អង្គភាពប្រឆាំងអំពើពុករលួយបង្កើនការផ្សព្វផ្សាយទម្រង់ប្រកាសទ្រព្យសម្បត្តិ
អង្គភាពប្រឆាំងអំពើពុករលួយបង្កើនការផ្សព្វផ្សាយច្បាប់ និងទម្រង់ប្រកាសទ្រព្យសម្បត្តិ។ ការប្រកាសទ្រព្យសម្បត្តិនឹងត្រូវគេគ្រោងធ្វើឡើង នៅដើមឆ្នាំ២០១១ខាងមុខនេះ។ មន្ត្រីរាជការមានថានៈជាង១០ម៉ឺននាក់នឹងជាប់ពាក់ព័ន្ធ ក្នុងការប្រកាសទ្រព្យសម្បត្តិ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់គី សុខលីមពីទីក្រុងភ្នំពេញ
អង្គភាពប្រឆាំងអំពើពុករលួយកំពុងបង្កើនល្បឿនផ្សព្វផ្សាយទម្រង់ប្រកាសទ្រព្យសម្បត្តិ និងផ្សព្វផ្សាយច្បាប់ប្រឆាំងនឹងអំពើពុករលួយទៅដល់មន្ត្រីពាក់ព័ន្ធ និងសាធារណជន។
បើផ្អែកលើគម្រោងរបស់អង្គភាពប្រឆាំងអំពើពុករលួយ មន្ត្រីរាជការ ដែលមានថានៈចាប់ពីប្រធាននាយកដ្ឋានឡើងទៅ ត្រូវប្រកាសទ្រព្យសម្បត្តិរបស់ខ្លួន ចាប់ពីថ្ងៃទី១ ខែមករា ឆ្នាំ២០១១ខាងមុខនេះ។ មន្ត្រីដែលពាក់ព័ន្ធនឹងការប្រកាសទ្រព្យសម្បត្តិអាចមានចំនួនជាង១០ម៉ឺននាក់ នៅក្នុងប្រទេសកម្ពុជា។
លោក កែវ រ៉េមី អ្នកនាំពាក្យអង្គភាពប្រឆាំងអំពើពុករលួយបានបញ្ជាក់ប្រាប់ នៅថ្ងៃអាទិត្យនេះថា បច្ចុប្បន្ននេះអង្គភាពប្រឆាំងអំពើពុករលួយកំពុងធ្វើការលើបួនចំនុច ដើម្បីឈានទៅដល់ការប្រកាសទ្រព្យសម្បត្តិ នៅថ្ងៃទី១ខែ១ឆ្នាំ២០១១ខាងមុខនេះ។
កិច្ចការទីមួយ៖គឺការប្រកាសអោយយល់ដឹងពីទម្រង់នៃការប្រកាសទ្រព្យសម្បត្តិ។ ទីពីរ៖ការជ្រើសរើសជនបង្គោលនៅតាមក្រសួងនីមួយៗ ដើម្បីធ្វើការជាមួយអង្គភាពប្រឆាំងអំពើពុករលួយ។ ទីបី៖គឺការកសាងវិបសៃត៍របស់អង្គភាពប្រឆាំងអំពើពុករលួយ និងទី៤ការបន្តផ្សព្វផ្សាយច្បាប់ប្រឆាំងនឹងអំពើពុករលួយ។
រហូតមកដល់ពេលនេះ អង្គភាពប្រឆាំងអំពើពុករលួយបានធ្វើសិក្ខាសាលាផ្សព្វផ្សាយច្បាប់ប្រឆាំងអំពើពុករលួយបានពី៥ទៅ៦កន្លែងហើយ។ ហើយនៅថ្ងៃចន្ទស្អែកនេះ អង្គភាពប្រឆាំងអំពើពុករលួយនឹងធ្វើការផ្សព្វផ្សាយច្បាប់នេះទៅកាន់មន្ត្រីនៅក្នុងស្ថាប័នព្រឹទ្ធសភា។
កិច្ចការផ្សព្វផ្សាយអោយយល់ដឹងពីច្បាប់ប្រឆាំងអំពើពុករលួយនឹងត្រូវគេធ្វើបន្តទៀតអោយគ្របដណ្ដប់ទូទាំងប្រទេសនៅថ្ងៃអនាគត។
លោក កែវ រ៉េមី អ្នកនាំពាក្យអង្គភាពប្រឆាំងអំពើពុករលួយបានបញ្ជាក់ថា ជំហានដំបូង អង្គភាពប្រឆាំងអំពើពុករលួយត្រូវធ្វើការអប់រំ បង្ការ និងទប់ស្កាត់ ប៉ុន្តែជំហានបន្ទាប់យុទ្ធនាការបង្ក្រាបនឹងធ្វើឡើងតែម្តង។ លោក កែវ រ៉ែមី បានបន្តទៀតថា ការយល់ដឹងពីច្បាប់នឹងធ្វើអោយជនដែលចង់ប្រព្រឹត្តអំពើពុករលួយមានការភ័យខ្លាច។
សូមបញ្ជាក់ថា ចាប់តាំងពីច្បាប់ប្រឆាំងអំពើពុករលួយចូលជាធរមានមក មានមនុស្សមួយចំនួនតូចហើយទទួលបានការដាក់ពិន័យ និងទទួលទណ្ឌកម្ម។ ជាក់ស្តែង ព្រះរាជអាជ្ញាខេត្តពោធិ៍សាត់កំពុងរង់ចាំការកាត់ទោសក្រោមការចោទប្រកាន់ពីបទពុករលួយ និងមន្ត្រីពន្ធដារមួយចំនួនផ្សេងទៀត ត្រូវបានទទួលទណ្ឌកម្មរដ្ឋបាលដោយសារការទទួលសំណូកក្នុងការប្រមូលពន្ធផ្លូវពីម្ចាស់យានយន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ