ទម្លាប់នៃការប្រើប្រាស់ឥទ្ធិពលអ្នកធំដើម្បីរកប្រយោជន៍ !
ចុះផ្សាយនៅថ្ងៃ៖
ស្តាប់ - ០៤:៤៨
នៅកម្ពុជា ឥទ្ធិពលរបស់អ្នកធំតែងត្រូវបានគេយកទៅប្រើប្រាស់ដើម្បីរកប្រយោជន៍ផ្ទាល់ខ្លួន។ ដោយសារអាជ្ញាធរមូលដ្ឋានខ្លាចអំណាចអ្នកធំ ពួកគេមិនហ៊ានចាត់វិធានការប្រឆាំងនឹងអំពើល្មើសក្រោមស្លាកឈ្មោះអ្នកមានអំណាចនោះឡើយ។ ទង្វើដែលកើតមានជាញឹកញាប់នេះប៉ះពាល់ដល់ប្រយោជន៍ពលរដ្ឋក្រីក្រជាច្រើន។ កាលពីប៉ុន្មានថ្ងៃមុននេះ លោកនាយករដ្ឋមន្ត្រី ហ៊ុន សែន បានស្តីបន្ទោសជាសាធារណៈចំពោះមន្ត្រីដែលបានយកឈ្មោះលោក និងភរិយាទៅប្រើប្រាស់ដើម្បីទទួលកម្មសិទ្ធិដីធ្លី។ តើហេតុអ្វីបានជាឥទ្ធិពលអ្នកមានអំណាចត្រូវបានគេប្រើប្រាស់ដើម្បីប្រយោជន៍យ៉ាងដូច្នេះ ?
លោកនាយករដ្ឋមន្ត្រី ហ៊ុន សែន បានទទួលស្គាល់ថា មានមន្ត្រីមួយចំនួនបានយកឈ្មោះរបស់លោក និងភរិយាទៅប្រើដើម្បីទទួលបានកម្មសិទ្ធិដីធ្លីខុសច្បាប់មួយចំនួន។ ប្រមុខរដ្ឋាភិបាលបានចេញបទបញ្ជាកាលពីថ្ងៃសៅរ៍ចុងសប្តាហ៍មុនថា ដីទាំងឡាយណាដែលមានឈ្មោះរបស់លោក ឬភរិយារបស់លោកត្រូវតែកាត់ចែកឲ្យប្រជាពលរដ្ឋទាំងអស់។ នេះគឺជាការចេញបទបញ្ជាជាថ្មីម្តងទៀតរបស់ប្រមុខរដ្ឋាភិបាលប្រឆាំងនឹងមន្ត្រីទាំងឡាយណាដែលចូលចិត្តយកឈ្មោះអ្នកមានអំណាចទៅប្រើប្រាស់ដើម្បីស្វែងរកប្រយោជន៍ផ្ទាល់ខ្លួន។
នៅកម្ពុជា អំណាច និងឥទ្ធិពលរបស់អ្នកធំបានផ្តល់ប្រយោជន៍ជាច្រើនដល់ជនឆ្លៀតឱកាសមួយចំនួន។ ជនទាំងនោះជាទូទៅជាអ្នកធ្វើការនៅក្បែរអ្នកធំ ឬមានទំនាក់ទំនងជាមួយអ្នកមានអំណាចដោយផ្ទាល់ ឬគ្រួសារអ្នកមានអំណាច។ បញ្ហានេះមិនមែនជារឿងថ្មី និងក៏មិនមែនជារឿងអាថ៌កំបាំងដែរពោលគឺមានបញ្ហាជាច្រើនណាស់ដែលបាន និងកំពុងកើតឡើង ជាពិសេសរឿងដែលមានប្រយោជន៍ក្រាស់ក្រែល សុទ្ធតែមានការលូកដៃដោយផ្ទាល់ពីអ្នកមានអំណាច ឬពីអ្នកដែលនិយមប្រើប្រាស់ឥទ្ធិពលអ្នកមានអំណាច។
ជាទូទៅ បញ្ហាទាំងឡាយនោះពិបាកនឹងដោះស្រាយដោយសារតែអាជ្ញាធរ ឬមន្ត្រីអនុវត្តច្បាប់ខ្លាចឥទ្ធិពលអ្នកធំ។ ដូច្នេះ ជំនួសឲ្យវិធានការប្រឆាំងជនល្មើស មន្ត្រីអាជ្ញាធរ ឬមន្ត្រីអ្នកអនុវត្តច្បាប់មួយចំនួនបែរជា «លុះក្នុងភយាគតិ» ពោលគឺការលម្អៀង និងឃុបឃិតដោយការខ្លាចអំណាចបុណ្យស័ក្តិ ជាថ្នូរនឹងផលប្រយោជន៍ទៅវិញ។ ទម្លាប់នេះបានបង្កើតជាប្រព័ន្ធឃុបឃិតគ្នាដ៏ស្មុគស្មាញប្រៀបដូចជាសំឡកំពឹស និងជាប្រភពនៃអយុត្តិធម៌សង្គម។ ប៉ុន្តែ ស្ថានការណ៍ហាក់បានស្ងប់ស្ងាត់មួយកម្រិត បន្ទាប់ពីលោកនាយករដ្ឋមន្ត្រីបានចេញបទបញ្ជាជាញឹកញាប់ឲ្យចាត់វិធានការដោយមិនលើកលែងចំពោះអ្នកមានអំណាច ឬអ្នកប្រើប្រាស់ឥទ្ធិពលអ្នកធំដើម្បីរកប្រយោជន៍ផ្ទាល់ខ្លួន។
ជាលទ្ធផលជាក់ស្តែងមាន មន្ត្រីតុលាការ មន្ត្រីប៉ូលិស ឬមន្ត្រីស៊ីវិលធំៗមួយចំនួនត្រូវបានចាប់បញ្ជូនទៅតុលាការជាបន្តបន្ទាប់។ យ៉ាងណាក៏ដោយ ទម្លាប់ប្រើអំណាច ឬប្រើប្រាស់ឥទ្ធិពលអ្នកមានអំណាច នៅមិនទាន់ត្រូវបានគាស់រំលើងទាំងស្រុងនៅឡើយទេ។ អ្នកធំខ្លះ ឬជនឆ្លៀតឱកាសមួយចំនួននៅតែបន្តប្រើប្រាស់ឥទ្ធិពលអំណាចដើម្បីរកផលប្រយោជន៍តែដដែល គ្រាន់តែមានរូបភាពស្ងប់ស្ងាត់ជាងមុនតែប៉ុណ្ណោះ។ តើហេតុអ្វីបានជាឥទ្ធិពលអ្នកធំត្រូវបានគេប្រើប្រាស់រកប្រយោជន៍ផ្ទាល់ខ្លួនបានយ៉ាងដូច្នេះ ?
សម្រាប់ក្រសែភ្នែកក្រុមអ្នកវិភាគសង្គមកម្ពុជា បញ្ហានេះបានកើតឡើងដោយសារតែសង្គមខ្មែរច្រើនតែផ្តល់តម្លៃខ្លាំងពេកដល់អំណាចបុណ្យស័ក្តិរបស់អ្នកធំ ទោះជាអំណាចនោះត្រូវបានគេយកទៅប្រើក្នុងផ្លូវខុសក៏ដោយ។ ផ្នត់គំនិតបែបនេះហើយដែលជាអំណោយផលដល់ជនឆ្លៀតឱកាសទាំងនោះឆ្លៀតប្រើប្រាស់ឥទ្ធិពលអ្នកធំដើម្បីរកប្រយោជន៍បានយ៉ាងស្រួល។ អ្នករងគ្រោះក្នុងរឿងទាំងនោះ គឺជាអ្នកក្រីក្រ គ្មានខ្នងបង្អែក ហើយបញ្ហានេះក៏បានបង្កផលប៉ះពាល់ធំធេងដែរដល់ប្រជាប្រិយភាពគណបក្សកាន់អំណាច។
ដើម្បីគាស់រំលើងវប្បធម៌អាក្រក់នេះ វិធានការពីរត្រូវគេមើលឃើញថាចាំបាច់ដែលត្រូវអនុវត្តទន្ទឹមគ្នា។ ទី១៖ គឺវិធានការផ្លូវច្បាប់ដូចអ្វីដែលលោកនាយករដ្ឋមន្ត្រីបាន និងកំពុងចាត់ប្រឆាំងមន្ត្រីខិលខូចទាំងនោះ ជាការងារដែលត្រូវបន្តធ្វើ។ ទី២៖គឺការលាងជម្រះផ្នត់គំនិតចាស់គំរឹលដែលអ្នកតូចត្រូវខ្លាចអំណាចអ្នកធំ ហើយមនុស្សខ្មែរត្រូវបែរមកចាប់យកទស្សនៈថ្មីវិញគឺ អ្នកធំជាអ្នកធ្វើការបម្រើប្រជាពលរដ្ឋ។ ដូច្នេះ បើពួកគេប្រព្រឹត្តខុស មហាជនត្រូវតែនាំគ្នាបកអាក្រាត និងបង្ខំឲ្យពួកគេទទួលទោសចំពោះមុខច្បាប់។ ពិតហើយថា ការគោរពឋានុក្រមរបស់មនុស្សក្នុងសង្គម ស្គាល់ខ្ពស់ស្គាល់ទាប គឺជាសីលធម៌ និងសុជីវធម៌ដែលមិនអាចខ្វះបានក្នុងសង្គមខ្មែរ។ ប៉ុន្តែ ការផ្តល់តម្លៃខ្លាំងពេកទៅលើអំណាចបុគ្គល គឺជាគ្រោះថ្នាក់ដល់សង្គមទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ