ជំនួបមីទីងដ៏ធំរបស់បេក្ខជនប្រធានាធិបតីនៃបក្សសង្គមនិយមបារាំងនៅទីក្រុង Bourget
លោក François Hollande បេក្ខជនប្រធានាធិបតីនៃបក្សសង្គមនិយមបារាំងនឹងត្រូវឡើងមកថ្លែងសុន្ទរកថានៅក្នុងជំនួបមីទីងដ៏ធំមួយនៅថ្ងៃអាទិត្យទី២២មករានេះនៅទីក្រុង Bourget ដោយមានអ្នកមកចូលរួមយ៉ាងតិចប្រមាណ១០ ០០០នាក់។ ទាំងនេះដើម្បីបំផុសបំផុលឲ្យប្រជាជនបារាំងមានក្តីសង្ឃឹមហើយនិងនាំគ្នាធ្វើការគាំទ្របេក្ខជននៃបក្សសង្គមនិយមបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២០
នៅក្នុងឧទ្យានតាំងពិព័ណ៍នៃទីក្រុង Bourget ដែលឋិតនៅប៉ែកខាងជើងនៃទីក្រុងប៉ារីស នឹងមានសកម្មជនគាំទ្របេក្ខជនប្រធានាធិបតីនៃបក្សសង្គមនិយមបារាំងយ៉ាងតិច១០ ០០០នាក់មកចូលរួម ដើម្បីស្តាប់សុន្ទរកថារបស់បេក្ខជនប្រធានាធិបតីបារាំង François Hollande ដែលមានរយៈពេលមួយម៉ោងកន្លះ នៅចំពោះមុខអ្នកកាសែតបារាំងនិងអន្តរជាតិប្រមាណ៣៥០នាក់។ លោក François Hollandeត្រូវឡើងមកថ្លែងសុន្ទរកថានៅរវាងម៉ោង១៥និង១៥នាទី។
បេក្ខជនប្រធានាធិបតីនៃបក្សសង្គមនិយមបារាំងនឹងត្រូវឡើងមកថ្លែងគូសបញ្ជាក់ឲ្យដឹងពីអាទិភាពចម្បងរបស់ខ្លួននៅក្នុងវិស័យអប់រំ យុវភាព យុត្តិធម៌ ហើយនិងកំណែទម្រង់នៅក្នុងវិស័យពន្ធដារដើម្បីជួយជំរុញឲ្យមានសន្ទុះកំណើនផលិតផលនិងសេដ្ឋកិច្ចដែលជាកត្តាមួយដ៏សំខាន់សម្រាប់ជួយដោះស្រាយបញ្ហាឥតការងារធ្វើហើយនិងកាត់បន្ថយភាពក្រីក្រ។
តួអង្គសំខាន់ៗនៃបក្សសង្គមនិយមបារាំងនឹងមានវត្តមាននៅក្នុងជំនួបមីទីងដ៏ធំរបស់បេក្ខជនប្រធានាធិបតីនៃបក្សសង្គមនិយមបារាំងនៅទីក្រុង Bourget មានដូចជា៖ លោកស្រីSégolène Royal លោកស្រីMartine Aubry លោក Manuel Valls លោក Arnaud Montebourg ។ ហើយនៅយប់ថ្ងៃអាទិត្យនៅម៉ោង២០ លោក François Hollande បេក្ខជនប្រធានាធិបតីនៃបក្សសង្គមនិយមបារាំងនឹងត្រូវគេអញ្ជើញឲ្យមកធ្វើកិច្ចសម្ភាសន៍នៅទូរទស្សន៍ TF1 ផងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ