យន្តហោះកញ្ចាស់ធ្លាក់បាក់ជាពីរ ពេលចុះចតបន្ទាន់ខុសចំណត
មានស្លាប់យ៉ាងហោចណាស់ពីរនាក់ និង១១នាក់រងរបួស នៅព្រឹកថ្ងៃអង្គារទី ២៥ ធ្នូ ឆ្នាំ២០១២នេះ ក្នុងគ្រោះថ្នាក់យន្តហោះចុះចតបន្ទាន់ នៅភាគខាងកើតប្រទេសភូមា។ ជាយន្តហោះក្នុងស្រុក របស់ក្រុមហ៊ុន Air Bagan ដឹកអ្នកដំណើរ៦៥នាក់ ដែលភាគច្រើនជាអ្នកទេសចរបរទេស។
ចុះផ្សាយនៅថ្ងៃ៖
ស្តាប់ - ០១:៣៣
ក្នុងចំណោមអ្នករបួសទាំង១១នាក់ មានបួននាក់ជាជនបរទេស។ នេះបើតាមការជូនដំណឹងរបស់ក្រសួងព័ត៌មានដែលមិនទាន់បញ្ជាក់អំពីអត្តសញ្ញាណរបស់ជនរងគ្រោះដល់ជីវិតនៅឡើយទេ ! គ្រាន់តែដឹងថា ម្នាក់ជាកុមារ អាយុ១១ឆ្នាំ ដែលទំនងជាមិនបានឮ មិនឆ្លើយនឹងសញ្ញាប្រកាសអាសន្នឱ្យរត់ចេញពីយន្តហោះ ឯម្នាក់ទៀតជាបើកម៉ូតូលើដី តាមផ្លូវ ត្រូវយន្តបុកសង្កិន ពេលចុះបន្ទាបខ្លួនបន្ទាន់។
មូលហេតុនៃគ្រោះថ្នាក់ គឺទំនងបណ្តាលមកពីមានអគ្គិភ័យឆេះក្នុងម៉ូទ័រមួយ ទើបអ្នកបើកបរបង្ខំចិត្តចុះចតជាបន្ទាន់ នៅចម្ងាយប្រមាណពីរបីគីឡូម៉ែត្រពី អាកាសយានដ្ឋាន Heho ក្បែងបឹង Inlé ដែលជាតំបន់ទេសចរសំខាន់មួយរបស់ភូមា។
បើតាមសាក្សី ដោយហេតុត្រូវចុះចតជាបន្ទាន់ នៅពេលប៉ះដី យន្តហោះ បានបាក់ជាពីរ បន្ទាប់មកទើបផ្ទុះឆេះអស់មួយភាគធំ នៅវេលាម៉ោង៩ព្រឹក ម៉ោងនៅក្នុងស្រុក។ សូមបញ្ជាក់ថា Air Bagan ជាក្រុមហ៊ុនអាកាសចរណ៍ ក្នុងស្រុករបស់ភូមា ដែលទទួលផលចំណេញយ៉ាងខ្លាំងពីការបើកចំហនយោបាយ និងសន្ទុះកំណើនទេសចរ។ ប្រធានក្រុមហ៊ុននេះ ជាមហាសេដ្ឋី ល្បីថាមានទំនាក់ទំនងយ៉ាងជិតស្និទ្ធចំផុតជាមួយនឹងអតីតមេដឹកនាំរបបសឹកភូមា។ ក្រុមហ៊ុនមានយន្តហោះ ប្រភេទ Fokker 100 (ដ៏ពេញនិយមក្នុងទសវត្សឆ្នាំ៨០)ចំនួនពីរ ប៉ុន្តែម៉ូដែលនេះលែងមានផលិតហើយ ក្នុងសម័យទំនើបបច្ចុប្បន្ន ដោយជំនួសមកវិញដោយប្រភេទយន្តហោះទំនើបៗដូចយ៉ាង Boeing និងAirbus៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ