បេក្ខជនប្រធានាធិបតីហ្វ្រង់ស័រហូឡង់បង្ហាញផែនការសំខាន់ៗរបស់ខ្លួនសម្រាប់ប្រទេសបារាំង
ក្រោយពីមានជំនួបមីទីងដ៏សែនជោគជ័យរបស់លោកនៅទីក្រុង Bourget កាលពីថ្ងៃអាទិត្យកន្លងទៅ បេក្ខជនប្រធានាធិបតីបារាំងហ្វ្រង់ស័រហូឡង់បង្ហាញឲ្យឃើញនៅថ្ងៃព្រហស្បតិ៍ទី២៦មករាឆ្នាំ២០១២នេះ នូវផែនការសំខាន់ៗរបស់ខ្លួនដើម្បីជួយលើកតម្កើងប្រទេសនិងផ្តល់យុត្តិធម៌ជូនប្រជាជនបារាំងដែលសារព័ត៌មាន Le Parisien បានទទួលសិទ្ធិផ្តាច់មុខក្នុងការផ្សព្វផ្សាយឯកសារដ៏សំខាន់នេះ។ ហើយនៅយប់ថ្ងៃព្រហស្បតិ៍នេះ បេក្ខជនប្រធានាធិបតីហ្វ្រង់ស័រហូឡង់នៃបក្សសង្គមនិយមនឹងត្រូវធ្វើការតស៊ូមតិមួយនៅទូរទស្សន៍ France 2ជាមួយលោកអតីតនាយករដ្ឋមន្ត្រីអាឡាំងហ្ស៊ូប៉េ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:១២
ដោយហេតុតែមានវិបត្តិសេដ្ឋកិច្ចនិងវិបត្តិហិរញ្ញវត្ថុដ៏ធ្ងន់ធ្ងរ ផែនការរបស់បេក្ខជនប្រធានាធិបតីបារាំងហ្វ្រង់ស័រហូឡង់ដែលមកពីបក្សសង្គមនិយមពុំមានកម្មវិធីឬវិធានការអ្វីដែលធ្វើឲ្យគេកើតមានការភ្ញាក់ផ្អើលខ្លាំងឡើយ។ ជាពិសេសក្នុងខណៈពេលដែលចំនួនអ្នកឥតការងារធ្វើចេះតែកើនឡើងពុំឈប់ឈរ ហើយបរិមាណនៃប្រាក់បំណុលបានកើនឡើងដល់កម្រិតកំពូល។ បេក្ខជនប្រធានាធិបតីហ្វ្រង់ស័រហូឡង់នៅតែបន្តធ្វើសំណើដែលខ្លួនបានស្នើនាឱកាសប្រកួតប្រជែងវគ្គបឋមរវាងបេក្ខជនប្រធានាធិបតីនៃបក្សសង្គមនិយមកាលពីសរទរដូវកន្លងទៅ បានសេចក្តីថា ប្រយុទ្ធធ្វើយ៉ាងណាឲ្យមានឧុនភាពសូន្យនៅឆ្នាំ២០១៧។
ដើម្បីសម្រេចឲ្យបាននូវមហិច្ឆតានេះ បេក្ខជនប្រធានាធិបតីហ្វ្រង់ស័រហូឡង់បានបញ្ចេញបង្ហាញ៦០សំណើរបស់ខ្លួន។ ផែនការទាំងនេះនឹងត្រូវចំណាយអស់ប្រាក់ប្រមាណ ២០ពាន់លានអឺរ៉ូ។ ផែនការសំខាន់ៗទាំងនោះមានជាអាទិ៍៖ បង្កើតការងារប្រមាណ៦ម៉ឺនកន្លែងក្នុងរយៈកាល៥ឆ្នាំនៅក្នុងក្រសួងអប់រំជាតិ។ បង្កើត “ការងារអនាគត”ប្រមាណ១៥ម៉ឺនកន្លែងសម្រាប់យុវជន។ លុបចោល “ជម្រករួចពន្ធដារ” ជាច្រើនដែលនឹងអាចធ្វើឲ្យរដ្ឋរកបានប្រាក់ចំណូលបន្ថែមប្រមាណ២៩ពាន់លានអឺរ៉ូ។ ការដាក់ពន្ធយ៉ាងធ្ងន់ទៅលើធនាគារ។ ធ្វើការការគាំទ្រសហគ្រាសខ្នាតតូចនិងមធ្យមដែលជាប្រភពនៃការបង្កើតការងារជូនប្រជាជនបារាំង។
ក្រៅពីនេះ បេក្ខជនប្រធានាធិបតីហ្វ្រង់ស័រហូឡង់បានសន្យាថា នឹងផ្តល់សិទ្ធិជូនជន បរទេសដែលរស់នៅលើទឹកដីបារាំងក្នុងការចូលរួមធ្វើការបោះឆ្នោតតំបន់។ បង្កើតការងារប្រមាណ៥ ០០០កន្លែងបន្ថែមទៀតនៅក្នុងជួរនគរបាលនិងក្នុងក្រសួងយុត្តិធម៌ ដើម្បីជួយពង្រឹងសន្តិសុខ។ ដំឡើងបរិមាណនៃប្រាក់ជំនួយបវេសនកាល២៥%នៅខែកញ្ញាខាងមុខ នេះ។ ធ្វើការកែទម្រង់ក្នុងវិស័យពន្ធដារ។ សំណើទាំងប៉ុន្មានខាងលើនេះ ធ្លាប់បានបង្កបង្កើតឲ្យមានការតស៊ូមតិនយោបាយយ៉ាងសែនពុះកញ្ជ្រោលកាលពីប៉ុន្មានថ្ងៃមុននេះ។
នៅក្នុងវិស័យលំនៅឋានវិញ លោក ហ្វ្រង់ស័រហូឡង់គ្រោងបង្កើតឲ្យមានលំនៅដ្ឋានប្រមាណ២លាន៥សែនជូនប្រជាជនក្រីក្រនិងជូននិស្សិតនៅក្នុងអាណត្តិប្រធានាធិបតី៥ឆ្នាំរបស់លោក។
នៅក្នុងវិស័យពន្ធដារ បេក្ខជនប្រធានាធិបតីហ្វ្រង់ស័រហូឡង់បានសន្យាថា នឹងដាក់ពន្ធទៅលើប្រាក់ចំណូលបានមកពីសកម្មភាពហិរញ្ញវត្ថុនៃប្រាល់មូលធន ដូចគ្នានឹងប្រាក់ចំណូលដែលបានមកពីការប្រកបការងារដោយកម្លាំងញើសឈាមអ៊ីចឹងដែរ។ ហើយអ្នកដែលមានប្រាក់ចំណូលលើសពី១៥០ ០០០អឺរ៉ូក្នុង១ឆ្នាំ នឹងត្រូវបង់ពន្ធជូនរដ្ឋ៤៥%។
ពាក់ព័ន្ធនឹងវិស័យសមភាព បេក្ខជនប្រធានាធិបតីហ្វ្រង់ស័រហូឡង់នៃបក្សសង្គមនិយមបារាំងដែលតែងប្រយុទ្ធប្រឆាំងនឹងការប្រកាន់រើសអើងបានសន្យាថា នឹងផ្តល់សិទ្ធិរៀបអាពាហ៍ពិពាហ៍ពេញច្បាប់ជូនជនដែលស្រឡាញ់ភេទដូចគ្នា ហើយនិងមានសិទ្ធិសុំកូនយកមកចិញ្ចឹមដូចគេឯងរាល់គ្នាផងដែរ។ ហើយសហគ្រាសឬសេវាសាធារណៈណាដែលពុំគោរពកូតា quotas យកជនពិការឲ្យបាន៦%ចួលធ្វើការ នឹងត្រូវទទួលពិន័យតាមច្បាប់ធរមាន។ ជាទីបញ្ចប់ លោកហ្វ្រង់ស័រហូឡង់បានប្រកាសបញ្ជាក់ទៀតថា “លោកនឹងប្រយុទ្ធការពារសិទ្ធិសមភាពរវាងបុរសនិងស្ត្រីក្នុងការប្រកបការងារ ឲ្យមានប្រាក់បៀវត្សរ៍ស្មើគ្នាពុំត្រូវធ្វើការរើសអើងឡើយ។ សហគ្រាសណាដែលពុំគោរពច្បាប់ នឹងត្រូវទទួលទណ្ឌកម្មតាមច្បាប់”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ