សម្តេចឪនរោត្តម សីហនុស្នើអោយរៀបចំពិធីបូជាព្រះសពពេលព្រះអង្គសោយទិវង្គត
សម្តេចឪនរោត្តម សីហនុ បានសរសេរនៅក្នុងព្រះរាជសាររបស់ព្រះអង្គមួយដើម្បីផ្តាំផ្ញើអោយគេរៀបចំព្រះរាជពិធីបូជាព្រះសពរបស់ព្រះអង្គក្រោយពេលព្រះអង្គសោយទិវង្គត។ នេះជាព្រះរាជសារដ៏កម្រមួយក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីព្រះអង្គបានប្រកាសថា ព្រះអង្គមានវ័យជរាហើយមិនអាចសរសេរព្រះរាជសារឆ្លងឆ្លើយជាមួយអ្នកដែលសរសេរថ្វាយព្រះអង្គឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ព្រះមហាវីរក្សត្រសម្តេចឪនរោត្តម សីហនុបានធ្វើព្រះរាជសារមួយផ្តាំផ្ញើអោយមានការរៀបចំព្រះរាជពិធីបូជាព្រះសពរបស់ព្រះអង្គ ក្រោយពេលដែលព្រះអង្គសោយទិវង្គត។ ព្រះរាជបណ្តាំនេះត្រូវបានព្រះអង្គសរសេរជាភាសាបារាំង ហើយព្រះរាជខុទ្ទកាល័យរបស់ព្រះអង្គផ្ញើមកអ្នកសារព័ត៌មាន។
ព្រះរាជសារមាន៣ចំណុចដែលព្រះអង្គមានព្រះរាជសំណេរខ្លីៗ។ ទីមួយគឺព្រះអង្គបញ្ជាក់លុបចោលព្រះរាជបណ្តាំមុនៗដែលព្រះអង្គធ្លាប់មានព្រះរាជបន្ទូលថា មិនអោយគេបូជាព្រះសពរបស់ព្រះអង្គ។
ទី២ បើយោងតាមព្រះរាជសំណេររបស់ព្រះអង្គ នៅពេលដែលព្រះអង្គសោយទិវង្គត ព្រះអង្គផ្តាំអោយមានការរៀបចំពិធីបូជាព្រះសពរបស់ព្រះអង្គនៅលើវាលមេរុទៅតាមប្រពៃណីសាសនាខ្មែរ។
ទី៣ មួយថ្ងៃបន្ទាប់ពីពិធីបូជាព្រះសព សម្តេចឪនរោត្តម សីហនុបានមានព្រះរាជបន្ទូលអោយដឹងថា អដ្ឋិធាតុរបស់ព្រះអង្គនឹងត្រូវលាងសម្អាតហើយដាក់នៅក្នុងកោដ្ឋមួយ ជាកោដ្ឋធ្វើអំពីមាសក៏បាន ឬកោដ្ឋធម្មតាក៏បាន។
កោដ្ឋនោះត្រូវយកទៅតម្កល់នៅក្នុងចេតិយគន្ធបុប្ជានៅក្នុងព្រះវិហារព្រះកែវមរកតក្នុងព្រះបរមរាជវាំង។
សម្តេចឪនរោត្តម សីហនុក៏បានមានព្រះរាជឱង្ការបញ្ជាក់ផងដែរថា នៅពេលដែលសម្តេចម៉ែសោយទិវង្គតព្រះអង្គសូមអោយគេរៀបចំធ្វើដូចគ្នាដូចករណីរបស់ព្រះអង្គដែរ។
គួររម្លឹកថា សម្តេចឪនិងសម្តេចម៉ែ បានសម្រេចព្រះទ័យ ហើយបានប្រកាសជាឱឡារិកនៅក្នុងព្រះរាជពិធីរម្លឹកឆ្នាំទី២០នៃការយាងមាតុភូមិរបស់ព្រះអង្គមកកម្ពុជាថា ព្រះអង្គទាំងពីរនឹងឈប់យាងចាកចេញទៅទីក្រុងប៉េកាំងដើម្បីទទួលការព្យាបាលព្រះរោគហើយ។ គឺព្រះអង្គនឹងគង់ប្រថាប់ជាមួយកូនចៅព្រះអង្គរហូត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ