ប្រទេសរុស្ស៊ី កញ្ជ្រោកដោយបាតុកម្មនិងមិទ្ទិញ
ខ្លាំងជាងគេគឺនៅរដ្ឋធានីម៉ូស្គូតែម្តងដែលរសៀលថ្ងៃនេះមានមិទ្ទិញប្រព្រឹត្តទៅនៅតាមទីលានធំៗ៤កន្លែង។មិទ្ទិញទាំងនេះដែលចូលរួមដោយមនុស្សជាង១សែននាក់គឺប្រឆាំងរដ្ឋាភិបាលផងគាំទ្ររដ្ឋាភិបាលផងហើយសុទ្ធតែបានទទួលសេចក្តីអនុញ្ញាតពីអាជ្ញាធរ។វាធ្វើឡើងថ្ងៃនេះគឺនៅចំថ្ងៃចាប់ផ្តើមជាផ្លូវការការឃោសនាដណ្តើមយកសំឡេងអ្នកស្រុកម្ចាស់ឆ្នោតកាលដែលនៅសល់មួយខែគត់ដល់ពេលបោះឆ្នោតរើសប្រធានាធិបតីផ្ទាល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៦
ជាបឋម គួរនិយាយថា សូម្បីតែធាតុអាកាសកំពុងត្រជាក់ដល់ប្រមាណ ២០អង្សាក្រោម សូន្យក្តី ក៏ប៉ូលីសចំនួនសរុបទៅ៩.០០០នាក់ ដែលពង្រាយសម្រាប់ធានាសន្តិសុខ ហាមមិនឲ្យ យក បំពង់ដបទឺកតែក្តៅៗ ចូលក្នុងទីលានមិទ្ទិញឡើយ ក្រោមលេសថា បង្ការទល់នឹងភេរវកម្ម ជាយថាហេតុ។ ចំណែកមិទ្ទិញផ្ទាល់ មានទម្រង់ដូចតទៅ៖
ទី១-គឺមិទ្ទិញនៃបក្សពួក ដែលប្រឆាំងនឹងរដ្ឋាភិបាល ក្រោមពាក្សស្លោក “ដើម្បីការបោះឆ្នោត សុចរិត” ដូចដែលគេបានធ្វើយ៉ាងគគ្រឹកគគ្រេងអស់២លើក កាលពីខែធ្នូ ប្រឆាំងនឹងការក្លែងបន្លំ សន្លឹកឆ្នោត នាពេលបោះឆ្នោតសភាកន្លងទៅ។ ការទាមទារលើកនេះ គឺនៅដដែល ឲ្យ រដ្ឋអំណាច លុបចោលលទ្ធផលបោះឆ្នោតនោះ ហើយធ្វើការបោះឆ្នោតថ្មី និងឲ្យដោះលែងរាល់ អ្នកទោសនយោបាយ។ ប៉ុន្តែសំខាន់បំផុត គឺគេសាមគ្គីគ្នា ប្រឆាំងដាច់ខាត ទល់នឹងបេក្ខភាព លោកនាយករដ្ឋមន្ត្រីពូទីន ក្នុងការបោះឆ្នោតថ្ងៃមុខ ដោយបន្លឺឡើងនូវ ពាក្យស្លោកថា “ គ្មាន សំឡេងគាំទ្រ ១សំឡេងឡើយ សម្រាប់ពូទីន ! “។ តាមការសង្កេតឃើញនៃអាជ្ញាធរ ក្នុងមិទ្ទិញនេះ មានមនុស្សចូលរួមម្តុំ ២ម៉ឹន៣ពាន់នាក់ប៉ុណ្ណោះ ទល់នឹងគម្រោងដល់៥ម៉ឺននាក់។
ទី២- គឺមិទ្ទិញគាំទ្ររដ្ឋាភិបាល ក្រោមបាវចនាថា “ដើម្បីអនាគតប្រទេសរុស្ស៊ី “។ ពាក្យស្លោកបន្លឺ ឡើងក្នុងមិទ្ទិញនេះ គឺដូចតទៅ ៖ “ សមិទ្ធិផលដែលរុស្ស៊ី មានសព្វថ្ងៃ គឺអាចបាត់បង់ទៅ បើ របស់ដែលហៅថា “បដិវត្តន៍មានពណ៌”ស្រាប់តែកើតឡើងនៅរុស្ស៊ី , ដើម្បីប្រទេសរុស្ស៊ីមាន អានុភាពខ្លាំងក្លា , ដើម្បីអំណាចដ៏រឹងមាំនៅរុស្ស៊ី , យើងមិនបណ្តោយ ឲ្យប្រទេសរុស្ស៊ីបែកខ្ញែក ឡើយ។ មិទ្ទិញនេះ ចាត់ចែងឡើង ដោយ គណបក្ស” អ្នកស្នេហាមាតុភូម៌” , “សមាគមអ្នកចូល និវត្តន៍” , “ ពួកយុទ្ធជនជើងចាស់នៃសង្គ្រាមសូវៀតនៅ អាហ្វហ្កានីស្ថាន ពីឆ្នាំ១៩៧៩ ដល់ ១៩៨៩”។ លោកពូទីនផ្ទាល់បានថ្លែងសាមគ្គី ជាមួយនឹងគោលដៅចោទដោយមិទ្ទិញនេះ។ ជាកាកត់សម្គាល់ សហជីពអ្នកបើក Taxi បានប្រកាសដឹកអ្នកដែលទៅចូលរួមក្នុងមិទ្ទិញនេះ ដោយឥតយកថ្លៃទេ។ តាមតួលេខមហាផ្ទៃម៉ូស្គូ ចូលរួមក្នុងមិទ្ទិញនេះ គឺប្រជាពលរដ្ឋ ដល់ ៩ម៉ឺននាក់។
ទី៣- គឺមិទ្ទិញ ពួកជាតិនិយមគាំទ្រ ដល់ បេក្ខជនបក្សជាតិនិយមរុស្ស៊ី លោក Zhirinovski ដែលថា “ទឹកដីរុស្ស៊ីសម្រាប់ជាតិរុស្ស៊ី” និងដែលសន្យាថា បើគាត់ឈ្នោះឆ្នោតជាប្រធានាធិបតី គាត់នឹងលុបចោល ពាក្យថា President ជាពាក្យបរទេស សម្រាប់ហៅឋានៈជាប្រធានាធិបតីនៅ រុស្ស៊ី ហើយគាត់នឹងជំនួសវា ដោយពាក្យថា “ ប្រមុខនៃសហព័ន្ធរុស្ស៊ី” មានឋានៈស្មើ”ស្តេច Tsar ។
ទី-៤ គឺមិទ្ទិញ ពួក”អ្នកប្រជាធិបតេយ្យស្អាតស្អំ” ដែលដឹកនាំដោយលោកស្រី Novodvorskaya ដែលល្បីខាងការពារសិទ្ធិមនុស្ស ហើយទិតៀនគ្មានឈប់របបគ្រប់គ្រងនៅរុស្ស៊ី តាំងពី ជំនាន់សូវៀតមក។
មិទ្ទិញក្រោមបាវចនា “ដើម្បីការបោះឆ្នោតសុចរិត” ថ្ងៃនេះ ប្រព្រឹត្តទៅ នៅតាមក្រុងចំនួន១០០ នៃប្រទេសរុស្ស៊ី និងនៅតាម៣០ក្រុង នៃ១៧ប្រទេសបស្ចិមលោក ធំជាងគេ គឺនៅ ប្រទេស អាល្លឺម៉ង់ និង ស.រ.អា.៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ