សកម្មជនថៃអាវលឿងផ្សាយព័ត៌មានញុះញង់អោយធ្វើភេរវកម្ម
ក្រសួងការពារជាតិកម្ពុជា បានធ្វើសេចក្តីថ្លែងការណ៍បន្ទាន់មួយ ច្រានចោលព័ត៌មានរបស់សកម្មជនអាវលឿងថៃដែលនិយាយថា ក្រុមលោកថាក់ស៊ីនបានជួលទាហានខ្មែរ៥០០០នាក់ដើម្បីជួយប្អូនស្រីជានាយករដ្ឋមន្ត្រីនិងក្រុមលោកថាក់ស៊ីន ក្នុងករណីមានរដ្ឋប្រហារ។ ក្រសួងការពារជាតិកម្ពុជាស្នើអោយអាជ្ញាធរថៃចាត់វិធានការលើការផ្សព្វផ្សាយព័ត៌មានអុជអាល របស់ក្រុមអាវលឿងថៃនេះ។
ចុះផ្សាយនៅថ្ងៃ៖
ស្តាប់ - ០១:៣១
កម្ពុជាបានស្នើអោយអាជ្ញាធរថៃចាត់វិធានការចំពោះការផ្សាយព័ត៌មានរបស់ក្រុមថៃអាវលឿងដែលកម្ពុជាចាត់ទុកថាជាព័ត៌មានប្រឌិត ញុះញង់ ហើយមានចរិតចង់បង្កអោយមានភេរវកម្ម។ រដ្ឋាភិបាលកម្ពុជាតាមរយៈក្រសួងការពារជាតិបានធ្វើសេចក្តីថ្លែងការណ៍ច្រានចោលការអត្ថាធិប្បាយរបស់លោកស៊ុមគៀត ផុងផៃប៊ូនដែលជាសកម្មជនថៃអាវលឿង។
សកម្មជនអាវលឿងថៃរូបនេះដែលត្រូវបានដកស្រង់សម្តីដោយសារព័ត៌មាន អ៊ីនថឺនែត ASTV manager onlineថា ខ្លួនបានដឹងថា ក្រុមលោកថាក់ស៊ីនបានជួលទាហានខ្មែរ៥០០០នាក់នៅតាមបណ្តោយព្រំដែនវៀតណាមកម្ពុជាទុកសំរាប់ជួយប្អូនស្រី និងក្រុមលោកថាក់ស៊ីន ក្នុងករណីមានរដ្ឋប្រហារសាជាថ្មីនៅក្នុងប្រទេសថៃ។
សម្រាប់កម្ពុជា ការផ្សាយព័ត៌មានប្រឌិតបែបនេះ វាបានធ្វើអោយប៉ះពាល់ដល់មិត្តភាព និងសហប្រតិបត្តិការរវាងប្រទេសជិតខាងទាំងពីរដែលកម្ពុជាផ្តល់តម្លៃខ្ពស់ ហើយថាវាក៏បានប៉ះពាល់ទៅដល់ស្មារតីនៃកិច្ចព្រមព្រៀងក្នុងក្របខ័ណ្ឌគណៈកម្មាធិការព្រំដែនទូទៅរបស់ក្រសួងការពារជាតិកម្ពុជាថៃផងដែរ។
ម្ល៉ោះហើយកម្ពុជាបានស្នើអោយអាជ្ញាធរមានសមត្ថកិច្ចថៃចាត់វិធានការចំពោះលោកស៊ុមគៀត ផុងផៃប៊ូន។
នៅក្នុងសេចក្តីថ្លែងការណ៍របស់ខ្លួន អ្នកនាំពាក្យក្រសួងការពារជាតិកម្ពុជាសរសេរប្រាប់ថៃថា ការផ្សព្វផ្សាយព័ត៌មានបែបនេះក៏អាចចាត់ទុកថាជាទិសដៅនិងជាសកម្មភាពប៉ុនប៉ងខាងភេរវកម្មក្នុងបំណងអាក្រក់ដែលធ្វើអោយប៉ះពាល់ដល់ស្ថិរភាពនិងសន្តិសុខក្នុងតំបន់ ជាពិសេស ក្នុងខណៈដែលកម្ពុជាកំពុងត្រៀមខ្លួនធ្វើជាម្ចាស់ផ្ទះអាស៊ាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ