លោកហ៊ុន សែន ចង់បានលិខិតូបករណ៍អាស៊ានស្តីពីការការពារសិទ្ធិពលករចំណាកស្រុក
កិច្ចប្រជុំកំពូលរបស់អាស៊ានបានបើកជាផ្លូវការនៅព្រឹកថ្ងៃទី៣មេសានេះ ដោយសុន្ទរកថារបស់លោកនាយករដ្ឋមន្ត្រីហ៊ុន សែន។ នៅក្នុងសុន្ទរកថាកម្រាស់៨ទំព័រ លោកនាយករដ្ឋមន្ត្រីកម្ពុជាបានស្នើអោយមេដឹកនាំអាស៊ានជជែកអំពីរបៀបវារៈភ្នំពេញចំនួន៨ចំនុចដែលជាការងារអាទិភាព។ ការងារអាទិភាពមួយដែលលោកហ៊ុន សែនដាក់ក្តីសង្ឃឹមថានឹងអាចសម្រេចនៅក្នុងឆ្នាំ២០១២នេះ គឺការបង្កើតអោយបានលិខិតូបករណ៍មួយស្តីពីការការពារសិទ្ធិពលករចំណាកស្រុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ការងារអាទិភាពមួយដែលលោកនាយករដ្ឋមន្ត្រីហ៊ុន សែន ក្នុងឋានៈជាប្រធានអាស៊ានបានស្នើអោយមេដឹកនាំប្រទេសអាស៊ានដទៃទៀតសម្រេចនៅក្នុងឆ្នាំ២០១២នេះ គឺការព្រមព្រៀងលើលិខិតូបករណ៍ស្តីពីការការពារសិទ្ធិពលករចំណាកស្រុក។ ការអំពាវនាវរបស់ប្រមុខរដ្ឋាភិបាលកម្ពុជា ត្រូវបានធ្វើឡើងនៅក្នុងសុន្ទរកថាបើកកិច្ចប្រជុំកំពូលអាស៊ាននៅព្រឹកថ្ងៃអង្គារទី៣មេសានេះ។
សំណើរបស់លោកហ៊ុន សែនយ៉ាងនេះ មិនមែនធ្វើឡើងដោយចៃដន្យនោះឡើយ។ នៅតែ៣ឆ្នាំទៀតតែប៉ុណ្ណោះ សហគមន៍អាស៊ានមួយនឹងត្រូវលេចរូបរាងឡើង។ នៅពេលនោះហើយដែលនឹងមានលំហូរដោយសេរីនៃទំនិញ និងមនុស្សក្នុងរង្វង់ដែនដីអាស៊ាន។ សម្រាប់លោកហ៊ុន សែន តាមពិតទៅ លំហូរដោយសេរីនៃពលករជំនាញ គឺជាលក្ខណៈសម្បត្តិចម្បងមួយនៃសហគមន៍សេដ្ឋកិច្ចអាស៊ាន។ ហើយថា រហូតដល់ពេលនេះ វាបានមានរួចហើយ សកម្មភាពនៃការផ្លាស់ប្តូរពលកម្មទៅវិញទៅមកនៅក្នុងរង្វង់ប្រទេសសមាជិកអាស៊ាននោះ។
ដូច្នេះហើយបានជាលោកនាយករដ្ឋមន្ត្រីប្រកាសនៅក្នុងពិធីបើកកិច្ចប្រជុំកំពូលអាស៊ាន ស្នើអោយមេដឹកនាំប្រទេសនៅអាស៊ានពិចារណា និងសម្រេចលើកិច្ចព្រមព្រៀងស្តីពីការការពារសិទ្ធិពលករចំណាកស្រុកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ