សាលាដំបូងនឹងជំនុំជម្រះអតីតមេខ្មែរក្រហម តាមបទចោទ ម្តងមួយៗ
ចៅក្រមសាលាដំបូងនៃតុលាការខ្មែរក្រហមបានសម្រេចបំបែកសំណុំរឿង០០២ជាផ្នែកតូចៗ ដើម្បីសម្រួលដល់ដំណើរការសវនាការអោយបានឆាប់ចប់។ អ្នកនាំពាក្យសាលាក្តីខ្មែរក្រហមបានពន្យល់ថា ការបំបែកសំណុំរឿង០០២ជាផ្នែកតូចៗ បានន័យថា សាលាដំបូងនៃតុលាការខ្មែរក្រហមនឹងជំនុំជម្រះអតីតមេដឹកនាំខ្មែរក្រហមតាមបទចោទម្តងមួយៗ ដោយចាប់ផ្តើមពីបទចោទឧក្រិដ្ឋកម្មប្រឆាំងមនុស្សជាតិ ដែលទាក់ទងនឹងការបណ្តេញប្រជាពលរដ្ឋចេញដោយបង្ខំ។ អតីតមេដឹកនាំរបបខ្មែរក្រហមទាំង៤នាក់ត្រូវបានតុលាការខ្មែរក្រហមចោទប្រកាន់ចំនួន៤បទល្មើស។
ចុះផ្សាយនៅថ្ងៃ៖
ស្តាប់ - ០១:៤៨
ចៅក្រមសាលាដំបូងរបស់តុលាការខ្មែរក្រហមបានសម្រេចបំបែកសំណុំរឿង០០២ដែលពាក់ព័ន្ធអតីតមេដឹកនាំរបបខ្មែរក្រហម៤រូបនោះ ជាផ្នែកតូចៗ។ ការបំបែកសំណុំរឿងជាផ្នែក ដែលក្រុមចៅក្រមពន្យល់ថា គឺដើម្បីធ្វើអោយដំណើរការនៃការជំនុំជម្រះកាន់តែលឿន និងឆាប់ចប់។
អ្នកនាំពាក្យសាលាក្តីខ្មែរក្រហមលោក នេត្រ ភក្ត្រា បានបញ្ជាក់អោយដឹងថា ការបំបែកសំណុំរឿង០០២ជាផ្នែកតូចៗនេះ នឹងជួយដល់អង្គជំនុំជម្រះក្នុងការការពារផលប្រយោជន៍របស់ជនរងគ្រោះដើម្បីអោយទទួលបានយុត្តិធម៌ប្រកបដោយអត្ថន័យនិងទាន់ពេលវេលា និងការពារសិទ្ធិជនជាប់ចោទទាំងអស់ក្នុងសំណុំរឿង០០២ ដើម្បីទទួលបានការជម្រះអោយបានឆាប់។ លោក នេត្រ ភត្រា បន្តថា ការបំបែកសំណុំរឿងយ៉ាងនេះនឹងជួយអោយសាលាដំបូងចំណាយពេលខ្លីក្នុងការបញ្ចប់ការជម្រះក្តី។
បើយោងអ្នកនាំពាក្យសាលាក្តីខ្មែរក្រហមដដែល ការបំបែកសំណុំរឿងនេះមានន័យថាសាលាដំបូងនឹងជំនុំជម្រះជនជាប់ចោទទៅតាមបទល្មើសម្តងមួយៗ។ ហើយបទល្មើសដំបូងដែលត្រូវគ្រោងយកមកជំនុំជម្រះដំបូងគេលើជនជាប់ចោទទាំង៤នាក់នោះ គឺឧក្រិដ្ឋកម្មប្រឆាំងមនុស្សជាតិ។ បទល្មើសមួយនេះមានពាក់ព័ន្ធនឹងនយោបាយបណ្តេញប្រជាជនដោយបង្ខំចំនួន២លើក។ លើកទីមួយ គឺការបណ្តេញចេញពីទីក្រុងភ្នំពេញនៅថ្ងៃទី១៧មេសាឆ្នាំ១៩៧៥ និងការបណ្តេញប្រជាជនលើកទី២ ពីតំបន់មួយទៅតំបន់មួយនៅចន្លោះខែកញ្ញាឆ្នាំ១៩៧៥ដល់ឆ្នាំ១៩៧៧។
សូមរម្លឹកថា តុលាការខ្មែរក្រហមបានចោទប្រកាន់អតីតមេដឹកនាំខ្មែររបបក្រហមទាំង៤នាក់ចំនួន៤បទល្មើស។ ទីមួយ គឺឧក្រិដ្ឋកម្មប្រឆាំងមនុស្សជាតិ ទី២-ការបំពារបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ ទី៣- អំពើប្រល័យពូជសាសន៍ និងទី៤-ជាបទល្មើសក្រោមក្រមព្រហ្មទណ្ឌកម្ពុជាឆ្នាំ១៩៥៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ