សំណុំរឿងពុករលួយ ក្នុងជួរប៉ូលិសប្រឆាំងគ្រឿងញៀន ត្រូវបានបើកកកាយ
នៅរសៀលថ្ងៃសុក្រនេះ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានប្រកាសនូវលទ្ធផលនៃការស៊ើបអង្កេត និងការចាប់ខ្លួនមេប៉ូលិស ក្នុងសំណុំរឿងពុករលួយ និងការជួញដូរថ្នាំញៀន នៅមន្ទីរប្រឆាំងគ្រឿងញៀន របស់ក្រសួងមហាផ្ទៃ។ តាមលទ្ធផលស៊ើបអង្កេត ក្រុមប៉ូលិសរបស់ឧត្តមសេនីយ៍ផ្កាយបី មឹក ដារ៉ា បានកែប្រែកំណត់ហេតុចម្លើយជនល្មើស នៅពេលចុះបង្ក្រាបសំណុំរឿងគ្រឿងញៀន ដើម្បីដោះលែងឈ្មួញគ្រឿងញៀន ជាថ្នូរនឹងលុយរាប់ម៉ឺនដុល្លារ។ រីឯករណីខ្លះទៀត ជនជាប់ចោទជាមេប៉ូលិសទាំងនោះ បានរឹបអូសយកគ្រឿងញៀន ដើម្បីលក់ដូរ ក្រោមស្លាកមន្ទីរប្រឆាំងគ្រឿងញៀន របស់ប៉ូលិសក្រសួងមហាផ្ទៃ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
ក្នុងសន្និសីទកាសែត នៅមុននេះបន្តិច លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលកាន់សំណុំរឿងប៉ូលិសស៊ីសំណូក តាមរយៈការបង្ក្រាបគ្រឿងញៀន បានប្រកាសនូវលទ្ធផលនៃការស៊ើបអង្កេត ដែលឈានដល់ការចាប់ខ្លួននាយប៉ូលិស ៤ រូប បញ្ជូនទៅតុលាការ ដើម្បីកាត់ទោស។
ជាលទ្ធផល ដែលលោក ឱម យ៉ិនទៀង លើកឡើងថា សំណុំរឿងដ៏ធំមួយនេះ បានកើតឡើងតាំងពីឆ្នាំ២០០៧ ហើយទើបតែបំបែកកាលសប្តាហ៍មុន។
លោកឧត្តមសេនីយ៍ផ្កាយបី មឹក ដារ៉ា អគ្គលេខាធិការនៃអាជ្ញាធរជាតិប្រឆាំងគ្រឿងញៀន និងជាប្រធានមន្ទីរប្រឆាំងគ្រឿងញៀន របស់ក្រសួងមហាផ្ទៃ គឺជាមេខ្លោង ដែលបានបង្កើតបណ្តាញជួញដូរគ្រឿងញៀនយ៉ាងធំ ដោយប្រើប្រាស់មន្ទីរប្រឆាំងគ្រឿងញៀនរបស់ក្រសួងមហាផ្ទៃ ជាទីកន្លែងចាត់តាំង។
នាយប៉ូលិសទាំង៤រូប ត្រូវដកហូតតំណែង និងចាប់ខ្លួន ជាបន្តបន្ទាប់ ចាប់តាំងពីថ្ងៃទី៧មករា។ លោកឧត្តមសេនីយ៍ផ្កាយបី មឹក ដារ៉ា លោក ជា ឡេង និងលោក ឈៀង សុន អតីតស្នងការរងប៉ូលិសខេត្តបន្ទាយមានជ័យ ត្រូវបានចោទប្រកាន់ពីបទពុករលួយ និងជួញដូរគ្រឿងញៀន ដោយមានអង្គការចាត់តាំង។ អ្នកទាំងបី ប្រឈមនឹងការជាប់ពន្ធនាគារមួយជីវិត។ រីឯលោកឧត្តមសេនីយ៍ផ្កាយមួយ ហ៊ុន ហ៊ាន អតីតស្នងការប៉ូលិសខេត្តបន្ទាយមានជ័យ ត្រូវបានចោទប្រកាន់ពីបទពុករលួយ ដែលអាចប្រឈមនឹងការផ្តន្ទាទោសពី ៥ ទៅ ១០ ឆ្នាំ។ នាយប៉ូលិសទាំង ៤ ពាក់ព័ន្ធនឹងសំណុំរឿងគ្រឿងញៀនដ៏ធំមួយ នៅខេត្តបន្ទាយមានជ័យ ជាប់ព្រំដែនថៃ។
លោក ឱម យិន ទៀង បានគូសបញ្ជាក់ថា លោកឧត្តមសេនីយ៍ មឹក ដារ៉ា និងគូកន បានប្រឌិតភស្តុតាង និងបន្លំឯកសារជាច្រើន ដើម្បីដោះលែងជនល្មើស ទាក់ទងនឹងការបង្ក្រាបគ្រឿងញៀន ជាថ្នូរនឹងប្រាក់សំណូករាប់ម៉ឺនដុល្លារ។ ពេលខ្លះ ក្រុមប៉ូលិសនេះ បានលាក់ទុកគ្រឿងញៀន ដែលចាប់បាន ដើម្បីឲ្យកូនចៅរបស់ខ្លួនលក់បន្ត។
ក្នុងសំណុំរឿងដ៏រសើបនេះ លោក ឱម យ៉ិនទៀង បានបន្ថែមថា តុលាការបានអនុញ្ញាតឱ្យអង្គភាពប្រឆាំងអំពើពុករលួយរបស់លោក បើកការស៊ើបអង្កេតបន្ត ប៉ុន្តែលោកអះអាងថា គ្មានអ្នកធំជាងលោក មឹក ដារ៉ា ជាប់ពាក់ពន្ធ័ក្នុងសំណុំរឿងនេះទេ។ រីឯលោកនាយករដ្ឋមន្ត្រី ហ៊ុន សែន ក្នុងកិច្ចប្រជុំគណៈរដ្ឋមន្ត្រីនៅព្រឹកមិញ ក៏បានអំពាវនាវជាថ្មីម្តងទៀតឱ្យមន្ត្រីក្រោមឱវាទរបស់លោកដកខ្លួនចេញជាបន្ទាន់ពីអំពើពុករលួយ ការជួញដូរគ្រឿងញៀន ការរំលោភដីធ្លី និងការកាប់បំផ្លាញព្រៃឈើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ