លោកស្រី ហ៊ីលឡារី គ្លីនតុន បង្ហាញមុខតាមប្រាសាទបុរាណខ្មែរ
រដ្ឋមន្ត្រីការបរទេសអាមេរិក លោកស្រី ហ៊ីលឡារី គ្លីនតុន បានមកដល់ខេត្តសៀមរាបហើយនៅពាក់កណ្តាលអធ្រាត្រថ្ងៃសៅរ៍ទី៣០តុលា ម្សិលមិញ។ ដំណើរមកដល់របស់លោកស្រីគ្លីនតុនស្ថិតក្នុងការការពារសុវត្ថិភាព ដ៏ខ្ពស់បំផុត។ ប្រមុខការទូតអាមេរិកបានផ្តើមទស្សនកិច្ចជាលក្ខណៈឯកជនរបស់ខ្លួននៅ ព្រឹកថ្ងៃអាទិត្យនេះដោយការទស្សនាប្រាង្គប្រាសាទបុរាណខ្មែរ ជាច្រើនក្នុងខេត្តសៀមរាប។ លោកស្រីនឹងអញ្ជើញមកដល់ភ្នំពេញនៅថ្ងៃចន្ទទី១វិច្ឆិកាដើម្បី ផ្តើមទស្សនកិច្ចជាផ្លូវការនៅកម្ពុជា។
ចុះផ្សាយនៅថ្ងៃ៖
សេចក្តីរាយការណ៍របស់ ប៉ែន បូណា ពីទីក្រុងភ្នំពេញ
ទីបំផុតទៅ លោកស្រី ហ៊ីលឡារី គ្លីនតុនបានមកដល់ខេត្តសៀមរាបហើយនៅវេលាម៉ោង១២ពាក់កណ្តាលអធ្រាត្រថ្ងៃសៅរ៍ម្សិលមិញក្រោមការការពារសុវត្ថិភាពដ៏តឹងរ៉ឹងបំផុត។ ក្រុមអ្នកកាសែតមិនត្រូវបានគេអនុញ្ញាតឲ្យចូលយកព័ត៌មាននិងថតរូបភាពនៃដំណើរមកដល់របស់លោកស្រីទេនៅយប់មិញ។
ប៉ុន្តែ ប្រមុខការទូតអាមេរិកបានបង្ហាញមុខនៅថ្ងៃអាទិត្យនេះតាមរយៈដំណើរទស្សនកិច្ចជាលក្ខណៈឯកជននៅតាមប្រាង្គប្រាសាទនានាក្នុងខេត្តសៀមរាប។ លោកស្រីហ៊ីលឡារី គ្លីនតុន បានផ្តើមទស្សនាប្រាសាទបាយ័នមុនគេនៅពេលព្រឹកមុននឹងបន្តទស្សនាប្រាសាទផ្សេងៗទៀតនិងជាពិសេសប្រាសាទអង្គរវត្តនៅពេលរសៀល។ កងកម្លាំងសមត្ថកិច្ចរាប់រយនាក់ត្រូវបានគេដាក់ពង្រាយដើម្បីការពារសន្តិសុខជូនលោកស្រី។
ដំណើរមកដល់របស់លោកស្រី ហ៊ីលឡារី គ្លីនតុន ក៏បានផ្អើលដល់ប្រជាពលរដ្ឋដែលមានទំនាស់ដីធ្លីក្នុងខេត្តសៀមរាបផងដែរ។ ក្រុមអ្នកភូមិរាប់រយនាក់បានប៉ុនប៉ងស្ទាក់ជួបលោកស្រីរដ្ឋមន្ត្រីនៅមុខប្រាសាទអង្គរធំដើម្បីរាយការណ៍អំពីបញ្ហារបស់ពួកគេឲ្យលោកស្រីជួយដោះស្រាយ ប៉ុន្តែពួកអ្នកភូមិទាំងនោះត្រូវបានរារាំងនិងបំបែកដោយអាជ្ញាធរប៉ូលិស។
លោកស្រី ហ៊ីលឡារី គ្លីនតុន នឹងអញ្ជើញមកដល់ភ្នំពេញនៅវេលាព្រឹកថ្ងៃចន្ទស្អែកនេះ ដើម្បីផ្តើមទស្សនកិច្ចជាផ្លូវការរបស់ខ្លួន។ ប្រមុខការទូតអាមេរិកនឹងជួបពិភាក្សាការងារជាមួយលោកនាយករដ្ឋមន្ត្រី ហ៊ុន សែន និងលោករដ្ឋមន្ត្រីការបរទេស ហោ ណាំហុង ដើម្បីពិភាក្សាពីបញ្ហាទ្វេភាគីនិងបញ្ហាក្នុងតំបន់មួយចំនួន។ លោកស្រីក៏នឹងចូលគាល់ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី ផងដែរ។
យោងតាមកម្មវិធីដែលបានគ្រោងទុក លោកស្រីរដ្ឋមន្ត្រីការបរទេសអាមេរិកក៏នឹងអញ្ជើញទៅទស្សនាសារមន្ទីរប្រល័យពូជសាសន៍ទួលស្លែង ជួបសំណេះសំណាលជាមួយក្រុមនិស្សិតនៅឯសាលសន្និសីទចតុមុខ និងជួបពិភាក្សាជាមួយគណបក្សប្រឆាំងនិងតំណាងអង្គការសង្គមស៊ីវិលនៅកម្ពុជាផងដែរ។ បក្សប្រឆាំងនិងសង្គមស៊ីវិលគ្រោងនឹងលើកបញ្ហាជាច្រើនទាក់ទងនឹងសិទ្ធិមនុស្ស ប្រជាធិបតេយ្យនិងប្រព័ន្ធយុត្តិធម៌នៅកម្ពុជា។
ប្រធានបទទាក់ទងនឹងលោក សម រង្ស៊ី និងការបិទការិយាល័យសិទ្ធិមនុស្សរបស់អង្គការសហប្រជាជាតិនៅកម្ពុជាត្រូវគេរំពឹងថានឹងក្លាយជារបៀបវារៈដ៏សំខាន់ដែលបក្សប្រឆាំង និងក្រុមសង្គមស៊ីវិលលើកឡើង។ ប៉ុន្តែ គេមិនដឹងថាតើនឹងមានអ្វីប្រែប្រួលឬក៏អត់នោះទេ នៅក្រោយទស្សនកិច្ចរបស់លោកស្រី ហ៊ីលឡារី គ្លីនតុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ