ហាណូយបដិសេធការតវ៉ារបស់ប៉េកាំង
ទីក្រុងហាណូយ បានបោះឆ្នោតគាំទ្រច្បាប់ដែលទាមទារអធិបតេយ្យលើដែនសមុទ្រឋិតនៅទីប្រជុំកោះ Paracels និងSpratleys នៅសមុទ្រចិនខាងត្បូង ហើយបានបដិសេធច្រានចោលការតវ៉ាប្រឆាំងរបស់ទីក្រុងប៉េកាំង។ នេះបើយោងតាមអ្នកនាំពាក្យវៀតណាម។
ចុះផ្សាយនៅថ្ងៃ៖
ស្តាប់ - ០១:៤៧
សភាវៀតណាមបានអនុម័តនៅថ្ងៃព្រហស្បតិ៍ម្សិលមិញនូវច្បាប់មួយស្តីពីសមុទ្រ ដោយបានដាក់ ទីប្រជុំកោះ Paracels និងSpratleys នៅសមុទ្រចិនខាងត្បូង ឲ្យឋិតនៅក្រោមការគ្រប់គ្រងរបស់ប្រទេសវៀតណាម។ មិនបង្អង់ឲ្យខាតពេលវេលាឡើយ ទីក្រុងប៉េកាំងបានកោះហៅភ្លាម
ឯកអគ្គរដ្ឋទូតវៀតណាមដើម្បីសម្ដែងបង្ហាញការប្រឆាំងរបស់ប្រទេសចិន។
ប្រទេសចិន ប្រទេសវៀតណាម នឹងប្រទេសមួយចំនួនទៀតក្នុងតំបន់អាស៊ីអាគ្នេយ៍កំពុងឈ្លោះដណ្តើមចង់បានទីប្រជុំកោះ Paracels និងSpratleys នៅសមុទ្រចិនខាងត្បូង ដែលល្បីថាសម្បូណ៌ទៅដោយសម្បត្តិធម្មជាតិមានដូចជាប្រេងកាតឬវត្ថុធាតុរ៉ែ ហើយទីប្រជុំកោះទាំងនេះក៏ឋិតនៅលើផ្លូវនាវាចរសមុទ្រដ៏សំខាន់ផងទៀត។
តាមរយៈសេចក្តីថ្លែងការណ៍ផ្សាយឲ្យដឹងនៅល្ងាចថ្ងៃព្រហស្បតិ៍ម្សិលមិញ អ្នកនាំពាក្យនៃក្រសួងការបរទេសវៀតណាមបានថ្លែងថា “ប្រទេសវៀតណាមបដិសេធច្រានចោលយ៉ាងដាច់ខាតការចោទប្រកាន់ពុំសមហេតុផលរបស់ប្រទេសចិន”។
ទីក្រុងហាណូយបានរំលឹកប្រាប់ទៀតថា “ច្បាប់សមុទ្រវៀតណាមនេះផ្អែកលើមូលដ្ឋានគតិយុត្តមួយដ៏ត្រឹមត្រូវ ហើយមានទាំងភស្តុតាងប្រវត្តិសាស្ត្របញ្ជាក់បង្ហាញពីអធិបតេយ្យរបស់ប្រទេសវៀតណាមលើទីប្រជុំកោះទាំងនេះផងទៀត។
មិនតែប៉ុណ្ណោះ ទីក្រុងហាណូយបានទាំងធ្វើការប្រឆាំងទល់នឹងសេចក្តីសម្រេចចិត្តរបស់ទីក្រុងប៉េកាំងដែលបានលើកតម្កើងលក្ខន្តិកៈរដ្ឋបាលរបស់ទីប្រជុំកោះទាំងនោះពី លក្ខន្តិកៈជាស្រុកសាមញ្ញមកជា “ទីក្រុងសានស្ហា”។
ហើយបើយោងតាមសារព័ត៌មានវៀតណាម Thanh Nien ដែលបានផ្សាយឲ្យដឹងនៅថ្ងៃសុក្រនេះថា ច្បាប់សមុទ្រវៀតណាមនេះ បានទទួលការអនុម័តគាំទ្រ៤៩៥សំឡេងលើ៤៩៦សំឡេងនៅក្នុងសភាវៀតណាម។ ច្បាប់នេះនឹងចូលជាធរមាននៅខែមករាឆ្នាំ២០១៣។
សូមបញ្ជាក់ថា ទីប្រជុំកោះ Spratleys ឋិតនៅក្រោមការទាមទារចង់បានដោយប្រទេសហ្វីលីពីន ព្រុយណេ ម៉ាឡេស៊ី និងតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ