គីម ជុងអ៊ីល ទៅជួបថ្នាក់ដឹកនាំចិនជាលើកទីពីរ ក្នុងរយៈពេលតែបួនខែ
គីម ជុងអ៊ីល (Kim Jong-Il) អគ្គមគ្គទេសក៍កូរ៉េខាងជើងប្រហែលជាទៅបំពេញទស្សនកិច្ច នៅប្រទេសចិន ក្នុងថ្ងៃព្រហស្បតិ៍ទី២៦សីហានេះ ដោយជិះរថភ្លើងពិសេសដែលបាញ់មិនធ្លុះ ដូចពេលមុនៗដែរ។ ដំណឹងនេះចេញមកពីប្រភពប្រធានាធិបតីកូរ៉ខាងត្បូង ទោះបីជាមិនទាន់មានការបញ្ជាក់អះអាងជាផ្លូវការពីខាងប្រទេសចិនក៏ ដោយ។ តើហេតុអ្វីបានជាក្នុងរយៈពេលតែបួនខែប៉ុណ្ណោះ បុរសខ្លាំងនៃរបបកុម្មុយនិស្តព្យុងយ៉ាង (Pyongyang) ទៅធ្វើទស្សនកិច្ចដល់ទៅពីរដងនៅប្រទេសចិន?
ចុះផ្សាយនៅថ្ងៃ៖
បទអន្តរាគមន៍របស់ តាន់ ហ្សង់-ហ្វ្រង់ស្វ័រ
ព័ត៌មានទាំងអម្បាលម៉ានដែលទទួលបាននៅថ្ងៃទី២៦សីហានេះ បានឲ្យដឹងថាលើកនេះ គីម ជុងអ៊ីល បាននាំកូនពៅរបស់គាត់ឈ្មោះ គីម ជុងអ៊ុន (Kim Jong-Un) ទៅជាមួយផង។
គួរនិយាយថា តាមគម្រោងការស្នងតំណែងដែល គីម ជុងអ៊ីល បានតុបតែង និងដែលរដ្ឋសភាជាតិកូរ៉េខាងជើងរួមប្រជុំគ្នាជាវិសាមញ្ញបានឲ្យសច្ចាប័នកាលពីខែមិថុនាកន្លងទៅនេះ គឺ គីម ជុង អ៊ុន នេះហើយដែលនឹងត្រូវឡើងមកគ្រប់គ្រងប្រទេសជំនួស គីម ជុងអ៊ីល នាពេលខាងមុខ។
ម្ល៉ោះហើយ ការនាំកូនប្រុសរូបនេះ ដែលជាអនាគតអគ្គមគ្គទេសក៍ ទៅជួបថ្នាក់ដឹកនាំប្រទេសចិនដែលជាប្រទេសរៀមច្បងរបស់កូរ៉េខាងជើង អាចជាគោលដៅសំខាន់ជាងគេមួយនៃទស្សនកិច្ចនៅប្រទេសចិនលើកនេះរបស់ គីម ជុងអ៊ីល។ គួររំឭកឡើងវិញថា គីម ជុងអ៊ីល មានជម្ងឺប្រចាំកាយ ជាហេតុជំរុញឲ្យក្រុមអ្នកសង្កេតការណ៍អះអាងថា ការស្នងតំណែងនៅទីក្រុងព្យុងយ៉ាង អាចនឹងប្រព្រឹត្តទៅយ៉ាងយូរនៅឆ្នាំ២០១២។
ភាពតានតឹងរវាងកូរ៉េខាងជើង និងចិនបានកើនឡើងខ្លាំងប៉ុន្មានខែចុងក្រោយនេះ។ ក៏ប៉ុន្តែទំនាក់ទំនងមិនល្អរវាងប្រទេសទាំងពីរ បានកើតឡើងតាំងពីឆ្នាំ២០០៦មកម្ល៉េះ គឺតាំងពីពេលដែលកូរ៉េខាងជើងបានពិសោធសាកល្បងអាវុធនុយក្លេអ៊ែរជាលើកទីមួយម្ល៉េះ។ ម្យ៉ាង គឺមកអំពីជាច្រើនឆ្នាំកន្លងមកហើយ ដែលប្រទេសចិនជាអ្នកចេញមុខដោះស្រាយវិបត្តិនុយក្លេអ៊ែរកូរ៉េខាងជើង តាមរយៈកិច្ចចរចាប្រាំមួយប្រទេស ក្នុងនោះរួមមាន សហរដ្ឋអាមេរិក ចិនខ្លួនឯង រុស្ស៊ី ជប៉ុន និង កូរ៉េទាំងពីរ។
តែនៅទីបំផុត ចិនត្រូវអាម៉ាស់មុខមិនតិចទេ ពីព្រោះកូរ៉េខាងជើងបានពិសោធសាកល្បងអាវុធនុយក្លេអ៊ែរដល់ទៅពីរដង នៅឆ្នាំ២០០៦ និងនៅឆ្នាំ២០០៩ រួចហើយបានទាំងដើរចេញពីតុចរចាប្រាំមួយភាគីនៅខែមេសាឆ្នាំ២០០៩ទៅទៀត។
តាមពិត ថ្នាក់ដឹកនាំចិនមិនចង់ឲ្យកូរ៉េខាងជើងមានអាវុធនុយក្លេអ៊ែរទេ ពីព្រោះប្រការនេះ នឹងអាចញ៉ាំងឲ្យជប៉ុន ឬក៏កូរ៉េខាងត្បូង ចង់បានអាវុធនុយក្លេអ៊ែរដែរ។ រីឯ គីម ជុងអ៊ីល វិញ ដែលគិតពីប្រយោជន៍របស់ប្រទេសយល់ឃើញផ្សេង យល់ឃើញថា កូរ៉េខាងជើងចាំបាច់ ត្រូវតែក្លាយជាមហាអំណាចនុយក្លេអ៊ែរ ដើម្បីកុំឲ្យសត្រូវ ជាពិសេសសហរដ្ឋអាមេរិក មករំលំរបបកុម្មុយនិស្តរបស់ខ្លួនបាន។
ដោយឡែក អ្វីដែលបាននិងកំពុងបន្តធ្វើឲ្យចិនឈឺក្បាលនិងក្រពុលមុខខ្លាំង គឺព្រឹត្តិការណ៍បាញ់ពន្លិចនាវាចម្បាំងមួយគ្រឿងរបស់កូរ៉េខាងត្បូងនៅថ្ងៃទី២៦មីនា ប្រាំខែមុននេះ។ ពីព្រោះទោះជាមានការប្រកែកដោះសាពីខាងទីក្រុងព្យុងយ៉ាង យ៉ាងណាក៏ដោយ ក៏ការស៊ើបអង្កេតបង្ហាញថានាវាដែលលិច និងដែលបណ្តាលឲ្យមានស្លាប់នាវិកកូរ៉េខាងត្បូង ៤៦នាក់ ត្រូវបានបាញ់កម្ទេចដោយនាវាមុជទឹករបស់កូរ៉េខាងជើង។
កូរ៉េខាងជើងធ្វើឲ្យចិនក្រពុលមុខកាន់តែខ្លាំង
នៅក្នុងវិបត្តិកូរ៉េខាងជើង ចិនក្រពុលមុខកាន់តែខ្លាំង ពីព្រោះ ត្រូវបន្តដើរតួនាទីជាប្រទេសមិត្តរបស់ទីក្រុងព្យុងយ៉ាងផង និងត្រូវដើរតួនាទីជាអាជ្ញាកណ្តាលផង។
ការបន្តធ្វើជាមិត្តរបស់កូរ៉េខាងជើងជាការមួយចាំបាច់ សម្រាប់ថ្នាក់ដឹកនាំចិន។ ម្យ៉ាងគឺមកពីមូលហេតុប្រវត្តិសាស្រ្ត ដែលចងយ៉ាងជាប់របបកុម្មុយនិស្តប៉េកាំង និងរបបកុម្មុយនិស្តព្យុងយ៉ាង។ ម្យ៉ាងទៀត គឺមកអំពីចិនដែលមានព្រំដែនជាប់ជាមួយកូរ៉េខាងជើងយល់ដឹងថា បើសិនជារបបព្យុងយ៉ាងមានបញ្ហា ដោយហេតុតែវិបត្តិសេដ្ឋកិច្ច ឬក៏អស្ថិរភាពនយោបាយធ្ងន់ធ្ងរ ប្រជាជនកូរ៉េខាងជើងរាប់លាននាក់នឹងច្បាស់ជាភៀសខ្លួនចូលមកក្នុងទឹកដីប្រទេសចិនមិនខានឡើយ។ អ៊ីចឹងហើយបានជា ថ្នាក់ដឹកនាំចិនត្រូវបង្ខំចិត្តបន្តផ្តល់ជំនួយដល់កូរ៉េខាងជើង និងបន្តការពារថ្នាក់ដឹកនាំទីក្រុងព្យុងយ៉ាងតទៅទៀត។
ទន្ទឹមជាមួយគ្នានេះ ចិនដែលកំពុងក្លាយជាមហាអំណាចពិភពលោក ក៏ត្រូវតែមានស្មារតីទទួលខុសត្រូវខ្ពស់ដែរ មិនអាចចេះតែអង្គុយការពារកូរ៉េខាងជើងអ៊ីចឹងទៅកើតទេ ជាពិសេសក្រោយពេលដែលនាវាមុជទឹកនៃប្រទេសនេះបានបាញ់ពន្លិចនាវាចម្បាំង កូរ៉េខាងត្បូង ដូចកាលពីប៉ុន្មានខែមុននេះ។
មិនតែប៉ុណ្ណោះ ដោយហេតុតែមានការឈ្លានពានពីសំណាក់កូរ៉េខាងជើងទៅលើកូរ៉េខាងត្បូងអ៊ីចឹងហើយ បានជាប៉ុន្មានសប្តាហ៍ចុងក្រោយនេះ សហរដ្ឋអាមេរិកនិង កូរ៉េខាងត្បូង បានធ្វើសមយុទ្ធរួមគ្នានៅម្តុំសមុទ្រលឿង។ សមយុទ្ធនេះដែលបានប្រព្រឹត្តទៅនៅចម្ងាយប្រមាណតែ៥០០គ.ម ពីទីក្រុងប៉េកាំងតែប៉ុណ្ណោះ មិនអាចធ្វើឲ្យចិនសប្បាយចិត្តទេ។
យ៉ាងណាក៏ដោយ ក្រោយពីការលិចនាវាកូរ៉េខាងត្បូងបានប៉ុន្មានសប្តាហ៍ គីម ជុងអ៊ីល បានទៅប្រទេសចិនរួចម្តងហើយ កាលណោះគឺនៅខែឧសភា។ បីខែក្រោយមក អគ្គមគ្គទេសក៍កូរ៉េខាងជើង ក៏ប្រហែលជាមានព័ត៌មានថ្មីជុំវិញរឿងរ៉ាវនេះ ដើម្បីពន្យល់ថ្នាក់ដឹកនាំចិន។ ក្រុមអ្នកសង្កេតការណ៍ខ្លះបញ្ចេញមតិថា គីម ជុងអ៊ីល ប្រហែលមិនមែនជាដើមចមនៃព្រឹត្តិការណ៍បាញ់ពន្លិចនាវាចម្បាំងកូរ៉េខាងត្បូងទេ តែជាអ្នកទទួលថ្មបាក់ទៅវិញទេ។
ទស្សនៈបែបនេះអាចជាការពិតដែរ ពីព្រោះមកទល់ពេលនេះ ពួកអ្នកវិភាគមិនយល់សោះ ថាហេតុអ្វីបានជា គីម ជុងអ៊ីល បានបញ្ជាឲ្យបាញ់ពន្លិចនាវាកូរ៉េខាងត្បូងបែបនេះ។ ពួកគេថែមទាំងធ្វើអត្ថាធិប្បាយថា រឿងរ៉ាវនេះអាចជាផលវិបាកដែលហូរចេញពីការដណ្តើមអំណាចគ្នានៅទីក្រុងព្យុងយ៉ាងផងក៏មិនដឹង ជួនចំពេលមួយដែលសករាជគ្រប់គ្រងរដ្ឋរបស់ គីម ជុងអ៊ីល អាចឈានដល់ទីបញ្ចប់នៅពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ