ជប៉ុនសន្យាធ្វើការអភិវឌ្ឍន៍តំបន់ឧស្សាហកម្មមួយក្នុងប្រទេសភូមា
នៅថ្ងៃសុក្រ ទី២១ ធ្នូម្សិលមិញ ប្រទេសជប៉ុន និងប្រទេសភូមាបានចុះហត្ថលេខាលើកិច្ចព្រមព្រៀងមួយស្តីពីការអភិវឌ្ឍន៍តំបន់ឧស្សហកម្មមួយស្ថិតក្បែរទីក្រុងរ៉ង់ហ្គូន។ នេះ គឺជាគម្រោងអភិវឌ្ឍមួយក្នុងចំណោមគម្រោងអភិវឌ្ឍផ្សេងទៀតដែលរដ្ឋាភិបាលភូមាសន្យានឹងធ្វើដើម្បីស្តារស្ថានភាពសេដ្ឋកិច្ចប្រទេសឡើងវិញ។ ស្ថានភាពសេដ្ឋកិច្ចប្រទេសដែលបានធ្លាក់ដល់បាតនៅក្រោមការគ្រប់គ្រងរបស់របបសឹកនាប៉ុន្មានទសវត្សរ៍ចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:២៧
តំបន់ឧស្សាហកម្មនោះ គឺជាតំបន់សេដ្ឋកិច្ចពិសេសឈ្មោះធីឡាវ៉ាដែលមានផ្ទៃដីទំហំ ២ ៤០០ហិចតា មានកំពុងផែមួយ និងមានចម្ងាយប្រមាណជា ២៥គីឡូម៉ែត្រពីទីក្រុងរ៉ង់ហ្គូន។ លោកអនុរដ្ឋមន្រ្តីក្រសួងសេដ្ឋកិច្ចជប៉ុនបានបញ្ជាក់ថា នេះជាកិច្ចសហប្រតិបត្តិការសេដ្ឋកិច្ចដ៏ធំមួយរវាងជប៉ុន និងភូមាដែលមិនធ្លាប់មានពីពេលមុនទេ។ យោងតាមកិច្ចព្រមព្រៀង ការអភិវឌ្ឍន៍តំបន់សេដ្ឋកិច្ចពិសេសធីឡាវ៉ានឹងត្រូវធ្វើឡើង តាមរយៈការបង្កើតក្រុមហ៊ុនចម្រុះភូមា ជប៉ុននៅឆ្នំា ២០១៣ និងចាប់ផ្តើមដំណើរការសាងសង់នៅឆ្នំា ២០១៥។ តំបន់សេដ្ឋកិច្ចពិសេសធីឡាវ៉ានឹងទទួលក្រុមហ៊ុនវិនិយោគផ្នែកបច្ចេកវិទ្យាខ្ពស់ ឧស្សាហកម្មវាយនភ័ណ្ឌ និងឧស្សាហកម្មផ្នែកផ្សេងៗទៀតដែលតម្រូវការកម្លំាងពលកម្មច្រើន។ តែគេនៅមិនទាន់ដឹងអំពីតួលេខច្បាស់លាស់ទេ។ លោកអនុរដ្ឋមន្រ្តីក្រសួងផែនការ និងអភិវឌ្ឍសេដ្ឋកិច្ចភូមាបានសាទរចំពោះគម្រោងអភិវឌ្ឍតំបន់សេដ្ឋកិច្ចពិសេសធីឡាវ៉ា ព្រោះវានឹងអាចបង្កើតការងារយ៉ាងច្រើនសម្បើមជូនប្រជាជនភូមា។
សូមជម្រាបជូនថា គម្រោងអភិវឌ្ឍតំបន់សេដ្ឋកិច្ចពិសេសធីឡាវ៉ាពីសំណាក់ប្រទេសជប៉ុនពេលនេះបានធ្វើឡើង បន្ទាប់ពីរដ្ឋាភិបាលភូមាបានចុះកិច្ចសន្យាជាមួយរដ្ឋាភិបាលថៃក្នុងការអភិវឌ្ឍន៍តំបន់សេដ្ឋកិច្ចពិសេសមួយទៀតនៅប៉ែកខាងត្បូងឈ្មោះ ដាវេជាមួយនឹងទឹកប្រាក់វិនិយោគរាប់សិបពាន់លានដុល្លារ។ កាលពីថ្ងៃច័ន្ទដើមសប្តាហ៍នេះ លោកប្រធានាធិបតីភូមាថេន សេនថែមទំាងបានអញ្ជើញលោកស្រីនាយករដ្ឋមន្រ្តីថៃយីងឡាក់ អមដំណើរដោយប្រតិភូអ្នកជំនួញមួយក្រុមដើម្បីពិនិត្យតំបន់សេដ្ឋកិច្ចពិសេសដាវេទៀតផង។ យ៉ាងណាក៏ដោយ អ្នកទទួលខុសត្រូវម្នាក់នៃក្រសួងសេដ្ឋកិច្ចជប៉ុនបានបញ្ជាក់ថា តំបន់សេដ្ឋកិច្ចពិសេស ធីឡាវ៉ា គឺជាកម្មសិទ្ធិផ្តាច់មុខរបស់ជប៉ុន តែបើរដ្ឋាភិបាលភូមាយល់ព្រម ជប៉ុនក៏អាចចូលរួមនៅតំបន់សេដ្ឋកិច្ចពិសេសដាវេជាមួយភាគីថៃដែរ។
គួររម្លឹកជូនឡើងវិញថា តំាងពីក្រោយការរំលាយរដ្ឋាភិបាលដឹកនំាដោយរបបសឹកក្នុងខែមីនា ឆ្នំា ២០១១ មក រដ្ឋាភិបាលស៊ីវិលបានបន្តធ្វើកំណែទម្រង់នយោបាយ និងសេដ្ឋកិច្ចយ៉ាងសកម្ម ជាមួយនឹងការអនុម័តច្បាប់ស្តីពីវិនិយោគបរទេសកាលពីខែវិច្ឆិកា ឆ្នំា ២០១២។ ជាមួយនឹងគម្រោងវិនិយោគបរទេសរាប់សិបពាន់លានដុល្លារនាពេលខាងមុខ រដ្ឋាភិបាលទីក្រុងណៃពីដ៏សង្ឃឹមថានឹងទទួលបានកំណើនសេដ្ឋកិច្ចប្រចំាឆ្នំាជាង ៧% ក្នុងរយៈពេល ៥ឆ្នំា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ