មហន្តរាយធម្មជាតិរុញច្រានសេដ្ឋកិច្ចជប៉ុនឲ្យដើរថយក្រោយ
គ្រោះធម្មជាតិរញ្ជួយដី និងរលកយក្សស៊ូណាមី ថ្ងៃទី១១មីនា ដ៏សាហាវ ដែលបន្ទាប់មកបង្កឲ្យមានគ្រោះមហន្តរាយនុយក្លេអ៊ែរហ្វូគូស្ហ៊ីម៉ា បានធ្វើឲ្យជប៉ុនជួបនឹងដំណើរសេដ្ឋកិច្ចដើរថយក្រោយ នៅក្នុងត្រីមាសទីមួយ ឆ្នាំ២០១១នេះ។ នេះបើតាមការប្រកាសរបស់រដ្ឋាភិបាល ព្រោះដោយហេតុតែមហន្តរាយនុយក្លេអ៊ែរ សកម្មភាពសេដ្ឋកិច្ចពាណិជ្ជកម្មជប៉ុនបានធ្លាក់ចុះយ៉ាងគំហុក និងក្នុងពេលតែមួយប៉ប្រិចភ្នែកប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
ជប៉ុនបាននិងកំពុងស្គាល់ដំណើរសេដ្ឋកិច្ចដើរថយក្រោយ ព្រោះត្រីមាសទីមួយ ឆ្នាំ២០១១នេះ គឺជាត្រីមាសទីពីរ ដែលផលិតផលសរុបក្នុងស្រុក (PIB)របស់ខ្លួន បានធ្លាក់ចុះអស់ ០,៩% បើប្រៀបទៅនឹងត្រីមាសមុន។ ត្រីមាសមុន (បីខែចុងក្រោយនៃឆ្នាំ២០១០) កំណើនសេដ្ឋកិច្ចជប៉ុនបានធ្លាក់ចុះអស់០,៨%រួចទៅហើយ។
បើយោងតាមរដ្ឋមន្ត្រីប្រតិភូក្រសួងនយោបាយសេដ្ឋកិច្ច លោក កាអូរុ យោសាណូ (Kaoru Yosano) ដំណើរសេដ្ឋកិច្ចដើរថយក្រោយដែលអាក្រក់ជាងការប៉ាន់ប្រមាណទុកជាមុននេះ គឺមួយភាគធំបណ្តាលមកពីគ្រោះមហន្តរាយរញ្ជួយដី រលកយក្សស៊ូណាមី និងគ្រោះមហន្តរាយនុយក្លេអ៊ែរ។
គ្រោះមហន្តរាយដែលធ្វើឲ្យសកម្មភាពសេដ្ឋកិច្ច ពាណិជ្ជកម្ម វិនិយោគ ការនាំចេញ គាំងស្តូកស្តឹង ឬទទួលរងការប៉ះពាល់យ៉ាងខ្លាំង។ រោងចក្រជាច្រើនត្រូវខូចខាត ហើយម្យ៉ាងវិញទៀត ការធ្លាយសារធាតុវិទ្យុសកម្មនៅហ្វូគូស្ហ៊ីម៉ា បានធ្វើឲ្យប្រទេសនាំចូលផលិតផលជប៉ុន ដកទំនុកចិត្តមួយរយៈ។ ចំណែកនៅខាងក្នុងប្រទេសវិញ តម្រូវការមានច្រើនអនេក ដើម្បីឆ្លើយតបទៅនឹងទំហំមហន្តរាយ ដែលបានប៉ះពាល់ទាំងជីវិតមនុស្សនិងសម្ភារៈ។ ចំណាយក្នុងវិស័យសាធារណៈ និងវិនិយោគ បានកើនឡើងដល់កំរិតកំពូល។
ទោះបីជាផលវិបាកនៃសេដ្ឋកិច្ចនេះនឹងមិនអូសបន្លាយយូរក៏ដោយ ក៏រដ្ឋមន្ត្រីប្រតិភូក្រសួងនយោបាយសេដ្ឋកិច្ចជប៉ុន បានទទួលស្គាល់ថា ជប៉ុននឹងមានកំណើនសេដ្ឋកិច្ចដើរថយក្រោយ រហូតដល់ត្រីមាសទីបី ពោលគឺរហូតទាល់តែដល់ចុងឆ្នាំ នៅពេលដែលការស្ថាបនាប្រទេសពីគ្រោះមហន្តរាយ ចាប់ផ្តើមដោយពិតប្រាកដ និងមានលំនឹងឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ