ព្រះមហាវីរក្សត្រគាំទ្រលោកហ៊ុន សែនធ្វើជានាយករដ្ឋមន្ត្រី
សម្តេចឪនរោត្តម សីហនុបានចេញព្រះរាជសារមួយ នៅថ្ងៃសុក្រនេះ ដើម្បីរម្លឹកថា ព្រះអង្គនៅតែគាំទ្រលោកហ៊ុន សែន ធ្វើជានាយករដ្ឋមន្ត្រីកម្ពុជា។ ហើយថា ជំហរបែបនេះរបស់ព្រះអង្គ គឺនៅតែមានរហូតដល់ជីវិតចុងក្រោយរបស់ព្រះអង្គ។ ព្រះរាជសារនេះត្រូវបានធ្វើឡើង នៅមុនពេលដែលព្រះអង្គ និងលោកនាយករដ្ឋមន្ត្រីនឹងជួបគ្នា នៅក្នុងសប្តាហ៍ក្រោយ នៅក្នុងទីក្រុងប៉េកាំង។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុចពីទីក្រុងភ្នំពេញ
នៅក្នុងព្រះរាជសារដ៏ខ្លីមួយដែលព្រះអង្គសរសេរជាភាសាបារាំងចុះថ្ងៃទី១០ធ្នូនេះ សម្តេចឪនរោត្តម សីហនុបានមានព្រះរាជបន្ទូលថា ព្រះអង្គនៅតែគាំទ្រលោកហ៊ុន សែន ធ្វើជានាយករដ្ឋមន្ត្រីរបស់ប្រទេសកម្ពុជា។ ហើយថា ជំហរបែបនេះ គឺព្រះអង្គធ្លាប់បានបង្ហាញជាច្រើនលើក ច្រើនសាមកហើយ។
ពីទីក្រុងប៉េកាំង ទីដែលព្រះអង្គគង់សំរាកព្យាបាលព្រះរោគនោះ ព្រះមហាវីវក្សត្របានមានព្រះរាជឱង្កា នៅក្នុងព្រះរាជសារដែលព្រះអង្គសរសេរថា”ជាសេចក្តីថ្លែងការណ៍នោះ” ថា ព្រះអង្គបាននិយាយ និងសរសេរជាច្រើនដងហើយថា ព្រះអង្គគាំទ្រលោកហ៊ុន សែន១០០ភាគរយ ក្នុងសមត្ថភាពលោកហ៊ុន សែនជាប្រមុខរដ្ឋាភិបាលកម្ពុជា។ ហើយថា “ការគាំទ្រនេះនឹងបន្តរហូតដល់ជីវិតចុងក្រោយរបស់ព្រះអង្គ។ ជំហររបស់ព្រះអង្គនឹងមិនផ្លាស់ប្តូរឡើយ"។ ព្រះមហាវីវក្សត្របានមានព្រះរាជបន្ទូលបញ្ចប់ព្រះរាជសារដោយព្រះអង្គបានសរសេរថា ព្រះអង្គបានចូលនិវត្តន៍ហើយ។ ព្រះអង្គមិនធ្វើនយោបាយទៀតទេ។
នៅក្នុងសប្តាហ៍ក្រោយនេះ លោកនាយករដ្ឋមន្ត្រីហ៊ុន សែននឹងចូលគាល់សម្តេចឪនរោត្តម សីហនុ និងសម្តេចម៉ែនៅក្នុងព្រះរាជវាំងក្រុងប៉េកាំង ប្រទេសចិន ក្នុងឱកាសដែលលោកត្រូវធ្វើទស្សនកិច្ចផ្លូវការ នៅប្រទេសចិនចាប់ពីថ្ងៃទី១៣ ដល់ថ្ងៃទី១៧ធ្នូ។ ជាទស្សនកិច្ចដែលត្រូវបានធ្វើឡើងតាមការអញ្ជើញរបស់លោកនាយករដ្ឋមន្ត្រីវេន ជាបាវ (Wen Jiabao)។
គួរបញ្ជាក់ថា ព្រះរាជសាររបស់សម្តេចឪនរោត្តម សីហនុត្រូវបានផ្សព្វផ្សាយមួយថ្ងៃក្រោយ ពីលោកនាយករដ្ឋមន្ត្រីបានធ្វើអត្ថាធិប្បាយចំពោះកាយាងនិវត្តរបស់សម្តេចក្រុមព្រះនរោត្តម រណឬទ្ធិចូលមកក្នុងឆាកនយោបាយវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ