ប្រមុខការទូតអាមេរិក ជម្រុញការកាត់ទោសមេខ្មែរក្រហមនិងពិចារណាលុបបំណុល
ក្នុងដំណើរទស្សនកិច្ចនៅកម្ពុជា នាថ្ងៃទី១វិច្ឆិកានេះ លោកស្រី Hillary Clinton រដ្ឋមន្ត្រីការបរទេសអាមេរិក បានសន្យាបន្តផ្តល់ជំនួយដល់តុលាការខ្មែរក្រហម ដើម្បីបង្កើនល្បឿនកាត់ទោសអតីតមេដឹកនាំខ្មែរក្រហម។ ចំណែកបញ្ហាបំណុល ដែលកម្ពុជាជំពាក់អាមេរិក ក្នុងសម័យលន់ នល់ ត្រូវបានលោកស្រី Clinton ប្រកាសថា នឹងបញ្ជូនអ្នកជំនាញការ ដើម្បីពិភាក្សាលើការលុបបំណុលជាង ៣០០ លានដុល្លារនោះ។ លោកស្រី គ្លីនតុន ក៏ចង់ឃើញវត្តមានរបស់ការិយាល័យឧត្តមស្នងការអង្គការសហប្រជាជាតិ ផ្នែកសិទ្ធិមនុស្សបន្តនៅកម្ពុជាតទៅទៀត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហូរ
សេចក្តីប្រកាសរបស់ប្រមុខការទូតអាមេរិកយ៉ាងដូច្នេះ ត្រូវបានធ្វើឡើង នៅចំពោះមុខលោក ហោ ណាំហុង រដ្ឋមន្ត្រីការបរទេសកម្ពុជា ក្នុងពេលលោកស្រី Clinton បំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី៣០ ដល់ថ្ងៃទី១វិច្ឆិកា ឆ្នាំ២០១០។
ក្នុងសន្និសីទកាសែត បន្ទាប់ពីជំនួបដោយបិទទ្វារជាមួយនឹងលោកប្រមុខការទូតកម្ពុជា នៅមុននេះបន្តិច លោកស្រី ហ៊ីលឡារី គ្លីនតុន ( Hillary Clinton ) រដ្ឋមន្ត្រីការបរទេសអាមេរិក បានបញ្ជាក់ថា រដ្ឋបាលរបស់លោក អូបាម៉ា មានការតាំងចិត្តយ៉ាងមុតមាំ ជួយដល់កម្ពុជា លើដំណើរការកាត់ទោស មេដឹកនាំខ្មែរក្រហម ដើម្បីនាំយុត្តិធម៌ជូនប្រជាជនរងគ្រោះកម្ពុជា។ សហរដ្ឋអាមេរិក ក៏នឹងបន្តផ្តល់ជំនួយបន្ថែមទៀត សម្រាប់ដំណើរការកាត់ទោសខ្មែរក្រហម ក្នុងសំណុំរឿង ០០២ ដែលមាន៖ នួនជា ខៀវសំផន អៀងសារី និងអៀងធីរិទ្ធ។
លោកស្រី គ្លីនតុន បានបញ្ជាក់ថា សហរដ្ឋអាមេរិកចង់ឃើញដំណើរការកាត់ទោសមេខ្មែរក្រហមលើសំណុំរឿង ០០២ ឲ្យបានឆាប់ តាមដែលអាចធ្វើទៅបាន។
អំពីប្រាក់បំណុលប្រមាណជាង ៣០០ លានដុល្លារ ដែលកម្ពុជាជំពាក់អាមេរិក តាំងពីរបប លន់ នល់ ត្រូវបានលោកស្រី គ្លីនតុន លើកឡើងថា លោកស្រីបានពិភាក្សាបញ្ហានេះជាមួយ លោកនាយករដ្ឋមន្ត្រី ហ៊ុនសែន និងលោកប្រមុខការទូត ហោ ណាំហុង ដោយបានឯកភាពគ្នាថា អាមេរិកនឹងបញ្ជូនអ្នកជំនាញមួយក្រុម មកកម្ពុជា ក្នុងពេលខាងមុខ ដើម្បីពិភាក្សា រកវិធីលុបចោលប្រាក់បំណុលទាំងនោះ។ នោះគឺការប្តូរផ្ទេរបំណុល ទៅជាការអភិវឌ្ឍន៍ខាងវិស័យអប់រំ ឬក៏ជួយដល់ប្រជាជន តាមគម្រោងអភិវឌ្ឍន៍។
ក្រៅពីនេះ លោកស្រី គ្លីនតុន ក៏បានអត្ថាធិប្បាយលើសំណួរទាក់ទងនឹងការប្រកាសរបស់ប្រមុខរដ្ឋាភិបាលកម្ពុជា ចំពោះការបិទការិយាល័យឧត្តមស្នងការអង្គការសហប្រជាជាតិ ផ្នែកសិទ្ធិមនុស្ស នៅកម្ពុជា ដោយលោកស្រី ចង់ឃើញរដ្ឋាភិបាលកម្ពុជា បន្តសហប្រតិបត្តិការជាមួយនឹងអង្គការសហប្រជាជាតិ និងរក្សាទុកការិយាល័យឧត្តមស្នងការសិទ្ធិមនុស្ស ដើម្បីលើកតម្កើងលទ្ធិប្រជាធិបតេយ្យ និងសិទ្ធិមនុស្ស ព្រមទាំងប្រឆាំងការជួញដូរមនុស្ស ជាដើម។
ចំពោះសំណុំរឿងដ៏រស៊ើបនៃការប្រកាសបិទការិយាល័យឧត្តមស្នងការអង្គការសហប្រជាជាតិ ផ្នែកសិទ្ធិមនុស្ស ត្រូវបានលោក ហោ ណាំហុង គូសបញ្ជាក់បន្ថែមថា រដ្ឋាភិបាលកម្ពុជា មិនទាន់មានការសម្រេចបិទការិយាល័យនោះនៅឡើយទេ ដោយសារអនុស្សរណៈយោគយល់គ្នា MOU ដែលបានចុះហត្ថលេខាជាមួយគ្នា មានសុពលភាពរហូតដល់ខែមករា ឆ្នាំ២០១២។
តាមលោក ហោ ណាំហុង កម្ពុជាបានលើកឡើងពីបញ្ហានេះ ក្នុងដំណើរទស្សនកិច្ចរបស់លោក បាន គីមូន តែគ្មានការសម្រេចណាមួយ ដើម្បីបិទការិយាល័យឧត្តមស្នងការសិទ្ធិមនុស្សនោះ នៅឡើយទេ។
លោកប្រមុខការទូតកម្ពុជា ហោ ណាំហុង បានបញ្ជាក់ថា កម្ពុជាទទួលស្គាល់បំណុល ដែលជំពាក់អាមេរិក តែសុំឲ្យមានការដោះស្រាយបំណុល ដោយកិច្ចព្រមព្រៀង តាមលក្ខខណ្ឌសងបំណុលខ្លះ ឬក៏ត្រូវដោះស្រាយបំណុល ដោយប្តូរផ្ទេរបំណុលទាំងនោះ ទៅជាការអភិវឌ្ឍន៍សម្រាប់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ