នៅទីបំផុត ប្រមុខការទូតថ្មីអាមេរិកបានសន្ទនាមែនជាមួយសមភាគីរុស្ស៊ី
ការសន្ទនាតាមទូរសព្ទបានប្រព្រឹត្តទៅ ពេលដែលនៅក្រុងវ៉ាស៊ីនតោន គឺយប់ ម្សិលមិញ ត្រូវនឹងពេលព្រឹកថ្ងៃនេះទៅហើយ ម៉ោងនៅម៉ូស្គូ។ គេចាប់អារម្មណ៍ ពីព្រោះអស់មួយសប្តាហ៍កន្លងទៅ លោក John Kerry រដ្ឋមន្ត្រីការបរទេសថ្មីនៃស.រ.អា.តែងព្យាយាមភ្ជាប់ទូរសព្ទជាមួយលោករដ្ឋមន្ត្រីការបរទេសរុស្ស៊ី Serguei Lavrov ប៉ុន្តែមិនបានសម្រេចដូចចិត្ត ដោយពេលនោះប្រមុខការទូតរុស្ស៊ីជាប់ទស្សនកិច្ច នៅតាមប្រទេសអាហ្វ្រិក។
ចុះផ្សាយនៅថ្ងៃ៖
ស្តាប់ - ០២:២២
តាមអ្នកនាំពាក្យផ្លូវការរបស់ក្រសួងការបរទេសអាមេរិក លោកស្រី Victoria Nuland
ក្នុងរយៈពេលកន្លះម៉ោង ដែលកិច្ចសន្ទនានេះបានប្រព្រឹត្តទៅ លោក John Kerry និងលោក Serguei Lavrov បានពិភាក្សាអំពីស្ថានការណ៍នៅប្រទេសស៊ីរី និងអំពីការបន្តធ្វើការងាររួមគ្នាក្នុងក្រុមប្រឹក្សាសន្តិសុខអ.ស.ប. ខាងរៀបចំវិធានការជាចម្លើយតបនឹងការសាកល្បងបរមាណូក្រោមដីថ្មីៗដោយកូរ៉េខាងជើង។ អ្នកនាំពាក្យនោះ ក៏ថ្លែងដែរថា “ប្រមុខការទូតអាមេរិកនិងរុស្ស៊ី បានយល់ព្រមផ្ទៀងផ្ទាត់ផែនការការងាររបស់ខ្លួន ដើម្បីចាត់ចែងឡើងក្នុងប៉ុន្មានសប្តាហ៏ចំពោះមុខ ជាជំនួបលើកទី១នឹងគ្នាផ្ទាល់តែម្តង”។
ពេលពិភាក្សាស្ថានការណ៍នៅស៊ីរី លោក Kerry និងលោក Lavrov បានកត់សម្គាល់ពី “សារៈសំខាន់ដើម្បីឲ្យ ស.រ.អា.និងរុស្ស៊ី ប្រើឥទ្ធិពលខ្លួនទៅលើភាគីដែលជាប់ក្នុងជម្លោះនៅទីនោះ គ្រាន់នឹងទ្រទ្រង់ឲ្យដំណើរការអន្តរកាលនយោបាយ”នៅតែអាចប្រព្រឹត្តទៅដដែល។
លោក Kerry បានគូសបញ្ជាក់ពីភាពចាំបាច់ ត្រូវតែបញ្ឈប់ការបង្ហូរឈាមឲ្យបានឆាប់បំផុតទប់ស្កាត់កុំឲ្យមានការបំផ្លាញតទៅទៀត ស្ថាប័ននានារបស់រដ្ឋស៊ីរី ការពារសិទ្ធិគ្រប់ពលរដ្ឋស៊ីរី ហើយផ្តល់ជំនួយដល់គេឲ្យប្រឈមទល់នឹងពួកជ្រុលនិយម ទល់នឹងការប្រកាន់ជំហរជាសត្រូវនឹងគ្នាតទៅទៀត ដោយមកពីមូលហេតុសាសនា។
លោក Lavrov បានបន្ថែមថា ចាំបាច់ត្រូវតែបញ្ឈប់អំពើហិង្សាក្នុងគ្រប់រូបភាពទាំងអស់ ហើយធ្វើយ៉ាងណាចាប់ផ្តើមឲ្យបានឆាប់ឡើង សំវាទរវាងរដ្ឋាភិបាលនិងភាគីប្រឆាំងនៅស៊ីរី។
តាមគំនិតផ្តួចផ្តើមរបស់ភាគីរុស្ស៊ី ក៏មានពិភាក្សាអំពីស្ថានការណ៍នៅតំបន់អាស៊ីឦសាន ក្នុងផ្ទៃនៃការសាកល្បងបរមាណូក្រោមដី ធ្វើពេលថ្មីៗដោយកូរ៉េខាងជើង។ ប្រមុខការទូតទាំងពីរបានឯកភាពគ្នាថា ចាំបាច់ត្រូវតែសហការគ្នាយ៉ាងជិតស្និទ្ធ នៅក្រុង New York ដើម្បីតាក់តែងជាចម្លើយ តបនឹងជំហានបង្ករឿងនេះពីខាងសាធារណរដ្ឋប្រជាមានិតប្រជាធិបតេយ្យកូរ៉េ។ បច្ចុប្បន្ន ក្រុមប្រឹក្សាសន្តិសុខអ.ស.ប.កំពុងពិភាក្សាបញ្ហា អាចដាក់ទណ្ឌកម្មបន្ថែមទៀតប្រឆាំងនឹងក្រុងព្យុងយ៉ាង ដោយមកពីការបំផ្ទុះគ្រាប់បែកបរមាណូក្រោមដីនោះ។
ជាបង្ហើយកិច្ច លោករដ្ឋមន្ត្រីការបរទេសរុស្ស៊ីនិងអាមេរិក បានព្រមព្រៀងគ្នាតាំងទំនាក់ទំនងនឹងគ្នាជាប់ជានិច្ចជុំវិញបញ្ហាខាងលើ ក៏ដូចជាបញ្ហាអន្តជាតិផ្សេងទៀត លុះរហូតដល់ពេលជួបនឹងគ្នាផ្ទាល់ជាលើកដំបូង ក្នុងបុន្មានសប្តាហ៏ចំពោះមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ