នាយករដ្ឋមន្ត្រីថៃរងសម្ពាធថ្មីក្រោយការរុះរើរដ្ឋាភិបាល
ការរុះរើគណៈរដ្ឋមន្ត្រីថៃម្សិលមិញ បានបង្កបង្កើតជាសង្គ្រាមប៉ាកកា យ៉ាងផុសផុលបំផុត និងក្លាយជាប្រធានបទចម្បង នៅទំព័រមុខកាសែតជាតិ ថ្ងៃនេះតែម្តង ដើម្បីវាយប្រហារ លោកស្រីយីងឡាក់ ដែលបើតាមបក្សប្រឆាំង បានតែងតាំងមន្ត្រីមិនស្អាតស្អំ ក្នុងជួររដ្ឋាភិបាល។ ម្នាក់មានជាប់ពាក់ព័ន្ធនឹងអំពើពុករលួយក្នុងបញ្ជីខ្មៅរបស់សហរដ្ឋអាមេរិក និងម្នាក់ទៀតធ្លាប់ជាប់សង្ស័យថាជាភេរវជន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
រដ្ឋមន្ត្រីទាំងអស់សុទ្ធតែងតាំងឡើងដោយមានការគាំទ្រពីរដ្ឋធម្មនុញ្ញ ! នេះជាប្រសាសន៍ការពារខ្លួនរបស់លោកស្រីនាយករដ្ឋមន្ត្រីថៃ យីងឡាក់ ស៊ីណាវ៉ាត់។
ប៉ុន្តែសម្រាប់បក្សប្រឆាំង ទោះបីជារដ្ឋធម្មនុញ្ញមិនបានហាមឃាត់ក៏ដោយ ក៏រដ្ឋាភិបាលនីមួយៗត្រូវចេះមានសតិសម្បជញ្ជៈ មិនគួរណាតែងតាំងមនុស្សមានជាប់រឿងអាស្រូវ និងគាំទ្រអំពើពុករលួយ ក្នុងជួរថ្នាក់ដឹកនាំប្រទេសទេ។
ការរិះគន់នេះ ធ្វើឡើងបន្ទាប់ពី មានការរុះរើគណៈរដ្ឋមន្ត្រី ដោយម្សិលមិញ លោកស្រីនាយករដ្ឋមន្ត្រី បានតែងតាំង មេដឹកនាំចលនាអាវក្រហមម្នាក់ ជាអនុរដ្ឋមន្ត្រីក្រសួងកសិកម្មនិងសហប្រតិបត្តិការ និងស្ត្រីពាណិជ្ជករម្នាក់ ជារដ្ឋមន្ត្រីអមនាយករដ្ឋមន្ត្រី។
ណាតាវុធ សៃកឿ អនុរដ្ឋមន្ត្រីក្រសួងកសិកម្មទើបតែងតាំងថ្មីថ្មោង ធ្លាប់បានដើរតួនាទីយ៉ាងសំខាន់ក្នុងពេលបាតុកម្មកណ្តាលក្រុងបាងកក កាលពីឆ្នាំ២០១០ ប្រឆាំងនឹងរដ្ឋាភិបាលអាភិស៊ីត បន្ទាប់មកត្រូវជាប់ពន្ធនាគារ៩ខែពីបទមានពាក់ព័ន្ធនឹងអំពើភេរវនិយម។
ចំណែករដ្ឋមន្ត្រីអមនាយករដ្ឋមន្ត្រីថ្មីវិញ តាំងពីឆ្នាំ២០០៨មក លោកស្រីណាលីនី តាវីសាំង បានជាប់ឈ្មោះក្នុងបញ្ជីខ្មៅរបស់សហរដ្ឋអាមេរិក - ជាមនុស្សជំនិត រកស៊ីជួញដូរត្បូងថ្មមានតម្លៃជាមួយនឹងប្រធានាធិបតីហ្ស៊ីមបាវ៉េ លោក រ៉ូប៊ែរ មូហ្កាបេ។ លោក មូហ្កាបេ និងសាច់ញាតិដែលជាប់ទណ្ឌកម្មសហរដ្ឋអាមេរិក និងសហភាពអឺរ៉ុប តាំងពីឆ្នាំ២០០២មក ពីបទប្រព្រឹត្តអំពើរំលោភសិទ្ធិមនុស្ស ប្រើអំណាចផ្តាច់ការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ