អូបាម៉ា-ហូឡង់៖ ខុសគ្នាមែនពិតប៉ុន្តែអាចចុះសម្រុងនឹងគ្នា
លោកប្រធានាធិបតីបារាំងហ្វ្រង់ស័រហូឡង់អញ្ជើញទៅសហរដ្ឋអាមេរិកសម្រាប់រយៈកាលបីថ្ងៃ ចាប់ពីថ្ងៃសុក្រទី១៨ឧសភានេះទៅ ដើម្បីចូលរួមប្រជុំជំនួបកំពូលG8និងជំនួបកំពូលអូតង់។ នាឱកាសនោះ លោកប្រធានាធិបតីបារាំងនឹងត្រូវទទួលដោយលោកប្រធានាធិបតីអាមេរិកបារ៉ាក់អូបាម៉ា ដើម្បីពិភាក្សាពីបញ្ហាសេដ្ឋកិច្ចនិងបញ្ហាការទូតសំខាន់ៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៥៤
សម្រាប់ប្រជាជនអាមេរិក លោកប្រធានាធិបតីបារាំងហ្វ្រង់ស័រហូឡង់ដែលទទួលដោយលោកប្រធានាធិបតីអាមេរិកបារ៉ាក់អូបាម៉ានៅថ្ងៃសុក្រទី១៨ឧសភាឆ្នាំ២០១២នេះគឺជាមនុស្សម្នាក់ដែលគេពុំបានស្គាល់សោះឡើយ។ គ្រាន់តែ លោកហ្វ្រង់ស័រហូឡង់មានស្លាកជាអ្នកសង្គមនិយមបានធ្វើឲ្យសហរដ្ឋអាមេរិកដែលជាដែនដីមូលធននិយមពិភពលោកចាប់បារម្ភរួចទៅហើយ។ ដោយហេតុថា ពាក្យ “សង្គមនិយម”នៅអឺរ៉ុបនិងនៅសហរដ្ឋអាមេរិកពុំមានន័យដូចគ្នាឡើយ។ ពាក្យ “សង្គមនិយម”នៅសហរដ្ឋអាមេរិក គេប្រើសម្រាប់តែជេរប្រមាថគូប្រជែងនយោបាយរបស់គេតែប៉ុណ្ណោះ ពុំមានន័យទូលំទូលាយនិងវិជ្ជមានដូចនៅអឺរ៉ុបទេ។
គួរកត់សម្គាល់ថា ប៉ុន្មានម៉ោងប៉ុណ្ណោះក្រោយពីលោកហ្វ្រង់ស័រហូឡង់បានទទួលជោគជ័យក្នុងការបោះឆ្នោតជ្រើសតាំងប្រធានាធិបតីបារាំងនៅជុំទី២ លោកប្រធានាធិបតីអាមេរិកបារ៉ាក់អូបាម៉ាបានទូរស័ព្ទភ្លាមមកសរសើរលោកហ្វ្រង់ស័រហូឡង់ ហើយបានអញ្ជើញលោកហ្វ្រង់ស័រហូឡង់ឲ្យមកសេតវិមានដើម្បីជួបពិភាក្សានិងដោះស្រាយជាមួយគ្នានូវបញ្ហាសេដ្ឋកិច្ចនិងបញ្ហាអន្តរជាតិសំខាន់ៗ។
វិបត្តិសេដ្ឋកិច្ច
បើគេក្រឡេកមើលតែមួយភ្លែត គេក៏យល់ភ្លាមថា លោកប្រធានាធិបតីបារាំងហ្វ្រង់ស័រហូឡង់និងលោកប្រធានាធិបតីអាមេរិកបារ៉ាក់អូបាម៉ាមានការវិភាគនិងទស្សនៈយល់ឃើញដូចគ្នា ស្ដីពីការជំរុញឲ្យមានសន្ទុះកំណើនសេដ្ឋកិច្ច។ ចំណង់ចរចាឡើងវិញរបស់លោកហូឡង់ ពាក់ព័ន្ធនឹងកិច្ចព្រមព្រៀងអឺរ៉ុបស្តីពីវិន័យថវិកា បានធ្វើឲ្យអ្នកជំនាញការសេដ្ឋកិច្ចអាមេរិកដែលមាននិន្នាការអភិរក្សនិយមកើតមានក្តីបារម្ភយ៉ាងខ្លាំង ដោយពួកគេខ្លាចវិបត្តិសេដ្ឋកិច្ចនិងវិបត្តិហិរញ្ញវត្ថុនៅអឺរ៉ុបធ្លាក់ចុះដុនដាបកាន់តែខ្លាំង។
ផ្ទុយទៅវិញ លោកប្រធានាធិបតីអាមេរិកបារ៉ាក់អូបាម៉ាមានទស្សនៈយល់ឃើញដូចលោកហូឡង់ថា “ជាការចាំបាច់គេត្រូវតែរិះរកជំរុញឲ្យមានសន្ទុះកំណើនសេដ្ឋកិច្ច ដែលជាប្រភពនៃការបង្កើតការងារជូនប្រជាពលរដ្ឋ។ ទាំងនេះពិតជាអាទិភាពសម្រាប់អឺរ៉ុបក្នុងការរិះរកដំណោះស្រាយឲ្យវិបត្តិសេដ្ឋកិច្ច។
អាហ្វហ្កានីស្ថាន
សំណុំរឿងដែលអាចបង្កឲ្យមានភាពតានតឹងរវាងទីក្រុងប៉ារីសនិងទីក្រុងវ៉ាស៊ីនតោនគឺបញ្ហាវត្តមានទាហានបារាំងនៅប្រទេសអាហ្វហ្កានីស្ថាន។ លោកហ្វ្រង់ស័រហូឡង់ធ្លាប់បានសន្យាហើយ នាឱកាសឃោសនាបោះឆ្នោតជ្រើសតាំងប្រធានាធិបតីបារាំងថា “លោកនឹងដកទ័ពបារាំងចេញពីប្រទេសអាហ្វហ្កានីស្ថានចាប់ពីខែធ្នូឆ្នាំ២០១២ ដែលខុសពីលោកអតីតប្រធានាធិបតីបារាំងនីកូឡាសាកូហ្ស៊ីដែលចង់ដកទ័ពបារាំងចេញនៅចុងឆ្នាំ២០១៣”។
រីឯសហរដ្ឋអាមេរិកវិញ គេបារម្ភខ្លាចក្រែងការដកទ័ពបារាំងចេញពីប្រទេសអាហ្វហ្កានីស្ថាន អាចនាំឲ្យប្រទេសដទៃទៀតយកតម្រាប់តាម។ ក៏ប៉ុន្តែ ប្រទេសបារាំងពុំមែនជាប្រទេសទីមួយដែលបានដកទ័ពចេញពីប្រទេសអាហ្វហ្កានីស្ថានឯណា។ មុននេះមានប្រទេសហូឡង់ដែលបានដកទ័ពចេញពីប្រទេសអាហ្វហ្កានីស្ថាននៅឆ្នាំ២០១០ ប្រទេសកាណាដាក៏បានដកទ័ពចេញពីប្រទេសអាហ្វហ្កានីស្ថាននៅឆ្នាំ២០១១រួចទៅហើយ។
អូតង់
សហរដ្ឋអាមេរិកក៏នៅរង់ចាំមើលដែរពីជំហររបស់រដ្ឋអំណាចបារាំងថ្មីពាក់ព័ន្ធនឹងតួនាទីរបស់បារាំងនៅក្នុងអង្គការបក្សសម្ព័ន្ធអូតង់។ លោកហ្វ្រង់ស័រហូឡង់ធ្លាប់បានប្រឆាំងទល់នឹងការវិលមកចូលរួមរបស់បារាំងនៅក្នុងទីបញ្ជាការអូតង់។ ប៉ុន្តែ នាឱកាសឃោសនាបោះឆ្នោតជ្រើសតាំងប្រធានាធិបតីបារាំងនៅពេលថ្មីៗកន្លងទៅនេះ លោកហ្វ្រង់ស័រហូឡង់ពុំបានបញ្ជាក់បង្ហាញឲ្យបានច្បាស់លាស់ពីជំហររបស់លោកឡើយ។ ក៏ប៉ុន្តែបុគ្គលិកលក្ខណៈរបស់ប្រមុខការទូតបារាំង លោកឡូរ៉ង់ហ្វាប៊ីយូសដែលមានទំនោរទៅរកដឺហ្គោលនិងមីតែរ៉ង់និយមក៏ជាសញ្ញាខ្លះៗបង្ហាញឲ្យឃើញពីជំហររបស់បារាំងដែរហើយ។
អ៊ីរ៉ង់និងស៊ីរី
សហការីរបស់លោកប្រធានាធិបតីបារាំងដែលទើបនឹងជាប់ឆ្នោតនៅពេលថ្មីៗនេះបានបង្ហើបឲ្យដឹងរួចហើយថា ពាក់ព័ន្ធនឹងសំណុំរឿងធំៗនៃភូមិសាស្ត្រនយោបាយ ជំហររបស់ប្រទេសបារាំងនឹងពុំមានការប្តូរប្រែអ្វីឡើយ ជាពិសេសពាក់ព័ន្ធនឹងប្រទេសស៊ីរីនិងប្រទេសអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ