រដ្ឋាភិបាលgender និងចម្រុះជាតិសាសន៍របស់លោកAyrautl
រដ្ឋាភិបាលថ្មីនៃប្រទេសបារាំងត្រូវបានប្រកាសឱ្យដឹងជាសាធារណៈកាលពីថ្ងៃពុធទី១៦ឧសភាម្សិលមិញនេះ។ រដ្ឋាភិបាលរបស់លោកនាយករដ្ឋមន្ត្រីAyrautl ដែលបានចូលរួមក្នុងកិច្ចប្រជុំគណរដ្ឋមន្ត្រីជាលើកទីមួយ នៅថ្ងៃព្រហស្បតិ៍ទី១៧ឧសភានេះ ស្តែងឱ្យឃើញនូវឆន្ទៈនយោបាយរបស់លោកប្រធានាធិបតីFrançois Hollande។
ចុះផ្សាយនៅថ្ងៃ៖ កែប្រែថ្ងៃទី៖
សមាសភាពនៃរដ្ឋាភិបាលរបស់លោកនាយករដ្ឋមន្ត្រីJean-Marc Ayrault ស្តែងឱ្យឃើញនូវឆន្ទៈនយោបាយរបស់លោកប្រធានាធិបតីFrançois Hollande។
ទីមួយ គឺឆន្ទៈនយោបាយក្នុងការគោរពល័ក្ខខ័ណ្ឌgender ៖ មានរដ្ឋមន្ត្រីប្រុស១៧នាក់និងរដ្ឋមន្ត្រីស្រី១៧នាក់។ ទីពីរ គឺឆន្ទៈនយោបាយក្នុងការដាក់បញ្ចូលទៅក្នុងរដ្ឋាភិបាលសង្គមនិយមនូវកម្លាំងនៃចលនាឆ្វេងនិយមដទៃផ្សេង រួមមានជាអាទិ៍បក្សបរិស្ថាន តំណាងដោយលោកស្រីCécile Duflot ដែលទទួលបានតំណែងជារដ្ឋមន្ត្រីលំនៅឋាន និងបក្សដាច់ខាតនិយម តំណាងដោយលោកស្រីChristiane Taubira ដែលទទួលបានតំណែងជារដ្ឋមន្រ្តីក្រសួងយុត្តិធម៌។ ទីបី គឺឆន្ទៈនយោបាយក្នុងការតែងតាំងជារដ្ឋមន្ត្រីអ្នកនយោបាយស្រករក្រោយ។ ជាក់ស្តែង ក្នុងចំណោមរដ្ឋមន្ត្រីទាំង៣៤នាក់ ៣០នាក់មិនដែលមានបទពិសោធន៍ខាងគ្រប់គ្រងក្រសួងសោះឡើយ។ ទីបួន គឺឆន្ទៈនយោបាយក្នុងការបង្កើតរដ្ឋាភិបាលចម្រុះជាតិសាសន៍មួយ។ ជាក់ស្តែង នៅក្នុងចំណោមអ្នកដែលមានតំណែងជារដ្ឋមន្ត្រីប្រតិភូឃើញមានជាអាទិ៍លោកស្រីFleur Pellerin ដែលជាជនជាតិបារាំងមានដើមកំណើតកូរ៉េ ខាងត្បូង និងដែលទទួលបានតំណែងជារដ្ឋមន្ត្រីប្រតិភូទទួលបន្ទុកខាងសហគ្រាសខ្នាតមធ្យមនិងខ្នាតតូច។
អវត្តមាន របស់លោកស្រីMartine Aubryនៅក្នុងរដ្ឋាភិបាល លោកស្រីMartine Aubryដែលជាអគ្គលេខាធិការនៃបក្សសង្គមនិយម បាននិងកំពុងបន្តបំផុសឱ្យមានសំណួរជាច្រើន។ ព័ត៌មានបានឱ្យដឹងថា លោកស្រីMartine Aubryដែលជាអ្នកនយោបាយគ្រាក់ម្នាក់ចង់បានតំណែងនាយករដ្ឋមន្ត្រី ហើយបានសម្រេចចិត្តមិនចូលរួមក្នុងរដ្ឋាភិបាល ក្រោយពីលោកប្រមុខរដ្ឋHollande បានតែងតាំងលោកJean-Marc Ayrault ជាប្រមុខរដ្ឋាភិបាល។
យ៉ាងណាក៏ដោយ រដ្ឋាភិបាលនេះជារដ្ឋាភិបាលបណ្តោះអាសន្នតែប៉ុណ្ណោះ ដ្បិតនៅខែមិថុនាខាងមុខនេះ ប្រទេសបារាំងត្រូវរៀបចំបោះឆ្នោតសភា។ សមាសភាពរដ្ឋាភិបាលនឹងត្រូវផ្លាស់ប្តូរ អាស្រ័យទៅតាមលទ្ធផលឆ្នោត ពីព្រោះលោកនាយករដ្ឋមន្ត្រីJean-MarcAyrault បានព្រមានប្រាប់ជាមុនថា រដ្ឋមន្ត្រីណាដែលចាញ់ឆ្នោតសភា នឹងមិនត្រូវអនុញ្ញាតឱ្យចូលរួមក្នុងរដ្ឋាភិបាលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ