ព្រះអង្គម្ចាស់រណឫទ្ធិប្រកាសចូលឆាកនយោបាយ អំពាវនាវអោយអ្នកគាំទ្ររួមជាមួយព្រះអង្គ
ព្រះអង្គម្ចាស់នរោត្តម រណឫទ្ធិបានប្រកាសជាសាធារណៈដោយព្រះអង្គឯង កាលពីចុងសប្តាហ៍កន្លងទៅ ថា ព្រះអង្គពិតជានឹងចូលក្នុងឆាកនយោបាយវិញ។ ព្រះអង្គក៏បានអំពាវនាវអោយអ្នកគាំទ្ររាជានិយមទាំងអស់ រួមទាំងអ្នកគាំទ្រគណបក្សហ៊្វុនស៊ីនប៉ិចផង អោយមករួបរួមជាមួយគណបក្សរបស់ព្រះអង្គ។ វត្តមានរបស់ព្រះអង្គម្ចាស់នរោត្តម រណឫទ្ធិនៅពេលនេះបង្ហាញថា ទំនងជាគ្មានទៀតឡើយ សម្ព័ន្ធភាពរវាងហ៊្វុនស៊ីនប៉ិច និងក្រុមអ្នកស្មោះស្ម័គ្រព្រះអង្គម្ចាស់រណឫទ្ធិ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុច ពីភ្នំពេញ
មិនចាំបាច់រង់ចាំដល់ថ្ងៃសៅរ៍ទី១១ធ្នូ ចាំសមាជគណបក្សជាតិនិយមប្រកាសយាងព្រះអង្គម្ចាស់នរោត្តម រណឫទ្ធិធ្វើជាប្រធានគណបក្សដែលនឹងត្រូវផ្លាស់ប្តូរឈ្មោះទៅជាគណបក្សនរោត្តម រណឫទ្ធិនោះឡើយ។ ព្រះម្ចាស់រណឫទ្ធិបានបញ្ជាក់ជាសាធារណៈហើយថា ព្រះអង្គនឹងយាងចេញពីការចូលនិវត្តន៍ ត្រឡប់មកឆាកនយោបាយវិញ មកដឹកនាំគណបក្សនរោត្តម រណឫទ្ធិ។ ព្រះអង្គម្ចាស់រណឫទ្ធិបានចេញព្រះភក្រ្តជួបអ្នកគាំទ្រព្រះអង្គនៅក្នុងខេត្តកំពង់ចាម កាលពីចុងសប្តាហ៍កន្លងទៅនេះ ដូចដែលព្រះអង្គកំពុងធ្វើនយោបាយ អ៊ីចឹង។ ព្រះអង្គម្ចាស់រណឫទ្ធិបានប្រៀបធៀបការវិលត្រលប់របស់ព្រះអង្គក្នុងនាមជាអតីតអ្នកនយោបាយ ថាដូចជាការសេពគ្រឿងញៀន។
វត្តមានរបស់ព្រះអង្គម្ចាស់នរោត្តម រណឫទ្ធិនៅពេលនេះ អាចជាឧបសគ្គនៃគម្រោងធ្វើសម្ព័ន្ធភាពរវាងគណបក្សហ៊្វុនស៊ីនប៉ិច និងគណបក្សជាតិនិយម។ កាលពីប៉ុន្មានខែមុននេះ នៅពេលដែលគណបក្សទាំងពីរប្រកាសរួមបញ្ចូលគ្នា ព្រះអង្គម្ចាស់នរោត្តម រណឫទ្ធិបានសរសេរលិខិតទៅកាន់ថ្នាក់ដឹកនាំគណបក្សជាតិនិយមដែលព្រះអង្គធ្លាប់ដឹកនាំ ដើម្បីសម្តែងការព្រួយបារម្ភអំពីការបាត់បង់តំណែងមន្ត្រីគណបក្សមួយចំនួនដែលនៅក្នុងរដ្ឋសភា ក្រុមប្រឹក្សាឃុំ សង្កាត់ ស្រុក ខណ្ឌ ខេត្តក្រុង ជាពិសេសអត្តសញ្ញាណរបស់គណបក្ស ប្រសិនបើគណបក្សទាំងពីររួមបញ្ចូលគ្នាមែននោះ។
កាលពីចុងសប្តាហ៍កន្លងទៅនេះ នៅក្នុងឱកាសជួបជាមួយអ្នកគាំទ្រ ព្រះអង្គម្ចាស់រណឫទ្ធិក៏បានថ្លែងអំពាវនាវប្រមូលសមាជិកគណបក្សហ៊្វុនស៊ីនប៉ិច អោយមកចូលរួមជាមួយព្រះអង្គផងដែរ។ លោកប៉ែន សង្ហា អ្នកនាំពាក្យគណបក្សជាតិនិយម បានអត្ថាធិប្បាយខ្លីថា នេះជាមូលដ្ឋានមួយដែលបង្ហាញផ្លូវដើររបស់អនាគតគណបក្សនរោត្តម រណឫទ្ធិ។
ទាក់ទងនឹងសកម្មភាពរបស់ព្រះអង្គម្ចាស់នរោត្តម រណឫទ្ធិនេះ លោកកែវ ពុទ្ធរស្មី ប្រធានគណបក្សហ៊្វុនស៊ីនប៉ិច បានថ្លែងប្រាប់វិទ្យុបារាំងអន្តរជាតិថា លោកនៅមិនទាន់អាចអត្ថាធិប្បាយអ្វីនៅឡើយទេ ចំពោះអនាគតនៃសម្ព័ន្ធភាពនោះ ដោយលោកនៅរង់ចាំមើលគណបក្សជាតិនិយម ដែលនឹងត្រូវផ្លាស់ប្តូរឈ្មោះថ្មី។ លោកកែវ ពុទ្ធរស្មីបានសួរខ្លួនឯងថា មិនដឹងថាគណបក្សជាតិនិយមប្តូរឈ្មោះថ្មីហើយ មានជំហរថ្មីដែរឬយ៉ាងណានោះឡើយ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ