវអោយចាប់ឃាតករបោកគ្រាប់បែកឆ្នាំ១៩៩៧
១៣ឆ្នាំកន្លងទៅនេះ ការរៀបចំពិធីរម្លឹកវិញ្ញាណក្ខន្ធអ្នកស្លាប់ក្នុងព្រឹត្តិការណ៍ផ្ទុះគ្រាប់បែក នៅទល់មុខអតីតអគាររដ្ឋសភា នៅថ្ងៃទី៣០មីនា១៩៩៧ គឺជាព្រឹត្តិការណ៍សំខាន់ប្រចាំឆ្នាំមួយរបស់គណបក្សសម រង្ស៊ី។ នៅព្រឹកមិញនេះ គណបក្សសមរង្ស៊ីបានរៀបចំខួបលើកទី១៤ជាមួយក្រុមគ្រួសារជនរងគ្រោះដូចរៀងរាល់ឆ្នាំ។ ប្រធានគណបក្សមិនមានវត្តមានជាក់ស្តែងទេ តែបានបញ្ចេញសំឡេងពីប្រទេសបារាំង ដើម្បីអំពាវនាវអោយអាជ្ញាធរកម្ពុជាតាមចាប់ឃាតករមកផ្តន្ទាទោស។
ចុះផ្សាយនៅថ្ងៃ៖
សេចក្តីរាយការណ៍របស់លាង ដឺលុច ពីភ្នំពេញ
ពិធីរម្លឹកវិញ្ញាណក្ខន្ធអ្នកបាត់បង់ជីវិតនៅក្នុងព្រឹត្តិការណ៍ផ្ទុះគ្រាប់បែកត្រូវបានរៀបចំតាមទម្លាប់ជារៀងរាល់ឆ្នាំដោយគណបក្សសម រង្ស៊ី ១៣ឆ្នាំមកហើយ។ មិនមានអ្វីខុសពីធម្មតាទេ ជាពិធីតាមបែបសាសនា មានព្រះសង្ឃ មានម្ចាស់ដើមបុណ្យ គឺគណបក្សសម រង្ស៊ី និងក្រុមគ្រួសារជនរងគ្រោះ។
ប៉ុន្តែឆ្នាំនេះ មិនមានវត្តមានលោកសម រង្ស៊ី នៅឈរក្នុងចំណោមសមាជិកដូចរាល់ដងឡើយ។ មានតែសំឡេង និងរូបភាពដែលត្រូវបានចាក់ផ្សាយបន្តតាមVideo Conference។ តាមរយៈ Video Conference នេះហើយដែលលោកសម រង្ស៊ីស្រែកអំពាវនាវអោយអាជ្ញាធរកម្ពុជាស្វែងរកអោយឃើញឃាតករគប់គ្រាប់បែកចូលក្នុងហ្វូងបាតុករ កាលពីថ្ងៃអាទិត្យ ទី៣០ ខែមីនា ឆ្នាំ១៩៩៧។ ពេលនោះ បាតុករដែលជាកម្មករ កម្មការិនី កំពុងតែតវ៉ាទាមទារអោយមានការកែទម្រង់ប្រព័ន្ធយុត្តិធម៌ នៅមុខអតីតរដ្ឋសភាជាតិ។ នៅពេលនោះ គ្រាប់បែក៤គ្រាប់បានផ្ទុះ ហើយបានសម្លាប់មនុស្សយ៉ាងតិចជាង១០នាក់ និងអ្នករងរបួសជាង១០០នាក់។
ការរៀបចំពិធីរម្លឹកវិញ្ញាណក្ខន្ធអ្នករងគ្រោះ ក៏បានផ្តល់វេទិកាសម្រាប់លោកសម រង្ស៊ី ដែលកំពុងរស់នៅនិរទេសខ្លួនពីការចាប់ខ្លួនរបស់អាជ្ញាធរកម្ពុជានោះ ធ្វើអត្ថាធិប្បាយលើប្រធានបទផ្សេង ស្តីពីកម្ពុជា។
លោកសម រង្ស៊ីបាននិយាយប្រៀបប្រដូចកម្ពុជាទៅប្រទេសលីប៊ី ដែលធ្វើបាបប្រជាជនខ្លួន ហើយលោកក៏បានថ្កោលទោសការសម្រេចក្តីរបស់តុលាការ ដែលបានផ្តន្ទាទោសរូបលោកក្នុងសំណុំរឿងព្រំដែនផងដែរ ដែលធ្វើអោយលោកមិនអាចត្រលប់ចូលក្នុងប្រទេសវិញបាន។ លោកសម រង្ស៊ី មិនបានរារែកនឹងស្រែកថា ក្តីក្តាំដែលធ្វើអោយលោកមិនអាចចូលស្រុកបាន នឹងកាន់តែធ្វើអោយអាសនៈរដ្ឋសភារបស់គណបក្សសម រង្ស៊ីកាន់តែកើនឡើងនៅអាណត្តិក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ