Leon Panetta ៖ អាមេរិកនឹងបង្កើនចំនួននាវាចម្បាំងនៅអាស៊ី-ប៉ាស៊ីហ្វ៊ិក
សហរដ្ឋអាមេរិកនឹងចាប់ផ្តើមបង្កើនចំនួននាវាចម្បាំង នៅក្នុងតំបន់អាស៊ី-ប៉ាស៊ីហ្វ៊ិក។ នេះបើយោងតាមប្រសាសន៍របស់លោក Leon Panetta រដ្ឋមន្រ្តីក្រសួងការពារជាតិអាមេរិក ថ្លែងពីប្រទេសសិង្ហបុរី កន្លែងបើកវេទិកាសន្តិសុខតំបន់ ហៅថា Shangri-La Dialogue។ លោក Panetta ក៏បានថ្លែងផងដែរថា ការបង្កើនចំនួននាវាចម្បាំងនៅអាស៊ីនេះ មិនមែនធ្វើឡើង ដើម្បីប្រឈមមុខជាមួយចិននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:៥៩
នៅពេលបច្ចុប្បន្ននេះ នាវាចម្បាំងអាមេរិកត្រូវបែងចែកជាពីរស្មើគ្នា គឺពាក់កណ្តាល នៅប៉ែកខាងមហាសមុទ្រអាត្លង់ទិក និងពាក់កណ្តាល នៅប៉ែកខាងមហាសមុទ្រប៉ាស៊ីហ្វ៊ិក។ យោងតាមលោក Panetta អាមេរិកនឹងចាប់ផ្តើមដកនាវាចម្បាំងពីខាងមហាសមុទ្រអាត្លង់ទិក ទៅដាក់ពង្រាយនៅប៉ែកខាងមហាសមុទ្រប៉ាស៊ីហ្វ៊ិកវិញ។ គោលដៅ គឺត្រូវបែងចែកកម្លាំងជើងទឹកអាមេរិក ចំនួន ៦០% ទៅខាងតំបន់អាស៊ី-ប៉ាស៊ីហ្វ៊ិក នៅឆ្នាំ២០២០។
នាវាចម្បាំងដែលត្រូវដាក់ពង្រាយនៅអាស៊ី-ប៉ាស៊ីហ្វ៊ិក គឺរួមមាន នាវាផ្ទុកយន្តហោះចំនួន ៦គ្រឿង (ក្នុងចំណោមចំនួនសរុប ១១គ្រឿង) ព្រមទាំងនាវាពិឃាដ និងនាវាមុជទឹកមួយចំនួនធំផ្សេងទៀត។
ការប្រកាសអំពីផែនការបង្កើនវត្តមានទ័ពជើងទឹកនៅអាស៊ី-ប៉ាស៊ីហ្វ៊ិកនេះ ត្រូវបានធ្វើឡើង ក្រោយពីរដ្ឋាភិបាលរបស់លោកអូបាម៉ា បានបង្ហាញជាសាធារណៈ កាលពីខែមករា អំពីការផ្លាស់ប្តូរអាទិភាពយុទ្ធសាស្រ្តអាមេរិក ពីអឺរ៉ុប និងដើមបូព៌ា មកផ្តោតលើតំបន់អាស៊ីវិញ។
រដ្ឋមន្រ្តីការពារជាតិអាមេរិកបានបញ្ជាក់ថា ការផ្តោតយុទ្ធសាស្រ្តមកតំបន់អាស៊ី មិនមែនធ្វើឡើង ដើម្បីប្រឈមមុខជាមួយចិននោះទេ។ លោកទទួលស្គាល់ថា អាមេរិក និងចិន មានការខ្វែងគំនិតគ្នា ជុំវិញបញ្ហាមួយចំនួន ក្នុងនោះ រួមមាន ជម្លោះនៅសមុទ្រចិនខាងត្បូងផងដែរ។ ក៏ប៉ុន្តែ អាមេរិកដឹងច្បាស់ថា អាមេរិក និងចិនមិនមានជម្រើសអ្វីផ្សេងក្រៅពីជជែកគ្នា និងបង្កើនទំនាក់ទំនងយោធាជាមួយគ្នានោះទេ។
ចិនតែងតែបានបង្ហាញការមិនសប្បាយចិត្តចំពោះយុទ្ធសាស្រ្តថ្មីរបស់លោកអូបាម៉ា ដោយចិនយល់ថា អាមេរិកកំពុងតែឈានជើងចូលមកកកូរកកាយ ក្នុងសំណុំរឿងនៅតំបន់អាស៊ី ជាពិសេស គឺចូលមកលូកលាន់ ក្នុងជម្លោះរវាងចិន និងប្រទេសជិតខាង នៅសមុទ្រចិនខាងត្បូង ដែលមិនមានអ្វីត្រូវពាក់ព័ន្ធជាមួយអាមេរិក។
គួរកត់សម្គាល់ថា នៅក្នុងវេទិកាសន្តិសុខ Shangri-La Dialogue នៅសិង្ហបុរីឆ្នាំនេះ ចិនបញ្ជូនត្រឹមអនុប្រធានបណ្ឌិតសភាយោធាប៉ុណ្ណោះ ឲ្យទៅចូលរួម ដោយមិនមានវត្តមានរដ្ឋមន្រ្តីក្រសួងការពារជាតិ ដូចកាលពីឆ្នាំទៅមិញនោះទេ។ ជាផ្លូវការ ចិនបានលើកហេតុផលថាមកពីចិនកំពុងមានបញ្ហានយោបាយផ្ទៃក្នុង ទើបមិនអាចបញ្ជូនមន្រ្តីជាន់ខ្ពស់ទៅចូលរួមក្នុង Shangri-La Dialogue បាន។ ក៏ប៉ុន្តែ ក្រៅពីបញ្ហានយោបាយផ្ទៃក្នុង ចិនប្រហែលជាមានហេតុផលផ្សេងមួយទៀត គឺចិនចង់បង្ហាញឲ្យគេឃើញថា ចិនជំទាស់នឹងរាល់វេទិកាតំបន់អាស៊ីណា ដែលមានវត្តមានអាមេរិកមកចូលលូកលាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ