សហជីពអំពាវនាវកុំអោយឡើងថ្លៃឈ្នួលផ្ទះចំពោះកម្មករ
សហភាពសហជីពកម្ពុជាបានធ្វើសេចក្តីថ្លែងការណ៍មួយ នៅថ្ងៃចន្ទនេះ អំពាវនាវដល់ម្ចាស់ផ្ទះជួលសម្រាប់កម្មករកាត់ដេរទាំងអស់ កុំអោយដំឡើងថ្លៃជួលផ្ទះ។ ការអំពាវនេះត្រូវបានធ្វើឡើងខណៈសហភាពសហជីពកម្ពុជាទទួលបានព័ត៌មានថា ម្ចាស់ផ្ទះមួយចំនួនបានដំឡើងថ្លៃឈ្នួលផ្ទះ នៅពេលដែលកម្មករទទួលបានការតម្លើងប្រាក់ឈ្នួលនោះ។
ចុះផ្សាយនៅថ្ងៃ៖
ស្តាប់ - ០១:៤៨
សហភាពសហជីពកម្ពុជាបានអំពាវនាវអោយម្ចាស់ផ្ទះដែលមានបន្ទប់ជួលអោយកម្មករ កម្មការិនីកាត់ដេរ កុំដំឡើងថ្លៃឈ្នួលខ្ពស់ពេក បើទោះជាកម្មករ កម្មការិនីបានទទួលការដំឡើងប្រាក់ឈ្នួលក៏ដោយ។ នៅក្នុងសេចក្តីអំពាវនាវដែលត្រូវបានផ្សព្វផ្សាយ នៅថ្ងៃទី៦ឧសភានេះ លោករ៉ុង ឈុនអះអាងថា ការដំឡើងប្រាក់ឈ្នួលជួលបន្ទប់ស្នាក់នៅនឹងធ្វើអោយប៉ះពាល់ដល់ជីវភាពរបស់កម្មករ កម្មការិនីជាដដែល ខណៈការដំឡើងប្រាក់ខែគោលនៅមានចំនួនតិចតួចនៅឡើយ។
សេចក្តីអំពាវនាវរបស់របស់សហភាពសហជីកម្ពុជាធ្វើឡើងនៅពេលដែលសហជីពមួយនេះបានទទួលព័ត៌មានអំពីការដំឡើងប្រាក់ឈ្នួលជួលបន្ទប់ស្នាក់នៅរបស់ម្ចាស់ផ្ទះមួយចំនួន។ លោករ៉ុង ឈុនបានអះអាងថា ម្ចាស់ផ្ទះមួយចំនួនដែលធ្លាប់ជួលបន្ទប់អោយកម្មករក្នុងតម្លៃ ១៥ដុល្លារ ក្នុងមួយខែ បានដំឡើងដល់២០ដុល្លារ។ រីឯអ្នកដែលធ្លាប់បានយកថ្លៃឈ្នួល២០ដុល្លារ ក៏ដំឡើងដល់២៥ដុល្លារ ជាដើម។
ប្រធានសម័្ពន្ធសហជីពប្រជាធិបតេយ្យកម្មករកាត់ដេរកម្ពុជាលោក អាត់ ធន់ បានយល់ស្របថា មានករណីម្ចាស់ផ្ទះមួយចំនួនធំដំឡើងប្រាក់ឈ្នួលជួលបន្ទប់ស្នាក់នៅរបស់កម្មករមែន។ លោកអាត់ ធន់អត្ថាធិប្បាយថា ប្រសិនបើម្ចាស់ផ្ទះដំឡើងប្រាក់ឈ្នួលដដែល ប្រាក់ខែគោលដែលត្រូវបានសម្រេចដំឡើងអោយកម្មករ កម្មការិនីនោះ គឺយកអោយទៅម្ចាស់ផ្ទះជួលទៅវិញទេ។
ទោះយ៉ាងណាក៏ដោយ ចំពោះលោក អាត់ ធន់ ក្រៅពីការយោគយល់របស់ម្ចាស់ផ្ទះជួលហើយ រាជរដ្ឋាភិបាលគួរតែប្រឹងប្រែងបញ្ចុះតម្លៃទំនិញទីផ្សារអោយខាងតែបាន។
គួរបញ្ជាក់ថាចាប់ពីខែឧសភានេះទៅ បន្ទាប់ពីមានការចរចារទាមទារដំឡើងប្រាក់ខែអប្បបរមារបស់កម្មករ កម្មការិនីក្នុងវិស័យវាយនភណ្ឌ កម្មករ កម្មការិនីនឹងទទួលបានប្រាក់ឈ្នួលអប្បបរមាចំនួន៧៥ដុល្លារ និងប្រាក់សុខភាព៥ដុល្លារទៀត។ មុននេះ ប្រាក់ឈ្នួលអប្បបរមាកម្មករ កម្មការិនីមានតែ៦១ដុល្លារ ដោយមិនទាន់រាប់បញ្ចូលប្រាក់ថែទាំសុខភាព៥ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ