អាមេរិកផ្អាកជំនួយដោយព្យុងយ៉ាងប្រុងប្រៀបបង្ហោះកាំជ្រួចមីស៊ីល
កូរ៉េខាងជើង បានចាប់ផ្តើមចាក់បំពេញធុងប្រេងឥន្ធនៈសម្រាប់ការបាញ់បង្ហោះកាំជ្រួចរបស់ខ្លួនដែលប្រហែលជានឹងប្រព្រឹត្តិទៅនៅពាក់កណ្តាលខែមេសាខាងមុខ បើទោះបីជាមានការអំពាវនាវ ពីសហគមន៍អន្តរជាតិឲ្យបោះបង់ចោលនូវគម្រោងនេះក្តី។ ទង្វើនេះ ជំរុញឲ្យស.រ.អា.លើកផ្អាកជំនួយស្បៀងអាហាររបស់ខ្លួនដល់កូរ៉េខាងជើងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
កូរ៉េខាងជើងនឹងធ្វើការបង្ហោះកាំជ្រួចរបស់ខ្លួនក្នុងពេលឆាប់ៗនេះ គឺប្រហែលជានៅថ្ងៃ១២ឬ១៣មេសាខាងមុខ-នេះ បើយោងតាមប្រភពស្និទ្ធនឹងរដ្ឋាភិបាលកូរ៉េខាងជើងផ្តល់ឲ្យដល់សារព័ត៌មានជប៉ុន Tokyo Shimbun ដែលចេញផ្សាយនៅថ្ងៃព្រហ្បតិ៍២៩មីនានេះ។ នៅទីក្រុងសេអ៊ូល ក្រសួងការពារជាតិកូរ៉េខាងត្បូង ពុំចង់ធ្វើអត្ថាធិប្បាយអ្វីណាមួយឡើយ។
នៅសហរដ្ឋអាមេរិក វ៉ាស៊ីនតោន នៅយប់ថ្ងៃពុធម្សិលមិញបានប្រកាសប្រាប់ថា អាមេរិក ផ្អាកឈប់ដឹកជំនួយស្បៀងអាហារទៅឲ្យកូរ៉េខាងជើងទៀតហើយ ដោយហេតុតែកូរ៉េខាងជើងប្រុងប្រៀបបាញ់បង្ហោះកាំជ្រួចរបស់ខ្លួន-នេះជាការថ្លែងបញ្ចាក់របស់លោកPeter Lavoy លេខាធិការរងនៃក្រសួងការពារជាតិអាមេរិកទទួលបន្ទុកកិច្ចការអាស៊ី នៅចំពោះមុខបណ្តា អ្នកតំណាងរាស្ត្រអាមេរិកាំង។
លោក Peter Lavoy បានលើកឡើងទៀតថា កិច្ចព្រមព្រៀងរវាងព្យុងយ៉ាងនិងអាមេរិក គឺបានហាមយ៉ាងច្បាស់ មិនឲ្យកូរ៉េខាងជើង ធ្វើការបាញ់បង្ហោះកាំជ្រួចមីស៊ីលឡើយហើយបានគូសបញ្ចាក់ប្រាប់ដែរថា បើកូរ៉េខាងជើង ធ្វើការបាញ់បង្ហោះនូវផ្កាយរណបណាមួយនោះ ក៏អាមេរិកចាត់ទុកដូចជាការបាញ់បង្ហោះកាំជ្រួចមីស៊ីលដែរ ពីព្រោះគេប្រើបច្ចេកវិទ្យាដូចតែគ្នា។
នៅព្យុងយ៉ាង ទីភ្នាក់ងារផ្លូវការកូរ៉េខាងជើង KCNA បានអះអាងប្រាប់ថា ផ្កាយរណបដែលកូរ៉េនឹងបាញ់បង្ហោះនោះ អនុញ្ញាតឲ្យកូរ៉េខាងជើង អាច វាយតម្លៃបានល្អប្រសើរជាងមុន នូវការដាំដុះនិងការព្យាករបានល្អប្រសើរខាងផ្នែកឧត្តុនិយម។
គួររំលឹកថា ស.រ.អា.បានសន្យាជួយជាស្បៀងអាហារដល់កូរ៉េខាងជើងចំនួន២៤ម៉ឺនតោន បន្ទាប់ពីព្យុងយ៉ាង បានសន្យាជាមួយវ៉ាស៊ីនតោនថាខ្លួនលើកផ្អាកការបាញ់សាកល្បងកាំជ្រួចនុយក្លេអ៊ែរបស់ខ្លួនមួយរយៈ និងសកម្មភាពចំរើនធាតុអ៊ុយរ៉ានីញូមដើម្បីប្តូរជាមួយស្បៀងអាហារអាមេរិក។ ប៉ុន្តែ អាមេរិក បានដាក់លក្ខខណ្ខត្រួតពិនិត្យយ៉ាងម័ទធ្យ័តបំផុតដើម្បីចៀសវាងកុំឲ្យជំនួយរបស់ខ្លួន ធ្លាក់ទៅលើដៃកងទ័ពកូរ៉េខាងជើង។
កូរ៉េខាងជើងដែល ត្រូវរងគ្រោះអត់ឃ្លានជាយូរឆ្នាំមកហើយជាពិសេសនៅជំនាន់ពាក់កណ្តាលទស្សវត្សរ៍ឆ្នាំ៩០ បានបណ្តាលឲ្យស្លាប់ប្រជាជនកូរ៉េខាងជើងរាប់រយពាន់នាក់-នេះបើយោងតាមអង្គការក្រៅរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ