លោកអូបាម៉ានិងលោកពូទីន ក្នុងឆ្នាំនេះ គ្រោងជួបគ្នាយ៉ាងហោចណាស់ពីរលើក
ដំណឹងនេះទើបប្រកាសដោយវិមានក្រេមឡាំង បន្ទាប់ពីប្រមុខរដ្ឋអាមេរិកនិង រុស្ស៊ីបានសន្ទនាគ្នាតាមទូរសព្ទ ទាំងលំអិតថាគឺលោកអូបាម៉ា ជាអ្នកបានភ្ជាប់ខ្សែទូរសព្ទមកមេដឹកនាំរុស្ស៊ី។ ជាការកត់សម្គាល់ ប្រធានាធិបតីរុស្ស៊ីនិងអាមេរិក បានឯកភាពគ្នាថា “ត្រូវតែខិតខំចៀសវាង កុំឈានជំហានណាដែលអាចជះឥទ្ធិពលអវិជ្ជមាន មកលើទំនាក់ទំនងទ្វេភាគី។ ខាងបញ្ហាអន្តរជាតិ គូភាគីសម្រេចថាបន្តសហការគ្នា ឆ្ពោះទៅដោះស្រាយវិបត្តិរ៉ាំរ៉ៃនៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
តាមវិមានក្រេមឡាំង ពេលសន្ទនាគ្នាតាមទូរសព្ទនោះ លោកប្រធានាធិបតីអាមេរិកអូបាម៉ា និងសមភាគីរុស្ស៊ី លោកពូទីន បានសម្របយោបល់គ្នាថា ក្នុងឆ្នាំនេះ រដ្ឋបុរសទាំងពីរនឹងធ្វើជំនួបនឹងគ្នាផ្ទាល់ មិនតិចជាង២លើកឡើយ គឺថា ៖ លើកទី១-ក្នុងបរិវេណនៃជំនួបកំពូល៨ប្រទេស ដែលមានឧស្សាហកម្មលូតលាស់ជាងគេ ហៅថា G-8 នៅប្រទេស Irlande ខាងជើង ក្នុងខែមិថុនា។ ហើយលើកទី២ គឺក្នុងក្របខ័ណ្ឌនៃជំនួបកំពូល២០ប្រទេស ដែលមានសេដ្ឋកិច្ចហំហួនជាងគេ ហៅថា G-20 ក្នុងខែកញ្ញា នៅឯក្រុង Saint-Petersbourg ដោយមានរុស្ស៊ីធ្វើជាម្ចាស់ផ្ទះទទួល។
លោកអូបាម៉ានិងលោកពូទីន ក្នុងកិច្ចសន្ទនានោះ បានពិភាក្សាអំពីទំនាក់ទំនងទ្វេភាគី និងបញ្ហាអន្តរជាតិដែលប្រកបដោយបច្ចុប្បន្នភាព បែបយ៉ាង វិបត្តិនៅស៊ីរី កម្មវិធីនុយក្លេអ៊ែររបស់អ៊ីរ៉ង់ និងកូរ៉េខាងជើង។
ស្តីពីទំនាក់ទំនងទ្វេភាគី រដ្ឋបុរសរុស្ស៊ី និងអាមេរិក បានចុះសម្រុងគ្នាថា “មិនត្រូវបណ្តោយ ឲ្យលេចចេញមកជាកត្តាអវិជ្ជមាន ដែលជះចំហាយអាក្រក់មកលើទំនាក់ទំនងនេះឡើយ”។
ប្រមុខរដ្ឋទាំងពីរក៏សំដែងនូវភាពត្រៀមខ្លួន ធ្វើការងារយ៉ាងសកម្មឆ្ពោះទៅបំផុសបំផុលសហប្រតិបត្តិការទ្វេភាគី ដែលនាំជាគុណប្រយោជន៍ទៅវិញទៅមក លើគ្រប់វិស័យ។
លោកអូបាម៉ានិងលោកពូទីនឯកភាពនឹងគ្នាថា សហប្រតិបត្តិការរវាងរុស្ស៊ីនិងអាមេរិក មានន័យសំខាន់ជាគោលការណ៍ សម្រាប់ធានាឲ្យមានស្ថិរភាពនៅក្នុងលោក។
ស្តីពីចំណុចក្តៅគគុកនៅស៊ីរី ប្រមុខរដ្ឋរុស្ស៊ីនិងអាមេរិក ព្រមព្រៀងនឹងគ្នាថាបន្តការសហការគ្នាឆ្ពោះទៅបុកទម្លាយ ឲ្យមានច្រកចេញរួចពីស្ថានការណ៍រ៉ាំរ៉ៃនេះ។ ក្នុងបរិបទដំណោះស្រាយនេះ ប្រធានាធិបតីទាំងពីរសំដែងក្តីសោមនស្សន៍ចំពោះកិច្ចពិគ្រោះផ្លាស់ប្តូរយោបល់ក្នុងស្មារតីស្ថាបនាដែលបានប្រព្រឹត្តទៅក្នុងសប្តាហ៍កន្លងទៅ នៅក្រុងប៊ែរឡាំង រវាងរដ្ឋមន្ត្រីការបរទេសរុស្ស៊ីនិងអាមេរិក លោក Serguei Lavrov និងលោក John Kerry ជុំវិញបញ្ហាបំពេញតាមកិច្ចព្រមព្រៀង ចុះថ្ងៃទី៣០ មិថុនា នៅក្រុងហ្ស៊ឺណែវ ដែលត្រូវធានាឲ្យមាន “ដំណាក់អន្តរកាលនយោបាយ”ក្នុងប្រទេសស៊ីរី។
នៅតាមមុខព្រួញនេះ ប្រធានាធិបតីរុស្ស៊ី និងអាមេរិក ផ្ទុកផ្តាក់ប្រមុខការទូតខ្លួនឲ្យបន្តតាំងទំនាក់ទំនងនឹងគ្នាយ៉ាងសកម្ម ដើម្បីបំផុសមកជាគំនិតផ្តួចផ្តើមថ្មីៗ តម្រង់ទៅដោះស្រាយវិបត្តិនៅស៊ីរីតាមផ្លូវនយោបាយការទូត ឲ្យទាល់តែបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ